Kohli vs Gambhir: ‘కోహ్లీ‌ విజయాన్ని గంభీర్ జీర్ణించుకోలేకున్నాడు’.. విరాట్‌పై పాకిస్థానీ మాజీ ప్రశంసల జల్లు..

Ahmed Shehzad On ‘virat Kohli Vs Gautam Gambhir’

Ahmed Shehzad On Virat Kohli: ఐపీఎల్ 16వ సీజన్‌లో భాగంగా ‘రాయల్ చాలెంజర్స్ బెంగళూరు vs లక్నో సూపర్ జెయింట్స్’ మ్యాచ్ సమయంలో కోహ్లీ, గంభీర్ మధ్య వాగ్వాదం జరిగిన సంగతి తెలిసిందే. అయితే ఈ విషయంపై పాకిస్థానీ బ్యాట్స్‌మ్యాన్ అహ్మద్ షాజాద్ స్పందించాడు. క్రికెట్‌లో విరాట్ కోహ్లీ సాధించిన విజయాన్ని చూసి గౌతమ్ గంభీర్ జీర్ణించుకోలేకపోతున్నాడని చెప్పుకొచ్చాడు. పాకిస్థానీ యూట్యూబర్ నాదిర్ ఆలీ పాడ్‌కాస్ట్‌పై షాజాద్ ఈ వ్యాఖ్యలు చేయడంతో పాటు విరాట్‌పై ప్రశంసలు జల్లు కురిపించాడు.

అహ్మద్ షాజాద్ మాట్లాడుతూ ‘తన క్రికెట్ కెరీర్‌లో తనకు రాని గౌరవం కోహ్లీకి దక్కడాన్ని గంభీర్ జీర్ణించుకోలేకపోతున్నాడు. చిన్న వయసు నుంచే కోహ్లీ సంపాదించుకుంటున్న కీర్తి గంభీర్‌కు నచ్చడం లేదు. కోహ్లీని నవీన్ స్లెడ్జ్ చేసినట్లుగానే సచిన్‌ని కూడా చేసి ఉంటే.. గంభీర్ ఏ విధంగా స్పందించేవాడో..’ అని అన్నాడు. ఇంకా కోహ్లీ తనకు ఎంతో అండగా ఉంటాడని, ఎవరు అడిగినా ఎంతో వినయంగా సలహాలు ఇస్తాడని, ఫిట్‌నెస్ విషయంలో విరాట్‌ గ్రేట్ అని షాజాద్ తెలిపాడు.

ఇంకా కోహ్లీ అండర్ 19 ఆడే సమయంలో చాలా లావుగా ఉండేవాడని, కానీ గత కొన్నేళ్లుగా అతని ఫిట్‌నెస్‌లో మార్పులు వచ్చాయని, టీమిండియాను ముందుకు తీసుకెళ్తున్నాడని చెప్పాడు. తన జీవితంలో కోహ్లీని తప్ప అన్ని రకాల పరిస్థితులకు చాలా త్వరగా సర్దుకుపోయే వ్యక్తిని చూడలేదని షాజాద్ పేర్కొన్నాడు.

మరిన్ని క్రీడా వార్తల కోసం ఇక్కడ క్లిక్ చేయండి..