ఇంట్లో తండ్రి మృతదేహం.. పరీక్ష హాల్లో తనయుడు పుట్టెడు దుఃఖంతో..

తల్లిదండ్రుల ఆశయాల కంటే గొప్పవి ఏవీ ఉండవు అనడానికి నెల్లూరు జిల్లా సంగం మండలంలో జరిగిన ఈ ఘటనే నిదర్శనం. ఒకవైపు కళ్లముందే విగతజీవిగా పడి ఉన్న కన్నతండ్రి.. మరోవైపు తన భవిష్యత్తును నిర్ణయించే ఇంటర్మీడియట్ మొదటి సంవత్సరం పరీక్ష. ఈ రెండింటి మధ్య నలిగిపోయిన ఆ విద్యార్థి వేదన వర్ణనాతీతం. కందల శివకుమార్ అనే నిరుపేద తండ్రి, తన బిడ్డ రామసాయి ప్రయోజకుడు కావాలని కలలు కన్నాడు. కానీ, విధి ఆ బంధాన్ని అర్ధాంతరంగా తుంచేసింది. ఆదివారం రాత్రి శివకుమార్ గుండెపోటుతో మరణించడంతో ఆ ఇల్లు విషాదంలో మునిగిపోయింది. సోమవారం ఉదయం పరీక్ష ఉన్న తరుణంలో, తండ్రి మరణం రామసాయిని తీవ్ర విషాదంలోకి నెట్టింది. తండ్రిని కోల్పోయిన పుట్టెడు దుఃఖంతో పరీక్ష రాయగలడా? లేక తన కోసం తండ్రి కన్న కలలను అలాగే వదిలేయాలా? అన్న సందిగ్ధంలో చివరకు, కుటుంబ సభ్యుల ప్రోత్సాహంతో తండ్రి ఆశయమే మిన్న అని నిర్ణయించుకున్నాడు. తండ్రి మృతదేహం ఇంట్లో ఉండగానే, కన్నీళ్లు తుడుచుకుంటూ పరీక్షా కేంద్రానికి బయలుదేరాడు. పరీక్షా హాల్లో ప్రశ్నపత్రం ముందు ఉన్నా, అతడి మనసంతా నాన్న జ్ఞాపకాలతోనే నిండిపోయింది. కన్నీటి పర్యంతమవుతూనే పరీక్ష రాస్తున్న ఆ బాలుడిని చూసి తోటి విద్యార్థులు, ఉపాధ్యాయులు సైతం చలించిపోయారు. తండ్రికి ఇచ్చే నిజమైన నివాళి ఆయన ఆశయాన్ని నెరవేర్చడమేనని నిరూపించిన రామసాయి ధైర్యం అందరినీ కలచివేసింది. పేదరికం, ప్రాణప్రదమైన తండ్రి మరణం వంటి పెను తుఫానులను ఎదుర్కొని అతడు రాసిన ఈ పరీక్ష, కేవలం మార్కుల కోసం కాదు.. ఒక తండ్రి కల కోసం అని, ఆ విద్యార్ధికి భగవంతుడు ధైర్యాన్నివ్వాలని అందరూ కోరుకున్నారు.

మరిన్ని వీడియోల కోసం ఇక్కడ క్లిక్ చేయండి

Also Watch:

Jai Hanuman: లాంఛనంగా మొదలైన జై హనుమాన్ సినిమా

Ustaad Bhagat Singh: ఉస్తాద్ భగత్ సింగ్‌లో అవేం ఉండవు.. తేల్చేసిన హరీష్ శంకర్..!

నాయికలను రిపీట్ చేస్తున్న సితార ఎంటర్‌టైన్‌మెంట్స్.. కారణం అదేనా ??

Rajamouli: రాజమౌళి నెక్స్ట్ టార్గెట్ నాగ చైతన్య.. అసలు విషయం ఇదే

ఐకాన్ స్టార్ బ్రాండ్ వ్యాల్యూ పెంచిన పుష్ప.. ఒక సినిమా కాదు, ఒక బ్రాండ్