Hyderabad: 13 ఏళ్ల బాలుడిపై టీచర్ లైంగిక దాడి.. సంచలన తీర్పు ఇచ్చిన ఫాస్ట్‌ట్రాక్‌ కోర్టు!

Teacher Gets Life Imprisonment For Child Assault Case

హైదరాబాద్‌ పహాడీషరీఫ్‌ పోలీస్‌ స్టేషన్‌ పరిధిలో నమోదైన పోక్సో కేసులో నిందితుడికి న్యాయస్థానం యావజ్జీవ కారాగార శిక్ష విధించింది. ఎల్‌.బి.నగర్‌లోని రంగారెడ్డి జిల్లా రేప్‌, పోక్సో కేసుల విచారణ ప్రత్యేక ఫాస్ట్‌ట్రాక్‌ కోర్టు న్యాయమూర్తి 29-09-2026న తీర్పు వెలువరించారు. నేరం రుజువు కావడంతో నిందితుడు మహ్మద్‌ మునావర్‌ హుస్సేన్‌ (30)కు జీవిత ఖైదుతో పాటు రూ.25,500 జరిమానా విధించారు. అలాగే బాధితుడికి రూ.2 లక్షల నష్టపరిహారం అందించాలని న్యాయస్థానం ఆదేశించింది.

పహాడీషరీఫ్‌ పోలీస్‌ స్టేషన్‌లో 2025 జనవరి 4న ఈ కేసు నమోదైంది. బాధితుడు 13 ఏళ్ల బాలుడు కాగా.. మామిడిపల్లి గ్రామంలోని ఇస్లామియా కాషిఫుల్‌ ఉలూమ్‌ మదర్సాలో చదువుతున్నాడు. 2024 డిసెంబర్‌ 26న బాలుడు అనారోగ్యానికి గురికావడంతో కుటుంబ సభ్యులు అతడిని ఇంటికి తీసుకువచ్చారు. మరుసటి రోజు వైద్య పరీక్షలు నిర్వహించగా బాలుడి రహస్య అవయవాల వద్ద తీవ్రమైన ఇన్ఫెక్షన్‌ ఉన్నట్లు గుర్తించినట్లు పోలీసులు తెలిపారు.

ఈ క్రమంలో 2025 జనవరి 1న బాలుడు తన తల్లికి జరిగిన విషయాన్ని వెల్లడించాడు. మదర్సాలో టీచర్‌గా పనిచేస్తున్న నిందితుడు 2024 డిసెంబర్‌ 25న సాయంత్రం బాలుడిని వాహనంపై పహాడీషరీఫ్‌ రాజీవ్‌గాంధీనగర్‌లోని మసీద్‌-ఎ-రహమత్‌ ఉన్నీసా సమీపంలోని ఓ గదికి తీసుకెళ్లి లైంగిక దాడికి పాల్పడినట్లు బాలుడు తెలిపాడు. ఈ విషయాన్ని బయటకు చెబితే తీవ్ర పరిణామాలు ఉంటాయని బెదిరించినట్లు ఫిర్యాదులో పేర్కొన్నారు. రెండు రోజుల ముందు కూడా నిందితుడు ఇదే విధంగా ప్రవర్తించినట్లు బాలుడు వెల్లడించినట్లు పోలీసులు తెలిపారు.

బాధితుడి కుటుంబ సభ్యుల ఫిర్యాదు మేరకు పహాడీషరీఫ్‌ పోలీసులు కేసు నమోదు చేసి దర్యాప్తు చేపట్టారు. Cr.No.09/2025 కింద BNS సెక్షన్‌ 351(2), పోక్సో చట్టం 2012లోని సెక్షన్‌ 5(f)(l), 6 కింద కేసు నమోదు చేశారు. దర్యాప్తు అనంతరం నిందితుడిపై ఛార్జ్‌షీట్‌ దాఖలు చేసి, కోర్టులో ఆధారాలను సమర్థవంతంగా ప్రవేశపెట్టారు. కేసు విచారణలో ప్రాసిక్యూషన్‌ తరఫున అడిషనల్‌ పబ్లిక్‌ ప్రాసిక్యూటర్‌ కృష్ణ ప్రసన్న వాదనలు వినిపించారు. దీంతో నిందితుడిపై ఉన్న ఆరోపణలు నిజమని తేలడంతో కోర్టు అతనికి జీవితఖైదు వేస్తూ తీర్పు వెలువరించింది.

మరిన్ని తెలంగాణ వార్తల కోసం ఇక్కడ క్లిక్ చేయండి.