ఈ పిట్ట భలే తెలివైంది.. పామును ఎట్టా మాయ చేస్తుందో తెలుసా..?

ప్రకృతిలో అద్భుతమైన తెలివితేటలు ప్రదర్శించే పక్షుల్లో రెడ్ వెటల్డ్ లాప్ వింగ్ (నేల నెమలి) ప్రత్యేక స్థానం సంపాదించింది. తన గూడును, పిల్లలను రక్షించుకోవడంలో ఈ పక్షి అనుసరించే వ్యూహాలు నిజంగా ఆశ్చర్యానికి గురి చేస్తాయి. గూడు వైపు పాము లేదా వేటగాడు వస్తున్నట్లు గమనించిన వెంటనే, ఈ పక్షి తన రెక్క విరిగినట్లుగా నటిస్తూ దృష్టిని మళ్లిస్తుంది. గాయపడినట్టుగా కనిపిస్తూ వేటగాడిని తన వెంట తీసుకెళ్లి, గూడు నుంచి దూరం చేస్తుంది. ఈ తెలివైన నాటకం వల్ల గుడ్లు, పిల్లలు సురక్షితంగా ఉంటాయి.

ఎండ తీవ్రత ఎక్కువగా ఉన్నప్పుడు కూడా ఈ పక్షి ప్రత్యేక జాగ్రత్తలు తీసుకుంటుంది. నీటిలో తన రెక్కలను తడిపి, ఆ తడి రెక్కలతో గుడ్లపై కూర్చుని చల్లదనాన్ని అందిస్తుంది. ప్రకృతి పరిస్థితులకు అనుగుణంగా తాను మారే సామర్థ్యం ఈ పక్షి ప్రత్యేకత.ఇక ఈ పక్షి గుడ్లు రాళ్ల రంగులో ఉండటం వల్ల అవి చుట్టూ ఉన్న నేలతో కలిసిపోయి వేటగాళ్ల కంటికి కనిపించవు. ఇది సహజ రక్షణగా పనిచేస్తుంది. గ్రామీణ ప్రాంతాల్లో రైతులు ఈ పక్షి గూడు పెట్టే ప్రదేశాన్ని బట్టి వర్షపాతం గురించి అంచనాలు వేస్తుంటారు. ఎత్తైన ప్రదేశంలో గూడు పెడితే ఎక్కువ వర్షాలు, లోతట్టు ప్రాంతంలో పెడితే తక్కువ వర్షాలు కురుస్తాయని నమ్మకం. మరో విశేషం ఏమిటంటే, ఈ పక్షి రాత్రి వేళల్లో కూడా అప్రమత్తంగా ఉండి అరుస్తూ తన పరిసరాలకు కాపలా కాస్తుంది. అందుకే దీనిని అడవిలో ‘వాచ్‌మెన్ పక్షి’గా కూడా పిలుస్తారు.

కాగా ఈ పక్షిని ఒక్కో ప్రాంతంలో ఒక్కో పేరుతో పిలుస్తారు. దీన్ని మీ ప్రాంతంలో ఏమని పిలుస్తారో కామెంట్ ద్వారా తెలియజేయండి…

Also Read: గేదె డెలివరీ సమయంలో ఈ జాగ్రత్తలు తప్పకుండా తీసుకోండి..