Video: ఇది కదా కావల్సింది! డకౌట్ అయిన వైభవ్ దగ్గరికెళ్లి రోహిత్ చేసిన పనికి ఫిదా అవుతున్న ఫ్యాన్స్

Rohit Sharma Vaibhav Suryavanshi

ఇండియన్ ప్రీమియర్ లీగ్ (ఐపీఎల్) 2025లో రాజస్థాన్ రాయల్స్ యువ క్రికెటర్ వైభవ్ సూర్యవంశీ, ముంబయి ఇండియన్స్‌తో గురువారం జరిగిన మ్యాచ్‌లో 2 బంతుల్లో ఔటై నిరాశపరిచాడు. గత మ్యాచ్‌లో ఐపీఎల్ చరిత్రలోనే అత్యంత పిన్న వయస్సులో శతకం సాధించిన బ్యాట్స్‌మన్‌గా వార్తల్లోకెక్కిన వైభవ్, ఈ మ్యాచ్‌లో ఖాతా కూడా తెరవలేకపోయాడు. దీంతో RR జట్టు 100 పరుగుల తేడాతో ఓడిపోయి ప్లేఆఫ్స్ ఆశలకు ముగింపు పలికింది. కానీ, మ్యాచ్ అనంతరం ముంబయి స్టార్ రోహిత్ శర్మ చేసిన ఒక చిన్న హృద్యమైన చర్య ప్రస్తుతం సోషల్ మీడియాలో వైరల్ అవుతోంది.

మ్యాచ్ తర్వాత రెండు జట్లు హ్యాండ్‌షేక్స్ చేసుకుంటుండగా, రోహిత్ శర్మ ప్రత్యేకంగా వైభవ్ వద్దకు వచ్చి, అతనికి ఓదార్పుగా కొన్ని సానుకూలమైన మాటలు చెప్పారు. ఈ విషయం మ్యాచ్‌లో కామెంటరీ చేస్తున్న రవి శాస్త్రి కూడా ప్రస్తావించారు – “ఇతడు నేర్చుకుంటాడు… రోహిత్ శర్మ నుండి మంచి ప్రోత్సాహక మాటలు వచ్చాయి,” అంటూ పేర్కొన్నారు. రోహిత్ నుంచి వచ్చిన ఈ కబుర్లు యువతడిలో కొత్త ఉత్సాహం నింపాయి.

ఈ మ్యాచ్‌లో ముంబయి ఇండియన్స్ ఓపెనర్ రయాన్ రికెల్టన్ 38 బంతుల్లో 63 పరుగులు చేసి ‘ప్లేయర్ ఆఫ్ ద మాచ్’ అవార్డు అందుకున్నారు. మ్యాచ్ అనంతరం ఆయన మాట్లాడుతూ  “ఈ వారం నా ఫ్యామిలీ వచ్చిందీ… వాళ్ల ఎదుటే ఇలాంటి ప్రదర్శన ఇవ్వడం ఎంతో ప్రత్యేకం. ముంబయి ఇండియన్స్ కోసం ఆటలో భాగస్వామ్యం కావడం సంతోషకరం,” అని అన్నారు.

అలాగే, రోహిత్ శర్మతో తన భాగస్వామ్యంపై మాట్లాడుతూ “టోర్నమెంట్‌లో ఆరంభం కొంచెం నెమ్మదిగా సాగింది కానీ ఇప్పుడు మేమిద్దరం సమన్వయంగా బాగా ఆడుతున్నాం. తొలి రెండు మూడు ఓవర్లలో వాతావరణం అస్పష్టంగా ఉండినా, మేము బాగానే బ్యాటింగ్ చేశాం. అనంతరం హార్దిక్, సూర్యకుమార్ యాదవ్ అద్భుతంగా ఆడారు,” అని తెలిపారు. ఇలాంటి హృదయాన్ని తాకే ఘటనలు ఆటపట్ల గౌరవాన్ని పెంచుతాయనడంలో ఎలాంటి సందేహం లేదు.

మ్యాచ్ గురించి చెప్పాలంటే, ముందుగా బ్యాటింగ్‌కు వచ్చిన ముంబై ఇండియన్స్ భారీ స్కోరు చేసింది. రోహిత్ శర్మ, రియాన్ రికెల్టన్‌ల హాఫ్ సెంచరీలతో జట్టుకు మంచి ఆరంభం లభించింది. ఆ తర్వాత, సూర్య కుమార్ యాదవ్, కెప్టెన్ హార్దిక్ పాండ్యా అజేయంగా తలో 48 పరుగులు చేసి జట్టు స్కోరును 217 పరుగులకు తీసుకెళ్లారు. ఛేదనలో రాజస్థాన్ జట్టు 117 పరుగులకే కుప్పకూలింది. రాజస్థాన్ రాయల్స్ జట్టులో ఏ ఒక్క బ్యాట్స్‌మన్ కూడా 30 పరుగుల మార్కును దాటలేకపోయాడు. దీని కారణంగా రాజస్థాన్ భారీ ఓటమిని ఎదుర్కోవలసి వచ్చింది.

మరిన్ని ఐపీఎల్ వార్తల కోసం ఇక్కడ క్లిక్ చేయండి..