పొరపాటున ఇంపార్టెంట్ ఫొటోలు డిలీట్ చేశారా? వాటిని ఎలా పొందాలంటే?
అనుకోకుండా ఫోటోలు, వీడియోలు డిలీట్ చేశారా? ఆందోళన వద్దు! అవి వెంటనే శాశ్వతంగా తొలగిపోవు. సరైన చర్యలతో వాటిని తిరిగి పొందవచ్చు. డిలీట్ అయిన వెంటనే కొత్త డేటా రాకుండా చూసుకోండి. ‘రీసెంట్లీ డిలీటెడ్’ ఫోల్డర్, క్లౌడ్ బ్యాకప్లు, రికవరీ సాఫ్ట్వేర్ లేదా నిపుణుల సహాయంతో మీ విలువైన ఫైళ్లను సురక్షితంగా వెనక్కి తీసుకురావచ్చు.
పొరపాటున ఫోటోలు లేదా వీడియోలను తొలగించడం అనేది చాలా మందికి ఎదురయ్యే సాధారణ సమస్యగా మారింది. అయితే ఈ ఫైళ్లు శాశ్వతంగా వెంటనే చెరిగిపోవని, సరైన సమయంలో సరైన చర్యలు తీసుకుంటే వాటిని తిరిగి పొందడం సాధ్యమని నిపుణులు చెబుతున్నారు. ఫైల్ను డిలీట్ చేసినప్పుడు, అది పూర్తిగా తొలగించబడకుండా, స్టోరేజ్లోని స్థలం మాత్రమే ఖాళీగా గుర్తించబడుతుంది. ఈ సమయంలో కొత్త డేటా దానిపై రాసుకుపోయే ముందు చర్యలు తీసుకుంటే రికవరీ అవకాశాలు ఎక్కువగా ఉంటాయి.
అందుకే ఫైళ్లు డిలీజ్ చేసిన వెంటనే కొత్త ఫోటోలు తీయడం, యాప్లు ఇన్స్టాల్ చేయడం లేదా ఫైళ్లను డౌన్లోడ్ చేయడం వంటి చర్యలను నివారించడం అవసరం. మొదటగా పరికరంలో ఉన్న ‘రీసెంట్లీ డిలీటెడ్’ లేదా ‘రీసైకిల్ బిన్’ ఫోల్డర్ను పరిశీలించడం ఉత్తమం. సాధారణంగా ఈ ఫోల్డర్లో ఫైళ్లు 30 రోజుల వరకు నిల్వ ఉంటాయి. అక్కడి నుంచి ఒకే క్లిక్తో వాటిని తిరిగి పొందవచ్చు.
క్లౌడ్ బ్యాకప్ సేవలు కూడా డేటా రికవరీలో కీలక పాత్ర పోషిస్తాయి. గూగుల్ ఫొటోలు లేదా యాపిల్ ఫొటోలు వంటి ప్లాట్ఫారమ్లు ఆటోమేటిక్గా ఫోటోలు, వీడియోలను ఆన్లైన్లో నిల్వ చేస్తాయి. పరికరం నుండి తొలగించినా, క్లౌడ్ ట్రాష్లో అవి ఇంకా అందుబాటులో ఉండే అవకాశం ఉంది. ఇవన్నీ పనిచేయనప్పుడు, విశ్వసనీయమైన డేటా రికవరీ సాఫ్ట్వేర్ను జాగ్రత్తగా ఉపయోగించవచ్చు. అయితే అనుమానాస్పద యాప్లను ఉపయోగించడం మరింత ప్రమాదకరం కావచ్చు. అవసరమైతే నిపుణుల సేవలను ఆశ్రయించడం మంచిది. మొత్తం మీద క్రమం తప్పకుండా బ్యాకప్లు తీసుకోవడం, జాగ్రత్తగా వ్యవహరించడం ద్వారా డేటా నష్టాన్ని నివారించవచ్చని నిపుణులు సూచిస్తున్నారు.
మరిన్ని టెక్ వార్తల కోసం ఇక్కడ క్లిక్ చేయండి