WPL 2026: వరుసగా 3 బంతుల్లో 3 వికెట్లు.. కట్చేస్తే.. హ్యాట్రిక్ మాత్రం కాదండోయ్.. ఎందుకంటే?
RCB vs UP Warriorz: తొలి మ్యాచ్లో ముంబై ఇండియన్స్పై ఘనవిజయం సాధించిన RCB, ఈ మ్యాచ్లో కూడా బౌలింగ్లో సత్తా చాటింది. కేవలం 8 బంతుల్లో 4 వికెట్లు తీసి యూపీ బ్యాటర్లను భయపెట్టిన తీరు సోషల్ మీడియాలో వైరల్ అవుతోంది. శ్రేయాంక పాటిల్, నడిన్ డి క్లెర్క్ ద్వయం RCBకి ఈ సీజన్లో ప్రధాన బలంగా మారారు.
RCB vs UP Warriorz: మహిళా ప్రీమియర్ లీగ్ (WPL) 2026 సీజన్ అభిమానులకు కావాల్సినంత వినోదాన్ని అందిస్తోంది. నవీ ముంబైలోని డివై పాటిల్ స్టేడియంలో రాయల్ ఛాలెంజర్స్ బెంగళూరు వర్సెస్ యూపీ వారియర్స్ మధ్య జరిగిన మ్యాచ్లో ఒక అద్భుత దృశ్యం చోటుచేసుకుంది. వరుసగా మూడు బంతుల్లో మూడు వికెట్లు పడగొట్టి RCB బౌలర్లు శ్రేయాంక పాటిల్, నడిన్ డి క్లెర్క్ ప్రత్యర్థి జట్టును కోలుకోలేని దెబ్బ తీశారు. అయితే ఇది హ్యాట్రిక్ ఎందుకు కాలేదో ఇప్పుడు తెలుసుకుందాం..
వరుసగా 3 బంతుల్లో 3 వికెట్లు.. కానీ హ్యాట్రిక్ కాదు..!
ముంబై వేదికగా జరిగిన ఈ ఉత్కంఠ పోరులో యూపీ వారియర్స్ ఇన్నింగ్స్ ఎనిమిది, తొమ్మిదో ఓవర్లలో ఊహించని మలుపు తిరిగింది. 8వ ఓవర్ చివరి బంతికి సెట్ బ్యాటర్ ఫోబ్ లిచ్ఫీల్డ్ (20)ను శ్రేయాంక పాటిల్ అవుట్ చేసింది. ఆ తర్వాత 9వ ఓవర్ వేయడానికి వచ్చిన నడిన్ డి క్లెర్క్ తన మొదటి రెండు బంతులకు కిరణ్ నవ్గిరే, శ్వేతా సెహ్రావత్లను వరుసగా పెవిలియన్ పంపింది.
నిజానికి ఇక్కడ వరుసగా మూడు బంతుల్లో మూడు వికెట్లు పడ్డాయి. కానీ, ఇద్దరు వేర్వేరు బౌలర్లు రెండు వేర్వేరు ఓవర్లలో ఈ వికెట్లు తీయడంతో దీనిని ‘టీమ్ హ్యాట్రిక్’గా పరిగణించినా, వ్యక్తిగత హ్యాట్రిక్ రికార్డు నమోదు కాలేదు.
కుప్పకూలిన యూపీ వారియర్స్: టాస్ గెలిచి ఫీల్డింగ్ ఎంచుకున్న RCB కెప్టెన్ స్మృతి మంధాన నమ్మకాన్ని బౌలర్లు నిలబెట్టారు. ముఖ్యంగా ఎనిమిది బంతుల వ్యవధిలో యూపీ వారియర్స్ నాలుగు కీలక వికెట్లు కోల్పోయి 50/5 స్కోరుతో కష్టాల్లో పడింది. మెగ్ లానింగ్ (14) కూడా శ్రేయాంక పాటిల్ బౌలింగ్లోనే రాధా యాదవ్కు క్యాచ్ ఇచ్చి వెనుదిరిగింది.
దీప్తి శర్మ, డాటిన్ పోరాటం: ఒక దశలో 100 పరుగులు కూడా దాటదు అనుకున్న యూపీ స్కోరును దీప్తి శర్మ (45*), డియాండ్రా డాటిన్ (36) ఆదుకున్నారు. వీరిద్దరూ ఆరో వికెట్కు విలువైన భాగస్వామ్యాన్ని జోడించడంతో యూపీ వారియర్స్ నిర్ణీత 20 ఓవర్లలో 143/5 గౌరవప్రదమైన స్కోరు చేయగలిగింది. శ్రేయాంక పాటిల్ వేసిన చివరి ఓవర్లో 15 పరుగులు రావడంతో యూపీకి మంచి ఫినిషింగ్ లభించింది.
బౌలింగ్ గణాంకాలు:
శ్రేయాంక పాటిల్: 4 ఓవర్లలో 50 పరుగులు ఇచ్చి 2 వికెట్లు తీసింది.
నడిన్ డి క్లెర్క్: 4 ఓవర్లలో కేవలం 28 పరుగులు ఇచ్చి 2 కీలక వికెట్లు పడగొట్టింది.
లారెన్ బెల్: తన 4 ఓవర్ల కోటాలో కేవలం 16 పరుగులు ఇచ్చి 1 వికెట్ తీసి కట్టుదిట్టంగా బౌలింగ్ చేసింది.
మరిన్ని క్రికెట్ వార్తల కోసం ఇక్కడ చూడండి..