తమిళనాడు అసెంబ్లీ బల పరీక్షలో నెగ్గిన విజయ్..

తమిళనాడులో రాజకీయ చరిత్రకు కొత్త అధ్యాయం మొదలైంది. ఇటీవల ప్రజాక్షేత్రంలో ఘన విజయం సాధించిన టీవీకే అధినేత విజయ్.. ఇప్పుడు అసెంబ్లీ బలపరీక్షలోనూ తన ఆధిపత్యాన్ని నిరూపించారు. సీఎం విజయ్ నేతృత్వంలోని టీవీకే ప్రభుత్వానికి 144 మంది ఎమ్మెల్యేలు మద్దతు తెలపగా.. వ్యతిరేకంగా కేవలం 22 ఓట్లు మాత్రమే వచ్చాయి. ముఖ్యంగా అన్నాడీఎంకే చీలిక వర్గానికి చెందిన 24 మంది సభ్యులు విజయ్‌కు మద్దతు ఇవ్వడం రాజకీయంగా కీలక పరిణామంగా మారింది.

బలపరీక్ష అనంతరం అసెంబ్లీలో స్పీకర్ చేసిన వ్యాఖ్యలు ప్రత్యేక ఆకర్షణగా నిలిచాయి. “విజయ్ అంటేనే విక్టరీ.. ఆయనపై అందరికీ విశ్వాసం ఉంది.. మానవత్వానికే విజయ్ మారుపేరు” అంటూ ప్రశంసలు కురిపించారు. ప్రజా నాయకుడిగా వచ్చిన విజయ్.. ఇప్పుడు పరిపాలనలోనూ తన ముద్ర వేయడానికి సిద్ధమయ్యారని రాజకీయ విశ్లేషకులు అభిప్రాయపడుతున్నారు. “కొత్త చరిత్ర సృష్టించారు” అన్న స్పీకర్ మాటలు తమిళ రాజకీయాల్లో కొత్త శకానికి సంకేతాలుగా మారాయి.