మెటా నుంచి ఏకంగా 16000 మంది ఇంటికి! ఇంత భారీ లేఆఫ్స్‌కు కారణం?

Tech Layoffs

ఈ సంవత్సరం ఐటీ రంగానికి గట్టి దెబ్బ తగిలినట్టే కనిపిస్తోంది. ప్రపంచవ్యాప్తంగా ప్రముఖ టెక్ కంపెనీలు భారీ స్థాయిలో ఉద్యోగ కోతలను ప్రకటించడం, ఈ రంగంలో పని చేస్తున్న వేలాది మంది నిపుణులకు ఆందోళన కలిగిస్తోంది. ముఖ్యంగా సోషల్ మీడియా దిగ్గజం మెటా మరోసారి పెద్ద ఎత్తున ఉద్యోగులను తొలగించేందుకు సిద్ధమవడం పరిశ్రమలో చర్చనీయాంశంగా మారింది. అంతర్జాతీయ మీడియా నివేదికల ప్రకారం మెటా రాబోయే నెలల్లో సుమారు 16,000 మంది ఉద్యోగులను తొలగించే ప్రణాళికలో ఉంది. ఇందులో భాగంగా మే 20 నుంచి ప్రారంభమయ్యే మొదటి దశలోనే దాదాపు 8,000 మంది ఉద్యోగులు ప్రభావితం కానున్నారు. గత ఏడాది చివరికి కంపెనీలో సుమారు 79,000 మంది పనిచేస్తుండగా, ఇప్పుడు భారీ పునర్వ్యవస్థీకరణ చేపట్టడం గమనార్హం.

ఈ నిర్ణయానికి ప్రధాన కారణంగా AI ఎదుగుదల చెప్పబడుతోంది. కంపెనీ అధినేత మార్క్‌ జూకర్‌బర్గ్‌ AI, జనరేటివ్ టూల్స్, మెషిన్ లెర్నింగ్ పై ఎక్కువ దృష్టి పెట్టడం వల్ల, అనేక సాఫ్ట్‌వేర్ ప్రక్రియలను ఆటోమేట్ చేయడం ప్రారంభమైంది. దీంతో మానవ వనరుల అవసరం తగ్గిపోతుండటం ఉద్యోగ కోతలకు దారితీస్తోంది. ఇదే ధోరణి ఇతర రంగాలకూ విస్తరించింది. వినోద రంగ దిగ్గజం వాల్ట్ డిస్నీ కంపెనీ కూడా సుమారు 1,000 మంది ఉద్యోగులను తొలగించనున్నట్లు ప్రకటించింది. ఈ నిర్ణయాన్ని జోష్ డి’అమారో వెల్లడించగా, సంస్థలో ఇది అతిపెద్ద మార్పుల్లో ఒకటిగా భావిస్తున్నారు. ముఖ్యంగా మార్వెల్ స్టూడియోస్ విభాగంపై దీని ప్రభావం ఎక్కువగా పడింది.

ఇక అమెరికాకు చెందిన ప్రముఖ ఐటీ సంస్థ ఒరాకిల్ కార్పొరేషన్ కూడా ప్రపంచవ్యాప్తంగా 30,000 మంది ఉద్యోగులను తొలగించినట్లు సమాచారం. ఇందులో భారత్‌లోనే దాదాపు 12,000 మంది ఉన్నారు. తొలగింపుల తర్వాత ఉద్యోగులకు సెవరెన్స్ ప్యాకేజీ పొందాలంటే డాక్యుసైన్ ద్వారా పంపిన పత్రాలపై సంతకం చేయాల్సిన నిబంధన వివాదాస్పదంగా మారింది. టెక్ రంగంలో ఈ సంక్షోభం ఎంత తీవ్రమైందో Layoffs.fyi గణాంకాలు చెబుతున్నాయి. ఈ ఏడాది ఇప్పటివరకు 73,000 మందికి పైగా టెక్ ఉద్యోగులు తమ ఉద్యోగాలను కోల్పోయినట్లు ఆ వెబ్‌సైట్ వెల్లడించింది. మొత్తంగా చూస్తే, టెక్నాలజీ మార్పులు, ఖర్చుల నియంత్రణ, ఆటోమేషన్ పెరుగుదల కలిసి ఐటీ ఉద్యోగాల భవిష్యత్తుపై ప్రశ్నలు లేవనెత్తుతున్నాయి.

మరిన్ని టెక్‌ వార్తల కోసం ఇక్కడ క్లిక్‌ చేయండి