Vaibhav Sooryavanshi : వైభవ్ కాదు.. ప్రపంచ క్రికెట్ లోనే అత్యంత చిన్న వయసులో టీ20 అరంగేట్రం చేసిన ఆటగాళ్లు వీరే
Vaibhav Sooryavanshi : ఐర్లాండ్తో తొలి టీ20లో వైభవ్ సూర్యవంశీ అరంగేట్రం చేస్తే భారత క్రికెట్లో అత్యంత పిన్న వయస్కుడిగా చరిత్ర సృష్టించనున్నాడు. అయితే ప్రపంచ టీ20 చరిత్రలో అతడు 10వ అత్యంత చిన్న వయసు డెబ్యూ ఆటగాడిగా మాత్రమే నిలవనున్నాడు.
Vaibhav Sooryavanshi : భారత క్రికెట్లో సరికొత్త అధ్యాయం లిఖించబడబోతోంది. ఐర్లాండ్ పర్యటనలో భాగంగా ఇవాళ జరగబోయే మొదటి టీ20 మ్యాచ్ ద్వారా 15 ఏళ్ల యువ లెఫ్ట్ హ్యాండ్ బ్యాటర్ వైభవ్ సూర్యవంశీ అంతర్జాతీయ క్రికెట్ లోకి అరంగేట్రం చేసే అవకాశాలు చాలా ఎక్కువగా ఉన్నాయి. ఒకవేళ ఇవాళ రాత్రి జరిగే మ్యాచ్లో అతడికి తుది జట్టులో అవకాశం దక్కితే, భారతదేశం తరఫున ఏ ఫార్మాట్లోనైనా అంతర్జాతీయ మ్యాచ్ ఆడిన అత్యంత పిన్న వయస్కుడైన క్రికెటర్గా వైభవ్ చరిత్ర సృష్టిస్తాడు.
సచిన్ టెండూల్కర్ 37 ఏళ్ల రికార్డు బద్దలు
భారత్ తరఫున అతి చిన్న వయసులోనే ఇంటర్నేషనల్ క్రికెట్ ఆడిన రికార్డు ఇప్పటివరకు క్రికెట్ లెజెండ్ సచిన్ టెండూల్కర్ పేరిట ఉంది. సచిన్ 1989 నవంబర్లో పాకిస్తాన్పై తన మొదటి మ్యాచ్ ఆడినప్పుడు అతని వయసు 16 సంవత్సరాల 205 రోజులు. కాగా ఇవాళ ఐర్లాండ్ మ్యాచ్ ఆడే సమయానికి వైభవ్ సూర్యవంశీ వయసు కేవలం 15 సంవత్సరాల 91 రోజులు మాత్రమే. అంటే సచిన్ కంటే దాదాపు ఒకటిన్నర సంవత్సరం చిన్న వయసులోనే వైభవ్ టీమిండియా జెర్సీని ధరించబోతున్నాడు.
ఐపీఎల్, అండర్-19లో విధ్వంసం
వైభవ్ సూర్యవంశీకి ఇంత చిన్న వయసులోనే భారత సీనియర్ జట్టులో చోటు దక్కడం వెనుక అతని అసాధారణమైన ప్రతిభ ఉంది. ఇటీవల ముగిసిన ఐపీఎల్ 2026 సీజన్ లో వైభవ్ సంచలన బ్యాటింగ్తో ఏకంగా 776 పరుగులు చేసి ఆరంజ్ క్యాప్ సొంతం చేసుకున్నాడు. అంతకుముందు జరిగిన అండర్-19 ప్రపంచకప్ ఫైనల్ మ్యాచ్లో కూడా కేవలం 80 బంతుల్లోనే 175 పరుగులు చేసి ప్రపంచ క్రికెట్ శ్రేణుల దృష్టిని ఆకర్షించాడు. ఈ అద్భుతమైన ప్రదర్శనల వల్లే సెలక్టర్లు అతడిని ఐర్లాండ్ సిరీస్కు ఎంపిక చేశారు.
వాషింగ్టన్ సుందర్ రికార్డు కనుమరుగు
ఇక భారత టీ20 క్రికెట్ విషయానికి వస్తే, మన దేశం తరఫున అత్యంత చిన్న వయసులో టీ20 ఇంటర్నేషనల్ డెబ్యూ చేసిన రికార్డు వాషింగ్టన్ సుందర్ పేరిట ఉంది. సుందర్ 2017లో శ్రీలంకపై తన మొదటి టీ20 మ్యాచ్ ఆడినప్పుడు అతని వయసు 18 సంవత్సరాల 80 రోజులు. ఇప్పుడు వైభవ్ గనుక బరిలోకి దిగితే వాషింగ్టన్ సుందర్ రికార్డును చాలా సులభంగా అధిగమిస్తాడు. అయితే అంతర్జాతీయ స్థాయిలో చూసుకుంటే వైభవ్ కంటే చిన్న వయసులోనే మ్యాచ్లు ఆడిన ప్లేయర్లు చాలా మంది ఉన్నారు.
ప్రపంచ క్రికెట్ లో 10వ స్థానం
వైభవ్ సూర్యవంశీ ఇవాళ డెబ్యూ చేసినా కూడా ప్రపంచంలోనే అత్యంత చిన్న వయసులో టీ20 ఆడిన ప్లేయర్గా నిలవలేడు. ప్రపంచవ్యాప్తంగా అసోసియేట్ దేశాలైన రోమానియా, గ్రీస్, కువైట్ లాంటి జట్ల నుంచి 14 ఏళ్ల వయసులోనే అంతర్జాతీయ మ్యాచ్లు ఆడిన రికార్డులు ఉన్నాయి. రోమానియాకు చెందిన మారియన్ ఘెరాసిమ్ కేవలం 14 ఏళ్ల 16 రోజుల వయసులోనే టీ20 డెబ్యూ చేసి వరల్డ్ రికార్డ్ సృష్టించాడు. వైభవ్ గనుక ఇవాళ బరిలోకి దిగితే ప్రపంచవ్యాప్తంగా 10వ అత్యంత పిన్న వయస్కుడైన టీ20 ప్లేయర్గా నిలుస్తాడు.
అంతర్జాతీయ క్రికెట్ లో అత్యంత పిన్న వయస్కులైన టీ20 ప్లేయర్ల జాబితా
* మారియన్ ఘెరాసిమ్ (రోమానియా) – 14 ఏళ్లు 16 రోజులు
* ఆల్కినూస్ మనాటోస్ (గ్రీస్) – 14 ఏళ్లు 207 రోజులు
* మీత్ భవ్సార్ (కువైట్) – 14 ఏళ్లు 211 రోజులు
* జార్జ్ సేసే (సియెర్రా లియోన్) – 14 ఏళ్లు 311 రోజులు
* ఆస్కార్ డఫ్ (బల్గేరియా) – 15 ఏళ్లు 64 రోజులు
* రేమండ్ కోకర్ (సియెర్రా లియోన్) – 15 ఏళ్లు 73 రోజులు
* అలెక్సా లాజిచ్ (సెర్బియా) – 15 ఏళ్లు 73 రోజులు
* అలుసిన్ తురే (సియెర్రా లియోన్) – 15 ఏళ్లు 74 రోజులు
* సుహైల్ వయాని (మలావి) – 15 ఏళ్లు 89 రోజులు
* వైభవ్ సూర్యవంశీ (భారతదేశం) – 15 ఏళ్లు 91 రోజులు
* టెన్జిన్ రబ్గే (భూటాన్) – 15 ఏళ్లు 92 రోజులు
మరిన్ని క్రీడా వార్తల కోసం ఇక్కడ క్లిక్ చేయండి..