
దుబాయ్ అనగానే గుర్తొచ్చేది ఆకాశాన్ని తాకే భవనాలు, విలాసవంతమైన జీవనశైలి. దుబాయ్ నగరం సంపన్నులకు, పర్యాటకులకు ఒక స్వర్గధామం. ఇక్కడి విలాసవంతమైన జీవనశైలి ప్రపంచవ్యాప్తంగా ప్రసిద్ధి చెందింది. అయితే, దుబాయ్ గురించి తాజాగా సోషల్ మీడియాలో వైరల్ అవుతున్న ఒక వీడియో అందరినీ నోరెళ్లబెట్టేలా చేస్తోంది. దుబాయ్ బీచ్లను శుభ్రం చేసే ఒక క్లీనర్ షేర్ చేసిన ఈ వీడియో ప్రకారం.. అక్కడి బీచ్ ఇసుకలో సామాన్యులు ఊహించని రేంజ్లో ధనవంతులు కాగల అవకాశాలు దాగి ఉన్నాయట.
సాధారణంగా ఏ దేశంలోనైనా బీచ్ క్లీనర్లు పర్యాటకులు పడేసిన ప్లాస్టిక్ సీసాలు, ప్యాకెట్లు లేదా ఇతర చెత్తను సేకరిస్తారు. కానీ దుబాయ్ బీచ్లలో కథ వేరుగా ఉంది. సదరు క్లీనర్ ఇసుకను మెటల్ డిటెక్టర్ సహాయంతో, చేతులతో జల్లెడ పడుతున్నప్పుడు అతనికి దొరికిన వస్తువులు చూసి నెటిజన్లు షాక్ అవుతున్నారు. పర్యాటకులు బీచ్లలో ఆడుకునేటప్పుడు లేదా ఈత కొట్టేటప్పుడు మర్చిపోయిన, పోగొట్టుకున్న విలువైన వస్తువులు ఇసుకలో పూడిపోతున్నాయి.
అతనికి దొరికిన వస్తువులలో అచ్చమైన నెంబర్ వన్ క్వాలిటీ బంగారు గొలుసులు, బ్రాస్లెట్లు, విలువైన వజ్రాల (డైమండ్) ఉంగరాలు, ప్రపంచంలోనే అత్యంత ఖరీదైన రోలెక్స్ (Rolex) వంటి లగ్జరీ బ్రాండ్ల వాచీలు ఉన్నాయి. ఈ వీడియో సోషల్ మీడియా ప్లాట్ఫారమ్స్లో అప్లోడ్ చేసిన కొద్దిసేపటికే మిలియన్ల కొద్దీ వ్యూస్ సాధించింది. దుబాయ్ వైభవాన్ని చూసి నెటిజన్లు రకరకాలుగా స్పందిస్తున్నారు.
ఐటీ ఉద్యోగాలు వదిలేసి దుబాయ్ బీచ్లలో క్లీనర్ ఉద్యోగానికి వెళ్లడం బెటర్ ఏమో! అని కొందరు సరదాగా కామెంట్ చేస్తుంటే.. ధనవంతుల నగరంలో పోగొట్టుకునే వస్తువులు కూడా అంతే లగ్జరీగా ఉంటాయనడానికి ఇదే నిదర్శనం అని మరికొందరు అంటున్నారు.
అయితే దుబాయ్ చట్టాల ప్రకారం.. ఇలా దొరికిన విలువైన వస్తువులను నేరుగా సొంతం చేసుకోవడం నేరం. వాటిని స్థానిక పోలీసులకు లేదా బీచ్ అధికారులకు అప్పగించాల్సి ఉంటుంది. ఒకవేళ నిర్ణీత గడువులోగా వాటి యజమానులు రాకపోతే, చట్టప్రకారం వాటిని దొరికిన వారికే ఇస్తారు లేదా వేలం వేస్తారు. ఏదేమైనా, ఈ వైరల్ వీడియో మాత్రం దుబాయ్ రేంజ్ ఏంటో మరోసారి ప్రపంచానికి చాటిచెప్పింది.
మరిన్ని ట్రెండింగ్ న్యూస్ కోసం క్లిక్ చేయండి..