Khammam: రక్తసిక్తంగా మారిన బీఆర్ఎస్ ఆత్మీయ సమ్మేళనం.. ఒకరు మృతి.. మరికొందరికి తీవ్రగాయాలు..
ఖమ్మం జిల్లా కారేపల్లిలో బీఆర్ఎస్ ఆత్మీయ సమ్మేళనం రక్తసిక్తంగా మారింది. ఎమ్మెల్యే రాములూనాయక్‌, ఎంపీ నామా నాగేశ్వరరావు ఆధ్వర్యంలో జరుగుతున్న ఆత్మీయ సమ్మేళనంలో ఘోర ప్రమాదం చోటుచేసుకుంది.
ఖమ్మం జిల్లాలోని కారేపల్లిలో నిర్వహించిన బీఆర్ఎస్ ఆత్మీయ సమ్మేళనం రక్తసిక్తంగా మారింది. కారేపల్లి మండలం చీమలపాడులో బీఆర్ఎస్ కార్యకర్తల అత్యుత్సాహంతో ఘోర అగ్ని ప్రమాదం జరిగింది. ఎమ్మెల్యే రాములూనాయక్‌, ఎంపీ నామా నాగేశ్వరరావు ఆధ్వర్యంలో నిర్వహించిన బీఆర్ఎస్ ఆత్మీయ సమ్మేళనంలో కార్యకర్తలు బాణసంచా పేల్చడంతో ఓ గుడిసెపై పడి మంటలు అంటుకున్నాయి. గుడిసెకు అంటుకున్న మంటలు వ్యాపించి గ్యాస్ సిలిండర్ పేలడంతో ఒకరు మృతి చెందారు. పలువురు తీవ్రగాయాలపాలయ్యారు. గాయపడ్డ వారిలో స్థానికులు, కార్యకర్తలు, పోలీసులు, జర్నలిస్టులు ఉన్నట్లు పేర్కొంటున్నారు. గాయపడ్డవారిని హుటాహుటిన ఖమ్మం ప్రభుత్వాస్పత్రికి తరలించారు. ఒక్కసారిగా గ్యాస్ సిలిండర్ పేలడంతో మంటలు ఎగసిపడ్డాయి. అగ్నిప్రమాదంతో అక్కడున్నవారు ప్రాణాలు అరిచేతిలో పెట్టుకుని ఉరుకులు, పరుగులు తీశారు. ఘటనాస్థలంలో బీతావహ పరిస్థితులు నెలకొన్నాయి.
సీఎం కేసీఆర్ దిగ్భ్రాంతి..
ఖమ్మం జిల్లా కారేపల్లి మండలం చీమలపాడులో జరిగిన ఘోర ప్రమాదం పట్ల బిఆర్ఎస్ అధినేత సిఎం కె.చంద్రశేఖర్ రావు తీవ్ర దిగ్భ్రాంతిని, విచారాన్ని వ్యక్తం చేశారు. బిఆర్ఎస్ ఆత్మీయ సమ్మేళనంలో వూహించని రీతిలో సిలిండర్లు పేలి ఇద్దరు కార్యకర్తలు మరణించడం, పలువురికి తీవ్ర గాయాలు పాలయ్యారని తెలిసిన వెంటనే ఖమ్మం జిల్లా మంత్రి పువ్వాడ అజయ్ కి, ప్రమాదం జరిగిన ప్రాంతంలో వున్న ఎంపీ నామా నాగేశ్వర్ రావులకు ఫోన్లు చేసి ప్రమాదం వివరాలు తెలుసుకున్నారు. మరణించిన కార్యకర్తల కుటుంబాలను అన్ని విధాలా ఆదుకుంటామని సిఎం భరోసా ఇచ్చారు. తాము అండగా వుంటామని స్పష్టం చేశారు. క్షతగాత్రులకు మెరుగైన వైద్యసేవలందించాలని ఆదేశించారు.
Wyra
మరిన్ని తెలంగాణ వార్తల కోసం..