హోటల్‌ రూమ్‌లో యువతికి ఊహించని షాక్‌.. వీడియో

 నటాలిసి తక్సిసి తన జపాన్ పర్యటనలో భాగంగా ఓ హోటల్‌లో గదిని అద్దెకు తీసుకున్నారు. గదిలోకి వెళ్లిన కాసేపటికి అనుమానం వచ్చి చూడగా, మంచం కింద ఓ వ్యక్తి నక్కి ఉండటం గమనించారు. ఆమె కేకలు వేయడంతో ఆ వ్యక్తి అక్కడి నుంచి పారిపోయాడు. భద్రతకు అత్యంత ప్రాధాన్యతనిచ్చే జపాన్‌ను తన పర్యటన కోసం ఎంచుకుంటే ఇలాంటి ఘటన జరగడం తనను తీవ్రంగా కలచివేసిందని తక్సిసి తెలిపారు. హోటల్‌లో కీ కార్డ్ యాక్సెస్ సిస్టమ్ ఉన్నప్పటికీ, ఆ వ్యక్తి గదిలోకి ఎలా ప్రవేశించగలిగాడనేది అంతుచిక్కడం లేదన్నారు. ఈ సంఘటనపై హోటల్ సిబ్బందికి ఫిర్యాదు చేయగా, వారు పోలీసులను అప్రమత్తం చేశారు. అయితే, ఆ తర్వాత కూడా ఆమెకు పలు ఇబ్బందులు ఎదురయ్యాయని తెలిపారు. హోటల్‌ ప్రాంగణంలోని సీసీటీవీ కెమెరాలు పనిచేయడం లేదని సిబ్బంది చెప్పడం గమనార్హం. ఈ భయానక అనుభవం తర్వాత కూడా హోటల్ యాజమాన్యం తాను చెల్లించిన మొత్తాన్ని వాపసు ఇచ్చేందుకు నిరాకరించిందని ఆమె వాపోయారు. ఘటనకు సంబంధించి పోలీసుల నుంచి రిపోర్ట్ కాపీని పొందడం కూడా కష్టంగా మారిందని అన్నారు. పోలీసులు గదిని తనిఖీ చేయగా, అక్కడ ఓ పవర్ బ్యాంక్, యూఎస్‌బీ కేబుల్‌ను స్వాధీనం చేసుకున్నారు. ఆ రాత్రికి ఆమె వేరే హోటల్‌కు మారినప్పటికీ, ఈ ఘటనపై హోటల్ యాజమాన్యం స్పందించిన తీరుపై అసంతృప్తి వ్యక్తం చేశారు. ఈ మొత్తం ఉదంతాన్ని వివరిస్తూ నటాలిసి ఇన్‌స్టాగ్రామ్‌లో ఓ వీడియో పోస్ట్ చేశారు. ఏపీఏ హోటల్ కోసం తాను 510 డాలర్లు ఖర్చు చేశానని ఆమె ఆ పోస్ట్‌లో పేర్కొన్నారు. ఈ వీడియో సోషల్ మీడియాలో వైరల్ కావడంతో నెటిజన్లు తీవ్రంగా స్పందించారు.