Paris Olympics: అస్సాం వీధుల నుంచి ఒలింపిక్స్ వరకు.. పారిస్‌లో బంగారు పతకంపై కన్నేసిన రైతు బిడ్డ..

Lovlina Borgohain

Boxer Lovlina Borgohain: క్రీడల మహాకుంభం అంటే ఒలింపిక్స్ 2024 జులై 26 నుంచి ప్రారంభం కానుంది. ప్రతిసారీలాగే ఈసారి కూడా ఒలింపిక్స్‌పై అభిమానులు చాలా ఉత్సాహంగా కనిపిస్తున్నారు. ఈసారి పారిస్‌లో ఆటగాళ్లు ఇప్పటివరకు అత్యుత్తమ ప్రదర్శన ఇస్తారని భారత్ భావిస్తోంది. ఈ క్రీడాకారిణులలో బాక్సర్ లోవ్లినా బోర్గోహైన్ పేరు కూడా చేరింది. ఆమె పతకాన్ని గెలుచుకున్న అతిపెద్ద పోటీదారులలో ఒకరిగా మారింది. లోవ్లినా బోర్గోహైన్ గత ఒలింపిక్స్‌లో భారత్‌కు కాంస్య పతకాన్ని అందించింది. కాబట్టి, ఈసారి కూడా కోట్లాది మంది దేశప్రజలు ఆమెపై ఎన్నో అంచనాలు పెట్టుకున్నారు.

బాక్సర్‌గా మారిన రైతు బిడ్డ..

భారత స్టార్ బాక్సర్ లోవ్లినా అస్సాంకు చెందినది. గోలాఘాట్ జిల్లాలోని మారుమూల గ్రామమైన బరోముఖియాలో 1997 అక్టోబర్ 2న జన్మించారు. మేరీ కోమ్ అడుగుజాడల్లో లోవ్లినా బోర్గోహైన్ భారతీయ బాక్సింగ్‌లో మహిళల వారసత్వాన్ని ముందుకు తీసుకువెళ్లింది. ఆమె నిరుపేద కుటుంబం నుంచి వచ్చింది. తన తండ్రి వ్యవసాయం చేస్తుంటాడు. లోవ్లినాకు ఇద్దరు అక్కలు కూడా ఉన్నారు. ముగ్గురు సోదరీమణులు ముయే థాయ్ (కిక్-బాక్సింగ్)తో వారి క్రీడా జీవితాన్ని ప్రారంభించింది. ఆ తర్వాత కోచ్ సలహా మేరకు లోవ్లీనా బాక్సింగ్ ప్రారంభించి అందులో తనదైన ముద్ర వేసింది.

టోక్యో ఒలింపిక్స్‌లో చరిత్ర సృష్టించిన లోవ్లినా..

టోక్యో ఒలింపిక్స్ 2020లో, మేరీ కోమ్, విజేందర్ సింగ్‌ల వారసత్వాన్ని ముందుకు తీసుకువెళుతున్న లోవ్లినా బోర్గోహైన్, మహిళల వెల్టర్‌వెయిట్ విభాగంలో (69 కిలోలు) కాంస్య పతకాన్ని గెలుచుకుంది. దీంతో ఒలింపిక్ పతకం సాధించిన మూడో భారత బాక్సర్‌గా నిలిచింది. ఆ తరువాత, 2023 సంవత్సరంలో, లోవ్లినా మహిళల మిడిల్ వెయిట్ (75 కిలోలు) విభాగంలో ప్రపంచ ఛాంపియన్‌గా నిలిచి దేశానికి కీర్తిని తెచ్చిపెట్టింది.

లోవ్లినా బోర్గోహైన్ విజయాలు..

లోవ్లినా తన బాక్సింగ్ కెరీర్‌ను 2012లో ప్రారంభించింది. ఆ తర్వాత 16 ఏళ్ల వయసులో జూనియర్ నేషనల్ ఛాంపియన్‌షిప్‌ను గెలుచుకుంది. ఆ తర్వాత ఇండియా ఓపెన్‌లో బంగారు పతకం సాధించింది. ఆ తర్వాత, లోవ్లినా వెనుదిరిగి చూడలేదు. ఇప్పటివరకు ఆమె 1 ఒలింపిక్ పతకం, 3 ప్రపంచ ఛాంపియన్‌షిప్ పతకాలు, 2 ఆసియా ఛాంపియన్‌షిప్ పతకాలు, 1 ఆసియా క్రీడల పతకాన్ని గెలుచుకుంది.

లోవ్లినా బోర్గోహైన్ ఇప్పటివరకు గెలిచిన పతకాలు..

టోక్యో 2020 ఒలింపిక్స్ – కాంస్య పతకం (2021)

ప్రపంచ ఛాంపియన్‌షిప్‌లు – బంగారు పతకం (2023), కాంస్య పతకం (2018, 2019)

ఆసియా ఛాంపియన్‌షిప్‌లు – బంగారు పతకం (2022), కాంస్య పతకం (2017, 2021)

ఆసియా క్రీడలు – రజత పతకం (2023)

గతేడాది ప్రపంచ ఛాంపియన్‌షిప్‌లో స్వర్ణం..

గతేడాది మహిళల ప్రపంచ బాక్సింగ్ ఛాంపియన్‌షిప్‌లో లోవ్లినా బోర్గోహైన్ తొలిసారిగా స్వర్ణ పతకాన్ని గెలుచుకుంది. ప్రపంచ బాక్సింగ్ ఛాంపియన్‌షిప్‌లో ఆస్ట్రేలియాకు చెందిన కైట్లిన్ పార్కర్‌ను 5-2తో ఓడించి తొలిసారి స్వర్ణ పతకాన్ని గెలుచుకుంది. 75 కేజీల విభాగంలో దేశానికి బంగారు పతకాన్ని అందించింది. ఇలాంటి పరిస్థితుల్లో పారిస్ ఒలింపిక్స్‌లో అందరి చూపు ఆమెపైనే ఉండనుంది. ఒలింపిక్స్ చరిత్రలో బాక్సింగ్‌లో భారత్ ఇప్పటి వరకు మొత్తం 3 కాంస్య పతకాలను గెలుచుకుంది. లోవ్లినా నుంచి బాక్సింగ్‌లో తొలి స్వర్ణ పతకంపై భారత్ ఆశలు పెట్టుకుంది.

అవార్డులు..

టోక్యో ఒలింపిక్స్ కాంస్య పతక విజేత లోవ్లినా బోర్గోహైన్ బాక్సింగ్‌లో అద్భుత ప్రదర్శన చేసినందుకు అర్జున అవార్డును అందుకుంది. ఆ తర్వాత 2021లో భారతదేశ అత్యున్నత క్రీడా గౌరవం, మేజర్ ధ్యాన్ చంద్ ఖేల్ రత్న అవార్డుతో కూడా సత్కరించారు. అదే సంవత్సరంలో, లోవ్లినా అస్సాం ప్రభుత్వంచే అస్సాం రెండవ అత్యున్నత పౌర పురస్కారమైన అస్సాం సౌరవ్‌ను అందుకుంది.

మరిన్ని క్రీడా వార్తల కోసం ఇక్కడ క్లిక్ చేయండి..