Video: నో డైట్.. నో జిమ్.. మూడు పూటల అన్నం తింటూనే సిక్స్ ప్యాక్.. ఈ కండల వీరుడి సీక్రెట్ తెలిస్తే వావ్ అనాల్సిందే..
కండలు పెంచాలంటే కావాల్సింది ఖరీదైన ప్రోటీన్ పౌడర్లు కాదు.. గుండె నిండా పట్టుదల అని నిరూపిస్తున్నాడు ఈ చెన్నై యువకుడు. పగలంతా ఎండలో సిమెంట్ బస్తాలు మోస్తూ, సాయంత్రం జిమ్ములో చెమట చిందిస్తున్న ఈ కార్మికుడి కండల రహస్యం వింటే ఎవరైనా ఆశ్చర్యపోవాల్సిందే. వేల రూపాయల డైట్ ప్లాన్స్ లేవు, కేవలం ఇంటి అన్నం తింటూ ఆయన సాధించిన ఈ సిక్స్ప్యాక్ వెనుకున్న కథ ఏంటంటే..?
నేటి టెక్నాలజీ యుగంలో ఫిట్నెస్ అనేది ఒక భారీ వ్యాపారంగా మారిపోయింది. ఏ జిమ్కు వెళ్లినా ఏసీ గదులు, వేల రూపాయల సప్లిమెంట్ డబ్బాలు, ఖరీదైన డైట్ చార్టులే కనిపిస్తాయి. ఇవన్నీ ఉంటేనే బాడీ బిల్డింగ్ సాధ్యమని నమ్మే యువతకు.. చెన్నై వీధుల్లో సిమెంట్ బస్తాలు మోసే ఒక సామాన్య భవన నిర్మాణ కార్మికుడు కళ్లు తెరిపిస్తున్నాడు. ప్రముఖ కంటెంట్ క్రియేటర్ జయచంద్రన్ తమిళరసన్ తన ఇన్స్టాగ్రామ్లో పోస్ట్ చేసిన ఒక వీడియో ద్వారా ఈ ‘నిజమైన బాహుబలి’ వెలుగులోకి వచ్చాడు.
ఎముకలు విరిగే కష్టం.. గుండె నిండా ఇష్టం
భవన నిర్మాణ రంగం అంటేనే శారీరక శ్రమతో కూడుకున్న పని. పగలంతా మండుతున్న ఎండలో ఇటుకలు మోయాలి, సిమెంట్ కలపాలి, బరువులతో కుస్తీ పట్టాలి. సాధారణంగా ఎవరైనా సాయంత్రం అయ్యేసరికి అలసిపోయి విశ్రాంతి కోరుకుంటారు. కానీ ఈ యువకుడు మాత్రం అక్కడే తన రెండో జీవితాన్ని ప్రారంభిస్తాడు. పగలు పనిలో ఎంత అలసిపోయినా, వారానికి ఐదు రోజులు కచ్చితంగా జిమ్లో కసరత్తులు చేస్తాడు. పగలు పనిలో బరువులు మోయడం వల్ల కాళ్లపై ఒత్తిడి పడుతుందని గ్రహించి, లెగ్ వర్కౌట్స్ను చాలా పద్ధతిగా, పరిమితంగా చేస్తూ తన శరీరాన్ని తనే మలచుకున్నాడు. ఏ ట్రైనర్ సహాయం లేకుండానే శరీర నిర్మాణ శాస్త్రాన్ని తన వృత్తి ద్వారానే అర్థం చేసుకున్నాడు.
టిఫిన్లకు స్వస్తి.. అన్నమే శక్తి..
దక్షిణాదిలో ఇడ్లీ, దోశలను కాదని ఉండటం కష్టం. కానీ ఆయన మాత్రం ఒక కఠినమైన నిర్ణయం తీసుకున్నాడు.
డైట్ రహస్యం: ఆయన మూడు పూటలా కేవలం తెల్ల అన్నం, సాంబార్, రసం, కూరగాయలనే భోజనంగా తీసుకుంటాడు. బీట్రూట్, క్యారెట్ వంటి సహజమైన కూరగాయలకు ప్రాధాన్యత ఇస్తాడు.
నో జంక్ ఫుడ్: పిజ్జాలు, బర్గర్లు పక్కన పెట్టండి.. కనీసం బయట దొరికే టీ, కాఫీలకు కూడా ఆయన దూరమే.
విచిత్రమైన నాన్-వెజ్ అలవాటు: బాడీ బిల్డర్లు అనగానే రోజుకు డజన్ల కొద్దీ గుడ్లు, కిలోల కొద్దీ చికెన్ తింటారని మనం అనుకుంటాం. కానీ ఈయన వారానికి ఒక్కసారి మాత్రమే మటన్ తింటాడు. చికెన్ లేదా చేపలను అస్సలు ముట్టడు. కేవలం అరటిపండ్ల ద్వారానే అదనపు శక్తిని పొందుతాడు.
స్టెరాయిడ్స్ లేవు.. కేవలం పట్టుదలే..
ఆయన కండల తీరు చూసి చాలామంది నిపుణులు సైతం ఆశ్చర్యపోయారు. నువ్వు కచ్చితంగా సప్లిమెంట్స్ లేదా స్టెరాయిడ్స్ వాడుతుంటావని ప్రశ్నించిన వారికి ఆయన చెప్పిన సమాధానం ప్రతి ఒక్కరూ గుర్తుంచుకోవాలి.. ‘‘నా శరీరం నా కష్టానికి ప్రతిఫలం. నాకు స్టెరాయిడ్స్ అంటే ఏంటో కూడా తెలియదు. కనీసం ప్రోటీన్ పౌడర్ కూడా కొనలేని స్థితి నుండి వచ్చాను. నాకున్నదల్లా పగలు పని, రాత్రి జిమ్, సరైన నిద్ర మాత్రమే’’ అని చెప్పాడు. మద్యం, ధూమపానం వంటి వ్యసనాలకు దూరంగా ఉంటూ, ప్రతిరోజూ 7 గంటల గాఢ నిద్రను అనుసరించడమే తన కండల రహస్యమని ఆయన గర్వంగా చెబుతాడు.
నేటి యువతకు సందేశం
ఫిట్నెస్ కోసం వేల రూపాయలు తగలేస్తూ, ఫలితం రాక నిరాశ చెందే యువతకు ఈ చెన్నై కార్మికుడు ఒక పాఠం. ఖరీదైన జిమ్ములు కావు, మన ఇంట్లో వండే సాధారణ భోజనమే మనకు బలాన్నిస్తుందని ఆయన నిరూపించాడు. ‘‘ఇంటి భోజనం తినండి, క్రమం తప్పకుండా వ్యాయామం చేయండి, వ్యసనాలను వదలండి’’ అని ఆయన ఇస్తున్న నినాదం ఇప్పుడు సోషల్ మీడియాలో మారుమోగుతోంది.