Viral Video: ఏనుగు పాలు తాగుతున్న చిన్నారి.. లైక్స్ కోసం చిన్నపిల్ల ప్రాణాలతో ఆటలా అంటూ నెటిజన్ల ఆగ్రహం..(వీడియో)


మనం ఆవు, పాలు, మేక పాలు, చివరికి గాడిద పాలు తాగేవారిని కూడా చూశాం. కానీ, ఈ చిన్నారి ఏకంగా ఏనుగు పాలే తాగేస్తోంది. పైగా.. ఏనుగు కిందకు దూరి.. దాని పొదుగును నొక్కుతూ మరీ పాలు తాగేస్తోంది. ఈ వీడియో ఇప్పుడు సోషల్ మీడియాలో వైరల్‌గా మారింది. ఈ ఘటన అస్సాంలో చోటుచేసుకుంది. గోలాఘాట్ జిల్లాకు చెందిన హర్షిత బోరా అనే మూడేళ్ల చిన్నారి ఏనుగు వద్ద ఆడుకుంటూ కనిపించింది. ఈ క్రమంలో ఆమె ఏనుగు పొదుగును నొక్కుతూ పాలు తాగింది. ఆ ఏనుగును ‘‘బిను బిను’’ అంటూ ముద్దుగా పిలుస్తూ దాని దగ్గరే ఆటలు ఆడుతోంది. ఆ చిన్నారి పాలు పిండి తాగుతున్నా.. ఏనుగు అలా చూస్తేనే ఉంది కానీ ఎలాంటి హానీ తలపెట్టలేదు. ఇదంతా చూస్తుంటే ఆ చిన్నారి మావటి కుటుంబానికి చెందినదిగా తెలుస్తోంది. ఆ సమయంలో పెద్దలు కూడా ఏనుగుకు సమీపంలోనే ఉన్నారు. ఏనుగులు ఒక్కోసారి చాలా ఆగ్రహంతో ఉంటాయి. తొండంతో పట్టుకుని విసిరేయడమే కాదు.. కాళ్లతో తొక్కి చంపేస్తాయి కూడా. ఇదే అంటున్నారు ఈ వీడియో చూసిన నెటిజన్లు కూడా.. ‘‘లక్కీగా ఆ ఏనుగు చిన్నారిని ఏమీ చేయలేదు కాబట్టి సరిపోయింది. దానికి చిరాకు వస్తే చిన్నారి ప్రాణాలకు హాని కలిగేది’’ అంటూ ఆందోళన వ్యక్తం చేస్తున్నారు.