Whatsapp Usernames: యూజర్నేమ్స్ ఇస్తోన్న వాట్సాప్.. మీ యూజర్నేమ్ను ఎలా తీసుకోవాలో తెలుసుకోండి!
వాట్సాప్ తన యూజర్నేమ్ రిజర్వేషన్ ఫీచర్ను ప్రపంచవ్యాప్తంగా ప్రారంభించింది. దీనితో వినియోగదారులు తమ ఫోన్ నంబర్ను పంచుకోకుండానే ఇతరులతో కనెక్ట్ అవ్వొచ్చు. ప్రైవసీని పెంపొందించే ఈ ఫీచర్ ముఖ్యంగా గ్రూపులలో, లావాదేవీలలో వ్యక్తిగత సమాచారాన్ని గోప్యంగా ఉంచాలనుకునే వారికి ఎంతో ఉపయోగపడుతుంది.
వినియోగదారుల ప్రైవసీని మరింత బలోపేతం చేసే దిశగా వాట్సాప్ మరో కీలక ఫీచర్ను తీసుకొచ్చింది. మెటా యాజమాన్యంలోని ఈ ప్రముఖ మెసేజింగ్ ప్లాట్ఫామ్ ప్రపంచవ్యాప్తంగా యూజర్నేమ్ రిజర్వేషన్ ఫీచర్ను దశలవారీగా ప్రారంభించింది. ఈ ఫీచర్ పూర్తిస్థాయిలో అందుబాటులోకి వచ్చిన తర్వాత, ఫోన్ నంబర్ను పంచుకోకుండానే ఇతరులతో కనెక్ట్ అయ్యే అవకాశం వినియోగదారులకు లభించనుంది. ఇప్పటి వరకు వాట్సాప్లో కొత్త వ్యక్తితో చాట్ ప్రారంభించాలంటే తప్పనిసరిగా మొబైల్ నంబర్ను షేర్ చేయాల్సి వచ్చేది. దీంతో ఫోన్ నంబరే వినియోగదారుడి ప్రధాన గుర్తింపుగా ఉండేది. కొత్త అప్డేట్తో ఇకపై ప్రతి వినియోగదారుడు ఒక ప్రత్యేకమైన యూజర్నేమ్ను ఎంచుకుని, అదే ఆధారంగా ఇతరులతో సంభాషించవచ్చు. దీంతో వ్యక్తిగత మొబైల్ నంబర్ను వెల్లడించాల్సిన అవసరం తగ్గనుంది.
వాట్సాప్ తెలిపిన వివరాల ప్రకారం.. వ్యక్తిగత వివరాలను గోప్యంగా ఉంచాలనుకునే వినియోగదారులను దృష్టిలో పెట్టుకుని ఈ ఫీచర్ను రూపొందించింది. ముఖ్యంగా కాలనీల వాట్సాప్ గ్రూపులు, పాఠశాల పేరెంట్స్ గ్రూపులు, స్థానిక క్లబ్లు, కొనుగోలు-అమ్మకాల లావాదేవీలు, ఈవెంట్లలో కొత్తగా పరిచయమైన వ్యక్తులతో సంప్రదింపులు కొనసాగించేందుకు ఇది మరింత ఉపయోగకరంగా ఉంటుందని కంపెనీ పేర్కొంది. ఈ ఫీచర్ను ఉపయోగించాలంటే ముందుగా వాట్సాప్ను తాజా వెర్షన్కు అప్డేట్ చేయాలి. అనంతరం Settings > Account > Username విభాగంలోకి వెళ్లి, అందుబాటులో ఉన్న ప్రత్యేకమైన యూజర్నేమ్ను ఎంపిక చేసుకోవచ్చు. వినియోగదారుడు కోరుకున్న పేరు ఇప్పటికే వేరొకరు ఉపయోగిస్తుంటే, ప్రత్యామ్నాయ పేర్లను సూచించే అంతర్నిర్మిత యూజర్నేమ్ జనరేటర్ను కూడా వాట్సాప్ అందుబాటులోకి తీసుకొచ్చింది.
ఇటీవలి కాలంలో వాట్సాప్ గోప్యతకు ప్రాధాన్యం ఇస్తూ అనేక కొత్త ఫీచర్లను విడుదల చేస్తోంది. ఇప్పటికే అధునాతన చాట్ ప్రైవసీ, అవాంఛిత సందేశాలపై నియంత్రణ, వినియోగదారులను ఎవరు సంప్రదించవచ్చనే అంశాల్లో పలు మార్పులు తీసుకొచ్చిన కంపెనీ, ఇప్పుడు యూజర్నేమ్ వ్యవస్థను ప్రవేశపెట్టడం ద్వారా మరో కీలక అడుగు వేసింది. ఈ ఫీచర్ ఈ ఏడాది చివరి నాటికి ప్రపంచవ్యాప్తంగా అన్ని అర్హత కలిగిన వినియోగదారులకు అందుబాటులోకి వచ్చే అవకాశం ఉందని సమాచారం. ఫోన్ నంబర్ను బహిర్గతం చేయకుండా ఇతరులతో సురక్షితంగా కమ్యూనికేట్ చేయాలనుకునే వారికి ఈ అప్డేట్ మరింత ఉపయోగకరంగా మారనుంది.
మరిన్ని టెక్ వార్తల కోసం ఇక్కడ క్లిక్ చేయండి