RCB vs GT : ధర్మశాలలో కింగ్ విశ్వరూపం చూపిస్తాడా ? గుజరాత్ బౌలింగును ఎదుర్కొని ఆర్‌సీబీ ఫైనల్ చేరుతుందా!

RCB vs GT : ఐపీఎల్ 2026 సీజన్ అత్యంత కీలకమైన దశకు చేరుకుంది. లీగ్ దశలో ఆడిన 14 మ్యాచ్‌లలో 9 విజయాలతో అత్యంత నిలకడైన ప్రదర్శన చేసిన బెంగళూరు, గుజరాత్ జట్లు మొదటి క్వాలిఫైయర్ లో తలపడనున్నాయి. హిమాచల్ ప్రదేశ్ లోని ధర్మశాల మైదానంలో రాత్రి 7:30 గంటలకు ఈ మ్యాచ్ ప్రారంభం కానుంది. ఈ పిచ్ పై స్పిన్నర్ల కంటే వేగవంతమైన బౌలర్లకు ఎక్కువ అనుకూలంగా ఉండే అవకాశం ఉంది.

గుజరాత్ టైటాన్స్ బౌలింగ్ బలం

ఈ సీజన్ లో గుజరాత్ టైటాన్స్ జట్టు అత్యుత్తమ బౌలింగ్ గణాంకాలను కలిగి ఉంది. వారి పేస్ బౌలింగ్ విభాగం 22.93 సగటుతో టోర్నమెంట్‌లో అత్యధిక వికెట్లు పడగొట్టింది. పవర్‌ప్లే ఓవర్లలోనే గుజరాత్ బౌలర్లు ఏకంగా 30 వికెట్లు తీసి ప్రత్యర్థులను దెబ్బతీశారు. కాగిసో రబడ 24 వికెట్లతో ఈ విభాగాన్ని ముందుండి నడిపిస్తున్నాడు. అతనికి తోడుగా మహ్మద్ సిరాజ్ కొత్త బంతితో పవర్‌ప్లేలో 8.76 ఎకానమీతో అద్భుతంగా రాణిస్తున్నాడు. మిడిల్ ఓవర్లలో ప్రసిద్ధ్ కృష్ణ, జేసన్ హోల్డర్ గుజరాత్ జట్టుకు అదనపు బలాన్ని ఇస్తున్నారు.

బెంగళూరు విధ్వంసకర బ్యాటింగ్ పవర్

మరోవైపు బెంగళూరు జట్టుకు వారి బ్యాటింగ్ విభాగమే ప్రధాన బలం. ముఖ్యంగా విరాట్ కోహ్లీ అద్భుతమైన ఫామ్‌లో ఉన్నాడు. బెంగళూరు జట్టు ఈ సీజన్‌లో 164.13 స్ట్రైక్ రేట్‌తో పరుగులు సాధిస్తోంది. ప్రతి 10.68 బంతులకు ఒక సిక్స్ కొడుతూ ప్రత్యర్థి బౌలర్లపై విరుచుకుపడుతోంది. మిడిల్ ఓవర్లలో రజత్ పాటిదార్ 28 సిక్సర్లతో విధ్వంసం సృష్టిస్తున్నాడు. బౌలింగ్‌లో భువనేశ్వర్ కుమార్ 24 వికెట్లతో పర్పుల్ క్యాప్ రేసులో ఉన్నాడు. పవర్‌ప్లేలో అతను 15 వికెట్లు తీసి బెంగళూరును ఆదుకుంటున్నాడు. జోష్ హేజిల్‌వుడ్ కూడా నాకౌట్ మ్యాచ్‌లలో మంచి రికార్డు కలిగి ఉన్నాడు.

పిచ్ అంచనాలు, తుది జట్ల మార్పులు

ధర్మశాల మైదానంలో విరాట్ కోహ్లీకి 53.66 అద్భుతమైన బ్యాటింగ్ సగటు ఉంది. గుజరాత్ పై ఆడిన 8 ఇన్నింగ్స్‌లలో ఆయన సెంచరీ, 4 హాఫ్ సెంచరీలు చేశాడు. గుజరాత్ బ్యాటర్ సాయి సుదర్శన్ 638 పరుగులతో టాప్ స్కోరర్‌గా ఉన్నాడు. రషీద్ ఖాన్ 19 వికెట్లతో స్పిన్ భారమంతా మోస్తున్నాడు. ఈ మ్యాచ్ లో బెంగళూరు జట్టు సుయాష్ శర్మ స్థానంలో రిచర్డ్ గ్లీసన్‌ను బరిలోకి దించే అవకాశం ఉంది. ఫింగర్ గాయం కారణంగా ఫిల్ సాల్ట్ ఆడే అవకాశం లేదు. టాస్ గెలిచిన జట్టు ఇక్కడ చేజింగ్‌కు మొగ్గు చూపే అవకాశం ఉంది.

మరిన్ని క్రీడా వార్తల కోసం ఇక్కడ క్లిక్ చేయండి..