వైభవ్ చేతికి రూ. 21 లక్షల కార్.. కట్‌చేస్తే.. మరో 3 ఏళ్లు టచ్ కూడా చేయలేడుగా.. ఎందుకో తెలుసా?

Vaibhav Sooryavanshi Won Car In Ipl

Vaibhav Sooryavanshi won car in IPL: ఐపీఎల్ 2026 సీజన్‌లో తన సంచలన బ్యాటింగ్‌తో ప్రపంచ క్రికెట్‌ను షేక్ చేసిన 15 ఏళ్ల బీహార్ సంచలనం వైభవ్ సూర్యవంశీ సరికొత్త రికార్డులు సృష్టించాడు. టోర్నీ ముగిసిన తర్వాత అతను ఎన్నో ప్రతిష్టాత్మక అవార్డులతో పాటు ఒక లగ్జరీ కారును బహుమతిగా గెలుచుకున్నాడు. అయితే, ఇక్కడే ఒక విచిత్రమైన పరిస్థితి తలెత్తింది. ఆ కారును అతను ఇప్పట్లో నడపలేడు.

అవార్డుల పంట.. కాసుల వర్షం..

ఈ ఏడాది ఐపీఎల్ ఫైనల్‌లో రాయల్ ఛాలెంజర్స్ బెంగళూరు జట్టు వరుసగా రెండోసారి ట్రోఫీని గెలుచుకుని చరిత్ర సృష్టించినప్పటికీ, టోర్నీ మొత్తానికి అసలైన ఆకర్షణగా నిలిచింది మాత్రం రాజస్థాన్ రాయల్స్ యువ ఆటగాడు వైభవ్ సూర్యవంశీనే. ఈ 15 ఏళ్ల వయసులోనే పెద్ద పెద్ద బౌలర్లను వణకిస్తూ 16 ఇన్నింగ్స్‌ల్లో ఏకంగా 776 పరుగులు సాధించాడు. అదీ కూడా ఊహకందని విధంగా 237.31 స్ట్రైక్ రేట్‌తో పరుగుల విధ్వంసం సృష్టించాడు.

దీంతో బీసీసీఐ అతనికి అత్యధిక పరుగులు చేసినందుకు ‘ఆరెంజ్ క్యాప్’ అందించింది. దాంతో పాటు టోర్నీ అత్యుత్తమ ఆటగాడు (MVP), ఎమర్జింగ్ ప్లేయర్ ఆఫ్ ది ఇయర్, సీజన్ సూపర్ సిక్సర్లు, ఫాంటసీ కింగ్ వంటి ప్రతిష్టాత్మక అవార్డులను కైవసం చేసుకున్నాడు. ఈ అవార్డుల రూపంలో అతనికి రూ. 65 లక్షల నగదు బహుమతితో పాటు, సీజన్ సూపర్ స్ట్రైకర్‌గా నిలిచినందుకు లీగ్ ప్రాయోజిత సంస్థ ఒక విలాసవంతమైన సరికొత్త కారును బహుమతిగా ఇచ్చింది.

కారు ఉంది.. కానీ నడిపే హక్కు లేదు..!

రూ. 1.10 కోట్ల ఐపీఎల్ జీతంతో పాటు కోట్లలో నగదు, కారు సంపాదించిన ఈ బాల మేధావికి భారత చట్టాల ప్రకారం ఒక చిన్న చిక్కు వచ్చి పడింది. వైభవ్ సూర్యవంశీ వయసు ప్రస్తుతం కేవలం 15 ఏళ్లు మాత్రమే. భారతదేశంలో మోటారు వాహనాల చట్టం ప్రకారం కార్లు లేదా ఫోర్ వీల్స్ నడపడానికి డ్రైవింగ్ లైసెన్స్ రావాలంటే కనీసం 18 ఏళ్ల వయసు నిండాలి.

16 ఏళ్లు నిండిన వారికి కేవలం గేర్లు లేని చిన్న ద్విచక్ర వాహనాలను నడుపుకునేందుకు మాత్రమే అనుమతి ఉంటుంది. అందువల్ల, మైదానంలో ఎంతటి వేగవంతమైన బౌలర్లనైనా ఎదుర్కొని సిక్సర్ల వర్షం కురిపించిన ఈ క్రికెట్ వీరుడు, చట్టబద్ధంగా తను గెలుచుకున్న కారును రోడ్డుపై నడపాలంటే మరో మూడేళ్ల పాటు నిరీక్షించక తప్పదు. అప్పటివరకు ఆ కారులో అతను కేవలం పక్క సీట్లోనే కూర్చోవాల్సి ఉంటుంది.

భారత జట్టులోకి ఎంపిక? సెలెక్టర్ల కన్ను..

ఐపీఎల్‌లో జస్‌ప్రీత్ బుమ్రా, పాట్ కమిన్స్, మిచెల్ స్టార్క్, కాగిసో రబాడ వంటి ప్రపంచ స్థాయి మేటి బౌలర్లను చీల్చిచెండాడిన వైభవ్‌ను వెంటనే భారత సీనియర్ జట్టులోకి తీసుకోవాలని మాజీలు, విశ్లేషకులు డిమాండ్ చేస్తున్నారు. సెలెక్టర్లు ఇప్పటికే అతనిపై ప్రత్యేక నిఘా ఉంచారు. అందులో భాగంగానే శ్రీలంకలో జరగబోయే ముక్కోణపు సిరీస్ కోసం భారత ఏ (India A) జట్టులో అతనికి చోటు కల్పించారు. రాబోయే ఐర్లాండ్ పర్యటన లేదా జపాన్‌లో జరిగే ఆసియా క్రీడల్లో అతను నేరుగా భారత జాతీయ జట్టు జెర్సీని ధరించే అవకాశాలు బలంగా కనిపిస్తున్నాయి.

వైభవ్ సూర్యవంశీ నిస్సందేహంగా అరుదైన ప్రతిభావంతుడు. 15 ఏళ్ల వయసులో అతను చూపిన తెగువ అమోఘం. అయితే అంతర్జాతీయ క్రికెట్ సవాళ్లు పూర్తిగా భిన్నంగా ఉంటాయి. కాబట్టి బీసీసీఐ ఈ బీహార్ కుర్రాణ్ణి చాలా జాగ్రత్తగా చూసుకోవాలి. అంతర్జాతీయ స్థాయికి వెళ్లే ముందు అతను తన శారీరక దృఢత్వం (ఫిట్‌నెస్)పై మరింత దృష్టి పెట్టాల్సి ఉంటుంది. త్వరలోనే అతను భారత జట్టుకు సుదీర్ఘ కాలం సేవలందించే గొప్ప తారగా ఎదగాలని ఆశిద్దాం.