ఇంటర్నెట్ వినియోగదారులకు షాక్.. ఇకపై వారు ‘డేటా ట్యాక్స్’ కట్టాల్సిందే !

స్మార్ట్‌ఫోన్ వినియోగదారులకు కేంద్ర ప్రభుత్వం షాకిచ్చేలా కనిపిస్తోంది. దేశవ్యాప్తంగా విపరీతంగా పెరిగిపోయిన ఇంటర్నెట్ వినియోగాన్ని ఆదాయ వనరుగా మార్చుకోవడంతో పాటు, యువతలో పెరుగుతున్న ‘స్క్రీన్ టైమ్’కు అడ్డుకట్ట వేసేందుకు “డేటా వినియోగంపై అదనపు పన్ను” విధించే ప్రతిపాదనను కేంద్రం పరిశీలిస్తోంది. ఈ ఏడాది జనవరిలో జరిగిన టెలికాం రివ్యూ సమావేశంలో ఈ అంశంపై ప్రాథమిక చర్చ జరిగినట్లు సమాచారం. గత ఆర్థిక సంవత్సరం గణాంకాల ప్రకారం భారతీయులు ఏకంగా 229 బిలియన్ జీబీల డేటాను వాడేశారు. ఈ లెక్కన ప్రతి ఒక జీబీ డేటాపై ఒక్క రూపాయి చొప్పున ట్యాక్స్ విధిస్తే, ప్రభుత్వ ఖజానాకు ఏడాదికి సుమారు రూ. 22,900 కోట్ల అదనపు ఆదాయం సమకూరుతుందని అంచనా. ప్రస్తుతం టెలికాం సేవలపై 18 శాతం జీఎస్టీ చెల్లిస్తున్న వినియోగదారులకు, ఈ కొత్త పన్ను భారంగా మారనుంది. అయితే, అందరిపై ఒకేలా కాకుండా ఒక నిర్దిష్ట పరిమితి దాటిన తర్వాతే ఈ ట్యాక్స్ విధించే ‘స్లాబ్ విధానం’ ఉండే అవకాశం ఉందని నిపుణులు భావిస్తున్నారు. ఈ ప్రతిపాదన ఎంతవరకు సాధ్యం? దీనివల్ల ‘డిజిటల్ ఇండియా’ లక్ష్యాలకు ఆటంకం కలుగుతుందా? అనే అంశాలపై అధ్యయనం చేయాలని టెలికాం శాఖను కేంద్రం ఆదేశించింది. సెప్టెంబర్ 2026 నాటికి ఈ నివేదిక రానుంది. ప్రభుత్వం నుంచి అధికారిక స్పష్టత వచ్చే వరకు ఇది కేవలం ప్రతిపాదన దశలోనే ఉన్నప్పటికీ, నెటిజన్లలో మాత్రం అప్పుడే ఆందోళన మొదలైంది.

మరిన్ని వీడియోల కోసం ఇక్కడ క్లిక్ చేయండి

Also Watch:

Hyderabad: హైదరాబాద్‌లో.. కట్టెలు, బొగ్గులకు ఫుల్ డిమాండ్‌ !!