IND-A vs SL-A : భారత్ వర్సెస్ శ్రీలంక ‘ఎ’ జట్ల సమరం.. ఫైనల్ రేసును తేల్చే నాలుగో వన్డే ఇవాళే
IND-A vs SL-A : శ్రీలంకలో జరుగుతున్న ట్రై సిరీస్ 2026లో భారత్ ‘ఏ’, శ్రీలంక ‘ఏ’ జట్లు నేడు కీలక నాలుగో వన్డేలో తలపడనున్నాయి. ఫైనల్ రేసును ప్రభావితం చేసే ఈ మ్యాచ్ లైవ్ టెలికాస్ట్, స్ట్రీమింగ్ వివరాలు, జట్ల పరిస్థితి గురించి పూర్తి సమాచారం తెలుసుకుందాం.
IND-A vs SL-A : శ్రీలంక వేదికగా జరుగుతున్న ప్రతిష్టాత్మక ట్రై సిరీస్ ఆఖరి దశకు చేరుకుంది. టోర్నమెంట్లో భాగంగా సోమవారం (జూన్ 15న) జరగనున్న నాలుగో వన్డే మ్యాచ్లో ఆతిథ్య శ్రీలంక ‘ఎ’ జట్టుతో భారత్ ‘ఎ’ జట్టు తలపడనుంది. ఈ టోర్నీలో ఫైనల్కు చేరే జట్టు ఏదో తేల్చడంలో ఈ మ్యాచ్ అత్యంత కీలకం కానుంది. ప్రస్తుతం ఈ సిరీస్లోని మూడు జట్లు (భారత్, శ్రీలంక, ఆఫ్ఘనిస్తాన్) తలా ఒక విజయం సాధించి సమాన పాయింట్లతో ఉండటంతో నేటి మ్యాచ్పై భారీ అంచనాలు నెలకొన్నాయి. ఈ టోర్నీ మొదటి మ్యాచ్లో శ్రీలంకపై భారత్ సంచలన విజయం సాధించింది. ఆ మ్యాచ్లో కెప్టెన్ రుతురాజ్ గైక్వాడ్ అద్భుతమైన సెంచరీతో రాణించడంతో భారత్ 277 పరుగుల భారీ స్కోరు చేసింది. అనంతరం లక్ష్య ఛేదనలో లంక జట్టు గట్టి పోటీ ఇచ్చినప్పటికీ, ఆఖరి నిమిషంలో తడబడి 8 పరుగుల తేడాతో ఓడిపోయింది. దీంతో ఈ రివర్స్ ఫిక్చర్లో ఎలాగైనా భారత్ను ఓడించి ఆ పరాభవానికి ప్రతికారం తీర్చుకోవాలని లంక లయన్స్ భావిస్తున్నారు. మరోవైపు భారత్ తన గత మ్యాచ్లో ఆఫ్ఘనిస్తాన్ చేతిలో ఘోరంగా ఓడిపోవడంతో, ఈ మ్యాచ్లో గెలిచి మళ్లీ ఫామ్లోకి రావాలని పట్టుదలగా ఉంది.
భారత్ ఏ, శ్రీలంక ఏ జట్ల మధ్య జరిగే ఈ వన్డే మ్యాచ్కు దంబూలాలోని ప్రసిద్ధ రంగిరి దంబూలా ఇంటర్నేషనల్ స్టేడియం ఆతిథ్యం ఇవ్వనుంది. ఈ మ్యాచ్కు సంబంధించిన టాస్ ప్రక్రియ భారత కాలమానం ప్రకారం ఉదయం 9:30 గంటలకు జరుగుతుంది. ఆ తర్వాత సరిగ్గా ఉదయం 10:00 గంటలకు మ్యాచ్ ప్రత్యక్ష ప్రసారం ప్రారంభమవుతుంది. యువ ఆటగాడు వైభవ్ సూర్యవంశీ బ్యాటింగ్ లోపాలను ఆఫ్ఘన్ బౌలర్లు ఎండగట్టిన నేపథ్యంలో, ఈ మ్యాచ్లో భారత బ్యాటింగ్ ఆర్డర్లో ఎలాంటి మార్పులు చేస్తారనేది ఆసక్తికరంగా మారింది.
భారత్లో లైవ్ టెలికాస్ట్, స్ట్రీమింగ్ ఎక్కడంటే?
ఈ హై-వోల్టేజ్ మ్యాచ్ను భారత వీక్షకులు టీవీల్లో, మొబైల్స్లో ప్రత్యక్షంగా వీక్షించవచ్చు. టెలివిజన్ ప్రేక్షకులకు సోనీ స్పోర్ట్స్ నెట్వర్క్ ఛానెళ్ల ద్వారా ఈ మ్యాచ్ లైవ్ అందుబాటులో ఉంటుంది. ఇక డిజిటల్ ప్లాట్ఫార్మ్స్ లేదా మొబైల్స్లో మ్యాచ్ చూడాలనుకునే వారి కోసం సోనీ లివ్ యాప్, అలాగే ఫ్యాన్కోడ్ యాప్, వెబ్సైట్లలో లైవ్ స్ట్రీమింగ్ సౌకర్యం కల్పించారు. టాస్కు ముందే ప్రారంభమయ్యే ప్రీ-మ్యాచ్ అనాలసిస్ను కూడా అభిమానులు ఇందులో ఉచితంగా చూడవచ్చు.
ప్రపంచవ్యాప్తంగా లైవ్ ప్రసారాల వివరాలు
భారత్లోనే కాకుండా ప్రపంచవ్యాప్తంగా ఉన్న క్రికెట్ అభిమానుల కోసం కూడా వేర్వేరు ప్లాట్ఫార్మ్స్లో ఈ మ్యాచ్ లైవ్ ప్రసారం కానుంది. అమెరికా, కెనడాలోని వీక్షకులు విల్లో టీవీ ద్వారా మ్యాచ్ను ఎంజాయ్ చేయవచ్చు. యూకే ప్రేక్షకులకు టీఎన్టీ స్పోర్ట్స్ లైవ్ ఇవ్వనుంది. పొరుగు దేశాలైన పాకిస్తాన్, బంగ్లాదేశ్లలో టాప్మాడ్ యాప్ ద్వారా ప్రసారాలు అందుతాయి. కరేబియన్ దీవుల్లో ఈఎస్పీఎన్, డిస్నీ ప్లస్ లో, ఆఫ్రికా దేశాల్లో సూపర్స్పోర్ట్లో ఈ మ్యాచ్ లైవ్ వస్తుంది. ఇవి కాకుండా ప్రపంచంలోని మిగిలిన ప్రాంతాల ప్రజల కోసం శ్రీలంక క్రికెట్ అధికారిక యూట్యూబ్ ఛానెల్లో కూడా ఉచితంగా లైవ్ స్ట్రీమింగ్ అందుబాటులో ఉంటుంది.
మరిన్ని క్రీడా వార్తల కోసం ఇక్కడ క్లిక్ చేయండి..