Air Strikes: లెబనాన్పై ఇజ్రాయెల్ బాంబుల వర్షం.. 1982 తర్వాత అతిపెద్ద దాడి.. ఎంత మంది చనిపోయారంటే..!
Air Strikes: లెబనాన్పై ఇజ్రాయెల్ బాంబుల వర్షం కురిపిస్తోంది. కేవలం 10 నిమిషాల్లోనే వందకుపైగా ఎయిర్ స్ట్రయిక్స్ నిర్వహించింది. లెబనాన్లో ఇప్పటి వరకు 254 మంది మృతి చెందినట్లు సమాచారం. అలాగే వందలాది మందికి తీవ్ర గాయాలైనట్లు తెలుస్తోంది. 1982 తర్వాత లెబనాన్పై అతిపెద్ద దాడిగా అభివర్ణిస్తున్నారు.
Air Strikes: మధ్య ప్రాచ్యంలో ఉద్రిక్తతలు పరాకాష్టకు చేరుకున్నాయి. లెబనాన్లోని హెజ్బొల్లా స్థావరాలే లక్ష్యంగా ఇజ్రాయెల్ డిఫెన్స్ ఫోర్సెస్ (IDF) చారిత్రాత్మక స్థాయిలో విరుచుకుపడ్డాయి. కేవలం పది నిమిషాల వ్యవధిలోనే వందకు పైగా కమాండ్ సెంటర్లు, సైనిక స్థావరాలను ధ్వంసం చేస్తూ ఇజ్రాయెల్ బాంబుల వర్షం కురిపించింది. 1982 తర్వాత లెబనాన్పై జరిగిన అతిపెద్ద దాడి ఇదేనని విశ్లేషకులు భావిస్తున్నారు.
నిమిషాల్లోనే విధ్వంసం:
దక్షిణ లెబనాన్, బీరుట్ శివార్లు, తూర్పు బెకా లోయ ప్రాంతాల్లోని హెజ్బొల్లా పట్టున్న ప్రాంతాలపై ఇజ్రాయెల్ వైమానిక దాడులు జరిపింది. ఈ భీకర దాడుల్లో ప్రముఖ మతపెద్ద సాదిక్ అల్ నబుల్సీ మరణించినట్లు సమాచారం. అనేక బహుళ అంతస్తుల భవనాలు నేలమట్టం కాగా, శిథిలాల కింద వందలాది మంది చిక్కుకుపోయారని తెలుస్తోంది.
మృతుల సంఖ్య: ఈ ఘర్షణలు మొదలైనప్పటి నుండి లెబనాన్లో మరణించిన వారి సంఖ్య 1,500 దాటింది. వీరిలో 130 మందికి పైగా పసిపిల్లలు ఉండటం విషాదకరం. దేశ జనాభాలో దాదాపు 20% మంది, అంటే 12 లక్షల మంది ఇళ్లు వదిలి ప్రాణరక్షణ కోసం వలస వెళ్లారు. ప్రస్తుతం లెబనాన్లోని పాఠశాలలన్నీ శరణార్థి శిబిరాలుగా మారాయి. ఆసుపత్రులన్నీ క్షతగాత్రులతో కిక్కిరిసిపోయి వైద్య సేవలందించడం సవాలుగా మారింది.
అంతర్జాతీయ పరిణామాలు – ఒప్పందంపై నీలినీడలు
ఆశ్చర్యకరంగా, అమెరికా – ఇరాన్ మధ్య కాల్పుల విరమణ ఒప్పందం కుదిరినట్లు వార్తలు వచ్చిన కొద్ది గంటలకే ఈ దాడులు జరగడం గమనార్హం. పాకిస్థాన్ మధ్యవర్తిత్వం వహించిన ఈ ఒప్పందం గురించి చర్చలు జరుగుతున్నప్పటికీ, ఇజ్రాయెల్ ప్రధాని నెతన్యాహు కార్యాలయం మాత్రం దీనిని తోసిపుచ్చింది. తమ సరిహద్దుల్లో ‘బఫర్ జోన్’ ఏర్పాటు చేసి, హెజ్బొల్లాను పూర్తిగా నిర్వీర్యం చేసే వరకు దాడులు ఆపబోమని ఇజ్రాయెల్ స్పష్టం చేస్తోంది.
హెజ్బొల్లా వ్యూహం:
ఇరాన్ అత్యున్నత నాయకుడు ఖమేనీ హత్య తర్వాత ఇజ్రాయెల్పై రాకెట్లతో విరుచుకుపడ్డ హెజ్బొల్లా, ప్రస్తుతం కొంత సంయమనం పాటిస్తోంది. ‘చారిత్రక విజయం’ తథ్యమని ప్రకటిస్తూనే, అధికారిక ఒప్పందం కుదిరే వరకు ప్రజలెవరూ ఇళ్లకు తిరిగి రావద్దని సూచించింది.
ఇరాన్ ప్రయోజనాల కోసం హెజ్బొల్లా దేశాన్ని యుద్ధంలోకి నెట్టిందని లెబనాన్లో ఒక వర్గం విమర్శిస్తున్నప్పటికీ, బాధితులైన షియా ముస్లిం వర్గాల్లో మాత్రం ఆ సంస్థ పట్ల మద్దతు తగ్గలేదు. ఇజ్రాయెల్ సైన్యం భూతల దాడులకు కూడా సిద్ధమవుతుండటంతో లెబనాన్ భవిష్యత్తు మరింత అంధకారంలో పడే ప్రమాదం కనిపిస్తోంది.
మరిన్ని అంతర్జాతీయ వార్తల కోసం ఇక్కడ క్లిక్ చేయండి