PM Modi in Telangana highlights: ‘కేసీఆర్ సర్కార్‌తో ప్రజలు జాగ్రత్తగా ఉండాలి..’ వరంగల్ సభలో ప్రధాని మోదీ..

దేశంలో, తెలంగాణలో కొన్ని పార్టీలు ఎన్నికలకు ముందు నుంచే అబద్దపు ప్రమాణాలు చేస్తున్నాయని ప్రధాని మోదీ అన్నారు. బీజేపీ అలాంటి ప్రమాణాలు చేయదని, రేషన్ ఇస్తామని చెప్తే ప్రతి ఇంటికీ రేషన్ బియ్యం వచ్చి చేరుతున్నాయని, ఆయుష్మాన్ భారత్ ఇస్తామని చెప్తే దేశంలోని కోట్ల మంది లబ్ధి పొందుతున్నారని పేర్కొన్నారు.

కాంగ్రెస్, బీఆర్ఎస్‌తో జాగ్రత్తగా ఉండాలని ప్రధాని మోదీ అన్నారు. వరంగల్ వేదికగా జరుగుతున్న విజయ సంకల్ప సభలో ప్రసంగిస్తున్న ఆయన ‘కాంగ్రెస్ అవినీతిని దేశం మొత్తం చూసింది, బీఆర్ఎస్ అవినీతిని తెలంగాణ మొత్తం చూసింది. బీఆరెఎస్ అయినా, కాంగ్రెస్ అయినా తెలంగాణకు హానికరమే. ఈ రెండు పార్టీల నుంచి జాగ్రత్తగా ఉండాల’ని పేర్కొన్నారు.

తెలంగాణలోని బీఆర్ఎస్ ప్రభుత్వం ఇప్పటివరకు నాలుగు పనులే చేసిందని ప్రధాని మోదీ అన్నారు. ‘మొదటిది ఉదయం నుంచి సాయంత్రం వరకు మోదీని తిట్టడం. రెండోది కుటుంబ పార్టీని పెట్టి పోషించడం. మూడోది తెలంగాణ ఆర్థిక వ్యవస్థను నాశనం చేయడం. నాలుగో పని తెలంగానను అవినీతిలో కూరుకుపోయేలా చేయడం. తెలంగాణలో అవినీతి లేని ప్రాజెక్ట్ లేదు. వీళ్ల అవినీతి దేశస్థాయికి చేరింది’ అని వరంగల్ బీజేపీ విజయ సంకల్ప సభలో మోదీ పేర్కొన్నారు.

ఆరు నూరైనా తెలంగాణ రాష్ట్రంలో బీజేపీ గెలవాల్సిందేనని హుజురాబాద్ ఎమ్మెల్యే, తెలంగాణ రాష్ట్ర ఎలెక్షన్ కమిటీ చైర్మన్ ఈటల రాజేందర్ అన్నారు. బీజేపీ, బీఆర్ఎస్ ఏ నాటికీ ఒక్కటి కాదని, సీఎం కేసీఆర్‌ని గద్దె దించడమే తమ లక్ష్యమని పేర్కొన్నారు.

వరంగల్‌ వేదికగా జరుగుతున్న బీజేపీ విజయ సంకల్ప సభలో ప్రధాని మోదీ తెలుగులో తన ప్రసంగించారు. ‘భద్రాకాళీ అమ్మవారి మహత్యానికి, సమక్క-సారలమ్మ పౌరుషానికి, రాణి రుద్రమ పరాక్రమానికి ప్రఖ్యాతి గాంచిన వరంగల్‌కి రావడం సంతోషంగా ఉంది’ అంటూ తన ప్రసంగాన్ని ప్రధాని మోదీ ప్రారంభించారు.

వరంగల్ హన్మకొండ వేదికగా జరుగుతున్న విజయ సంకల్ప సభలో బీజేపీ రాష్ట్ర అధ్యక్షుడు కిషన్ రెడ్డి.. బీఆర్ఎస్ పార్టీపై విమర్శలు గుప్పించారు. ఇంకా బీఆర్ఎస్, కాంగ్రెస్ పార్టీలు ఒక్కటేఅని, పొత్తు పెట్టుకుని అధికారంలోకి వచ్చిన చరిత్ర ఆ రెండు పార్టీలకు ఉందని.. బీజేపీకి అలాంటి చరిత్ర లేదని పేర్కొన్నారు. కేసీఆర్ ప్రజాధనాన్ని దోపిడీ చేసి రాష్ట్రాన్ని దివాలా తీశాడని, తాము ఖచ్చితంగా కల్వకుంట్ల కుటుంబంపై పోరాడతామని, ఆ కుటుంబాన్ని ఫామ్ హౌస్‌కి పరిమితం చేస్తామన్నారు.

వరంగల్ పర్యటనలో ప్రధాని మోదీ ‘తెలంగాణ ప్రజలందరికీ నా అభినందనలు’ అంటూ తెలుగులో మాట్లాడారు. ఇంకా దేశ అభివృద్ధిలో తెలంగాణ భాగస్వామ్యం ప్రముఖమైనదని, ఎన్నో పరిశ్రమలకు తెలంగాణ వేదికగా మారిందన్నారు.

వరంగల్ భద్రాకాళీ ఆలయంలో ప్రత్యేక పూజలు నిర్వహించిన ఆయన హన్మకొండ ఆర్ట్స్ కాలేజీ మైదానంలో ఏర్పాటు చేసిన విజయ సంకల్ప సభ సభాప్రాంగణానికి చేరుకున్నారు. అయితే ఆయన ఏమని ప్రసంగిస్తారనే దానిపై సర్వత్రా ఉత్కంఠ నెలకొంది.అభివృద్ధి గురించి మాట్లాడతారా.. బీఆర్ఎస్ ప్రభుత్వంపై విమర్శలు గుప్పిస్తారా..? అనేది ఇప్పుడు ఆసక్తికరంగా మారింది.

హైదరాబాద్ నుంచి నేరుగా వరంగల్ మామునూరు చేరుకున్న ప్రధాని మోదీ.. భద్రకాళీ అమ్మవారి ఆలయాన్ని సందర్శించారు. అక్కడ ప్రత్యేక పూజలు నిర్వహించి ఆర్ట్స్ కాలేజీ మైదానానికి చేరుకున్నారు.

దాదాపు 30 ఏళ్ల తర్వాత ఎట్టకేలకు ఓ భారత ప్రధాని ఓరుగల్లు భూమిపై కాలుమోపారు. వరంగల్‌లో పలు అభివృద్ధి కార్యక్రమాలను ప్రారంభించేందుకు విచ్చేసిన ప్రధాని మోదీ కొద్ది సేపటి క్రితమే వరంగల్ మామునూరుకి చేరుకున్నారు. అనంతరం భద్రకాళీ అమ్మవారి ఆలయంలో పూజలు నిర్వహించనున్నారు.

ప్రధాని మోదీ శుక్రవారం ఓరుగల్లులో పర్యటించనున్న సంగతి తెలిసిందే. పర్యటనలో భాగంగా ఆయన రూ.6,109 కోట్ల విలువైన అభివృద్ధి కార్యక్రమాలకు శ్రీకారం చుట్టనున్నారు. ఈ క్రమంలోనే ప్రతిష్ఠాత్మక వ్యాగన్ తయారీ పరిశ్రమ, ఇంకా పలు జాతీయ రహదారులకు భూమి పూజ చేస్తారు. అనంతరం వరంగల్‌ వేదికగా జరిగే విజయ సంకల్పసభలో పాల్గొంటారు.

హైదరాబాద్‌ హకీంపేట్‌ ఎయిర్‌ పోర్ట్‌కు ప్రత్యేక విమానంలో చేరుకున్న ప్రధాని.. అక్కడి నుంచి కాసేపటి కిత్రమే వరంగల్ బయలు దేరారు. మరికాసేపట్లో వరంగల్‌లోని మామునూరు చేరుకోనున్నారు.

ప్రధాని నరేంద్ర మోదీ తెలంగాణలో ల్యాండ్ అయ్యారు. హకీం ఎయిర్ పోర్ట్ కు చేరుకున్న మోదీ కాసేపట్లో వరంగల్ బయలుదేరి వెళ్లనున్నారు.