Lucky Zodiac Signs: చంద్రుడి ఉచ్ఛ స్థితి.. ఇక ఆ రాశుల వారికి దశ తిరిగినట్టే..!
Moon Exalted in Taurus: ఈ నెల(మార్చి) 23, 24, 25 తేదీల్లో చంద్రుడు వృషభ రాశిలో ఉచ్ఛపట్టడం జరుగుతోంది. మనసుకు, తల్లికి, ఐశ్వర్యానికి, ఆరోగ్యానికి కారకుడైన చంద్రుడు ఉచ్ఛపట్టడం కొన్ని రాశులకు బాగా లాభకరంగా ఉంటుంది. ఈ మూడు రోజుల్లో కొన్ని శుభ పరిణామాలు చోటు చేసుకోవడానికి అవకాశం ఉంది. ఈ సమయంలో తీసుకునే నిర్ణయాలు, చేపట్టే ప్రయత్నాలు సమీప భవిష్యత్తులో విజయవంతం అవడానికి బాగా అవకాశం ఉంది. చంద్రుడి ఉచ్ఛ స్థితి వల్ల మేషం, వృషభం, కర్కాటకం, కన్య, వృశ్చికం, మకర రాశుల వారి దశ, దిశ తిరిగే అవకాశం ఉంది. వీరు ఎంత సానుకూల దృక్పథంతో వ్యవహరిస్తే అంత మంచిది.
మేషం: ఈ రాశికి చతుర్థాధిపతి అయిన చంద్రుడు ధన స్థానంలో ఉచ్ఛపట్టడం వల్ల వృత్తి, ఉద్యోగాల్లోనే కాక, సామాజికంగా కూడా హోదా పెరిగే అవకాశం ఉంటుంది. ఆస్తి, ఆర్థిక సమస్యలు పరిష్కారం అవుతాయి. కొద్ది ప్రయత్నంతో ఆదాయం పెరగడం, ఆదాయ మార్గాలు విస్తరించడం జరుగుతుంది. ప్రభుత్వ ఉద్యోగులు, కళాకారులు బాగా రాణిస్తారు. రావలసిన డబ్బు వసూలై ముఖ్య మైన అవసరాలు తీరిపోతాయి. గృహ, వాహన సౌకర్యాల ప్రయత్నాలు సాగించడం మంచిది.
వృషభం: ఈ రాశిలో చంద్రుడు ఉచ్ఛపడుతున్నందువల్ల ఆదాయానికి, ఆరోగ్యానికి లోటుండదు. ఎటువంటి ప్రయత్నం తలపెట్టినా విజయవంతం అవుతుంది. ఆదాయ ప్రయత్నాలన్నీ సత్ఫలితాలనిస్తాయి. ఆస్తి వివాదాలు అనుకూలంగా పరిష్కారమవుతాయి. తల్లి నుంచి ఆస్తిపాస్తులు కలిసి వస్తాయి. ఉద్యోగంలో ఆశించిన పురోగతి ఉంటుంది. వృత్తి, వ్యాపారాలు కొత్త పుంతలు తొక్కుతాయి. మనసులోని కోరికలు నెరవేరుతాయి. మంచి పరిచయాలు ఏర్పడతాయి. ప్రయాణాలు లాభిస్తాయి.
కర్కాటకం: రాశ్యధిపతి చంద్రుడు లాభ స్థానంలో ఉచ్ఛపట్టడం వల్ల పట్టిందల్లా బంగారం అవుతుంది. ఈ మూడు రోజుల్లో ఎటువంటి ప్రయత్నం చేపట్టినా నెరవేరుతుంది. షేర్లు, స్పెక్యులేషన్లు, ఆర్థిక లావాదేవీలతో సహా అనేక మార్గాల్లో ఆదాయం వృద్ధి చెందే అవకాశం ఉంది. ఆర్థిక, వ్యక్తిగత సమస్యలు పరిష్కారమవుతాయి. ఉద్యోగంలో పదోన్నతులు కలుగుతాయి. వృత్తి, వ్యాపారాలు కొత్త పుంతలు తొక్కుతాయి. నిరుద్యోగులకు ఆఫర్లు అందుతాయి. సంపన్న వ్యక్తితో పెళ్లి సంబంధం కుదురుతుంది.
కన్య: ఈ రాశికి లాభ స్థానాధిపతి అయిన చంద్రుడు భాగ్య స్థానంలో ఉచ్ఛపట్టడం వల్ల ఈ రాశివారికి ఆశించిన విదేశీ ఆఫర్లు అందుతాయి. ఉద్యోగులు, నిరుద్యోగులు విదేశాల్లో ఉద్యోగాలకు ప్రయత్నించడం మంచిది. పెళ్లి ప్రయత్నాల్లో కూడా విదేశీ సంబంధం కుదిరే అవకాశం ఉంది. ఆస్తి వివాదాలు, కోర్టు కేసులు సానుకూలంగా పరిష్కారమవుతాయి. తండ్రి నుంచి ఆస్తి కలిసి వస్తుంది. షేర్లు, స్పెక్యులేషన్లు, ఆర్థిక లావాదేవీలు బాగా లాభిస్తాయి. మంచి పరిచయాలు కలుగుతాయి.
వృశ్చికం: ఈ రాశికి భాగ్యాధిపతి అయిన చంద్రుడు సప్తమ స్థానంలో ఉచ్ఛపట్టడం వల్ల ఉన్నత కుటుంబానికి చెందిన వ్యక్తితో ప్రేమలో పడడం గానీ, పెళ్లి కుదరడం గానీ జరుగుతుంది. ఆకస్మిక ధన ప్రాప్తితో పాటు, ఒకటి రెండు ధన యోగాలకు కూడా అవకాశం ఉంది. ఉద్యోగంలో పదోన్నతులు కలుగుతాయి. వృత్తి, వ్యాపారాల్లో రాబడి పెరగడమే తప్ప తగ్గడం ఉండదు. వృత్తి, ఉద్యోగాలరీత్యా విదేశాలకు వెళ్లడం జరుగుతుంది. షేర్లు, ఆర్థిక లావాదేవీలు, వడ్డీ వ్యాపారాలు బాగా లాభిస్తాయి.
మకరం: ఈ రాశికి సప్తమాధిపతి అయిన చంద్రుడు పంచమ స్థానంలో ఉచ్ఛపట్టడం వల్ల మనసులోని కోరికలు చాలావరకు నెరవేరుతాయి. రాజపూజ్యాలు పెరుగుతాయి. ఆదాయం బాగా వృద్ది చెందుతుంది. ప్రేమ వ్యవహారాల్లో విజయాలు సాధిస్తారు. సంపన్న కుటుంబానికి చెందిన వ్యక్తితో పెళ్లి సంబంధం ఖాయమవుతుంది. ఉద్యోగంలో సమర్థతకు గుర్తింపు లభిస్తుంది. వృత్తి, వ్యాపారాల్లో మీ ఆలోచనలు, వ్యూహాలు రాబడిని పెంచుతాయి. ప్రముఖులతో పరిచయాలు కలుగుతాయి.