అయోధ్య వెళ్లాలనుకుంటున్నారా? రూ.9,700తో రామ్ లల్లా దర్శనం.. IRCTC అదిరిపోయే ప్యాకేజీ!
IRCTC Ayodhya Tour Package: అయోధ్యలోని రామ్ లల్లా ఆలయం, సరయూ ఘాట్, హనుమాన్ గర్హి, కనక్ భవన్ దర్శనానికి IRCTC ప్రత్యేక టూర్ ప్యాకేజీని అందిస్తోంది. వందే భారత్ రైలులో ప్రయాణం, హోటల్ బస, భోజనాలతో రూ.9,700 నుంచే ఈ ప్యాకేజీ అందుబాటులో ఉంది. దీనికి సంబంధించిన పూర్తి వివరాలు ఇప్పుడు తెలుసుకుందాం.
IRCTC Ayodhya Tour Package Telugu: భారతదేశంలోని అత్యంత పవిత్ర పుణ్యక్షేత్రాల్లో ఒకటైన అయోధ్యకు వెళ్లి శ్రీరాముడి జన్మస్థలాన్ని దర్శించాలని భావిస్తున్న భక్తులకు ఇండియన్ రైల్వే క్యాటరింగ్ అండ్ టూరిజం కార్పొరేషన్ (IRCTC) ప్రత్యేక టూర్ ప్యాకేజీని అందుబాటులోకి తీసుకొచ్చింది. “రామ్ లల్లా దర్శన్ అయోధ్య” పేరుతో నిర్వహిస్తున్న ఈ రెండు రోజుల ప్యాకేజీలో వందే భారత్ ఎక్స్ప్రెస్లో ప్రయాణం, హోటల్ బస, భోజనాలు, స్థానిక దర్శనాలు అన్నీ కలిపి అందిస్తున్నారు.
అయోధ్య ప్రత్యేకత
ఉత్తరప్రదేశ్లోని సరయూ నది తీరాన ఉన్న అయోధ్య హిందువులకు అత్యంత పవిత్రమైన పుణ్యక్షేత్రం. శ్రీరాముడి జన్మస్థలంగా ప్రసిద్ధి చెందిన ఈ నగరం రామాయణంతో విడదీయరాని అనుబంధం కలిగి ఉంది. ప్రాచీన కోసల రాజ్యానికి రాజధానిగా ఉన్న అయోధ్యను హిందూ సంప్రదాయంలోని సప్త మోక్షపురిలలో ఒకటిగా భావిస్తారు.
ప్యాకేజీ వివరాలు
- ప్యాకేజీ పేరు: రామ్ లల్లా దర్శన్ అయోధ్య
- ప్రయాణ విధానం: రైలు (వందే భారత్ ఎక్స్ప్రెస్)
- బయలుదేరే స్టేషన్: ఆనంద్ విహార్ టెర్మినల్ (ఢిల్లీ)
- ప్రయాణ సమయం: ఉదయం 6:10 గంటలకు
- రైలు క్లాస్: చెయిర్ కార్ (CC)
- టూర్ నిర్వహణ: ప్రతి శుక్రవారం, శనివారం
- వసతి: హోటల్ తారాజీ రిసార్ట్ లేదా సమాన స్థాయి హోటల్
- భోజనాలు: వెజిటేరియన్ భోజనం (ప్యాకేజీ ప్రకారం)
దర్శించే ప్రముఖ ప్రదేశాలు
ఈ ప్యాకేజీలో భక్తులు కింది ప్రసిద్ధ ఆధ్యాత్మిక ప్రదేశాలను సందర్శించే అవకాశం ఉంటుంది. సరయూ ఘాట్, రామ్ లల్లా ఆలయం, హనుమాన్ గర్హి, కనక్ భవన్.
ప్యాకేజీ ధరలు
సింగిల్ ఆక్యుపెన్సీ: ఒక్కొక్కరికి రూ.16,170
డబుల్ ఆక్యుపెన్సీ: ఒక్కొక్కరికి రూ.10,950
ట్రిపుల్ ఆక్యుపెన్సీ: ఒక్కొక్కరికి రూ.9,700
5–11 ఏళ్ల పిల్లలు (బెడ్తో): ఒక్కొక్కరికి రూ.9,360
5–11 ఏళ్ల పిల్లలు (బెడ్ లేకుండా): ఒక్కొక్కరికి రూ.8,980
టూర్ షెడ్యూల్
మొదటి రోజు: ఉదయం 6:10 గంటలకు ఆనంద్ విహార్ టెర్మినల్ నుంచి వందే భారత్ ఎక్స్ప్రెస్ (22426)లో ప్రయాణం ప్రారంభమవుతుంది. రైలులోనే అల్పాహారం, మధ్యాహ్న భోజనం అందిస్తారు. మధ్యాహ్నం అయోధ్య కాంట్ రైల్వే స్టేషన్కు చేరుకున్న తర్వాత హోటల్కు తరలిస్తారు. సాయంత్రం సరయూ ఘాట్ సందర్శన అనంతరం రామ్ లల్లా ఆలయంలో దర్శనం ఉంటుంది. రాత్రికి హోటల్లో బస.
రెండో రోజు: ఉదయం అల్పాహారం అనంతరం హనుమాన్ గర్హి, కనక్ భవన్ దర్శనం ఉంటుంది. మధ్యాహ్న భోజనం తర్వాత హోటల్ నుంచి చెక్అవుట్ చేసి అయోధ్య కాంట్ రైల్వే స్టేషన్కు చేరుకుంటారు. అక్కడి నుంచి 22425 వందే భారత్ ఎక్స్ప్రెస్ ద్వారా ఢిల్లీకి బయలుదేరి రాత్రి ఆనంద్ విహార్ టెర్మినల్కు చేరుకోవడంతో టూర్ ముగుస్తుంది.
ప్యాకేజీలో ఏమేం ఉంటాయి?
- వందే భారత్ ఎక్స్ప్రెస్లో రిటర్న్ ప్రయాణం (CC క్లాస్)
- అయోధ్యలో ఒక రాత్రి హోటల్ బస
- ఏసీ వాహనంలో స్థానిక రవాణా
- నిర్ణీత మెనూ ప్రకారం శాకాహార భోజనం
- రైలు ప్రయాణంలో అల్పాహారం, భోజనం
- జీఎస్టీ
ప్యాకేజీలో ఉండనివి
- దర్శనానికి ప్రత్యేక (VIP/ప్రాధాన్యత) పాస్లు
- హారతి పాస్లు, లైన్ దర్శనం టికెట్లు
- వ్యక్తిగత ఖర్చులు, టిప్స్, లాండ్రీ, మినరల్ వాటర్
- వీడియో/ఫోటోగ్రఫీ ఛార్జీలు
- ఇన్సూరెన్స్
- ప్యాకేజీలో పేర్కొనని అదనపు భోజనాలు లేదా సందర్శనలు
ముఖ్యమైన సూచనలు
ఆలయాల్లో VIP లేదా ప్రాధాన్యత దర్శనం సౌకర్యాన్ని IRCTC కల్పించదు. రైళ్ల ఆలస్యం, వాతావరణ పరిస్థితులు, భారీ రద్దీ, రవాణా సమస్యలు వంటి కారణాలతో టూర్ షెడ్యూల్లో మార్పులు జరిగే అవకాశం ఉంది. బుకింగ్ సమయంలో ఇచ్చిన ఫోటో గుర్తింపు కార్డు (ఆధార్, ఓటర్ ఐడీ, పాస్పోర్ట్, డ్రైవింగ్ లైసెన్స్ మొదలైనవి) తప్పనిసరిగా వెంట తీసుకెళ్లాలి. హోటల్ చెక్-ఇన్, చెక్-అవుట్ సమయాలు హోటల్ నిబంధనల ప్రకారం ఉంటాయి. ప్యాకేజీ ధరలు బుకింగ్ తేదీ నాటివి మాత్రమే. రైల్వే చార్జీలు లేదా ఇతర ఖర్చులు పెరిగితే అదనపు మొత్తం చెల్లించాల్సి రావచ్చు.
ఈ ప్యాకేజీ ద్వారా తక్కువ ఖర్చుతో అయోధ్యలోని ప్రముఖ ఆధ్యాత్మిక క్షేత్రాలను దర్శించి, వందే భారత్ ఎక్స్ప్రెస్లో సౌకర్యవంతమైన ప్రయాణాన్ని ఆస్వాదించే అవకాశం భక్తులకు లభిస్తుంది.