ఇన్స్టాగ్రామ్ యూజర్లకు బిగ్ అలర్ట్.. కీలక ఫీచర్ నిలిపివేస్తున్న కంపెనీ! ఎందుకంటే?
ఇన్స్టాగ్రామ్ తన ఎండ్-టు-ఎండ్ ఎన్క్రిప్టెడ్ మెసేజింగ్ ఫీచర్ను మే 8, 2026 నుండి తొలగిస్తోంది. దీంతో యూజర్ల గోప్యత తగ్గుతుంది. ప్రభుత్వం, రెగ్యులేటరీ సంస్థల ఒత్తిడి కారణంగా ఈ నిర్ణయం తీసుకున్నట్లు నిపుణులు భావిస్తున్నారు. మీ ప్రస్తుత చాట్లను డౌన్లోడ్ చేసుకోవడానికి మెటా అవకాశం కల్పిస్తోంది.
ప్రపంచవ్యాప్తంగా విస్తృతంగా ఉపయోగించే ఫోటో-వీడియో షేరింగ్ ప్లాట్ఫామ్ ఇన్స్టాగ్రామ్ తన ఎండ్-టు-ఎండ్ ఎన్క్రిప్టెడ్ మెసేజింగ్ ఫీచర్ను నిలిపివేస్తున్నట్లు ప్రకటించింది. ఈ మార్పు 2026 మే 8 నుంచి అమల్లోకి వస్తుంది. దీంతో యూజర్లు ఇకపై యాప్లో ఎన్క్రిప్టెడ్ చాట్లను ఉపయోగించలేరు. ఈ విషయాన్ని మెటా తన తాజా బ్లాగ్ పోస్ట్లో ధృవీకరించింది. ఎండ్-టు-ఎండ్ ఎన్క్రిప్షన్ ఫీచర్ను ఇన్స్టాగ్రామ్ డిసెంబర్ 2023లో ప్రవేశపెట్టింది. ఈ సదుపాయం ద్వారా పంపిన సందేశాలను పంపిన వ్యక్తి, స్వీకరించిన వ్యక్తి మాత్రమే చదవగలరు. మధ్యలో ఎవరూ వాటిని చూడలేరు. అయితే ఈ ఫీచర్ తొలగించబడటంతో, ఇన్స్టాగ్రామ్ చాట్లలో ఉన్న అదనపు గోప్యతా రక్షణ తగ్గే అవకాశం ఉంది.
ఎన్క్రిప్షన్ ఫీచర్ పూర్తిగా తొలగించబడే ముందు, తమ ప్రస్తుత చాట్లు, మీడియాను డౌన్లోడ్ చేసుకునే అవకాశం యూజర్లకు ఇస్తున్నట్లు మెటా తెలిపింది. యాప్లోనే ఇందుకు సంబంధించిన సూచనలు కనిపిస్తాయి. అయితే చాలా కాలంగా యాప్ను అప్డేట్ చేయని యూజర్లు ముందుగా తాజా వెర్షన్కు అప్డేట్ చేయాల్సి ఉండొచ్చు. ఎన్క్రిప్టెడ్ మెసేజింగ్ను ఎందుకు తొలగిస్తున్నారనే విషయంపై మెటా పూర్తి వివరణ ఇవ్వలేదు. అయితే ప్రపంచవ్యాప్తంగా ప్రభుత్వాలు మరియు నియంత్రణ సంస్థలు ఆన్లైన్ భద్రతపై ఒత్తిడి పెంచుతున్నాయి. ముఖ్యంగా పిల్లల దోపిడీ లేదా చట్టవిరుద్ధ కంటెంట్ ఎన్క్రిప్టెడ్ ప్లాట్ఫారమ్ల ద్వారా వ్యాప్తి చెందుతున్నాయనే ఆందోళనలు వ్యక్తమవుతున్నాయి.
ఈ నేపథ్యంలో కొన్ని దేశాలు సోషల్ మీడియా కంపెనీలపై కఠినమైన నియంత్రణలను అమలు చేస్తున్నాయి. ఉదాహరణకు యూరప్లో ప్రతిపాదించిన EU చాట్ కంట్రోల్ రెగ్యులేషన్, బ్రిటన్లో అమల్లో ఉన్న ఆన్లైన్ సెఫ్టీ యాక్ట్ 2023 వంటి చట్టాలు హానికరమైన కంటెంట్ను గుర్తించి తొలగించేందుకు టెక్ కంపెనీలను బాధ్యత వహించాల్సిందిగా కోరుతున్నాయి. ఈ కొత్త నిబంధనలను అమలు చేయడం సులభం కావడానికి ఇన్స్టాగ్రామ్లో ఎన్క్రిప్టెడ్ చాట్లను నిలిపివేయాలని మెటా నిర్ణయించినట్లు నిపుణులు భావిస్తున్నారు.
మరిన్ని టెక్ వార్తల కోసం ఇక్కడ క్లిక్ చేయండి