Shani Dev: శనీశ్వరుడు శుభ గ్రహమా? పాప గ్రహమా? మీ రాశిపై ఎలాంటి ప్రభావం ఉంటుందో తెలుసా?
Shani Dev: నిజానికి శని వల్లే చాలామంది రాజకీయంగా వెలిగిపోతుంటారు. సినీ నటులు ఐశ్వర్యవంతులవుతారు. అతి సాధారణ వ్యక్తులు సైతం వాణిజ్యవేత్తలయిపోతుంటారు. అటువంటి శనీశ్వరుడు శుభ గ్రహమా, పాపగ్రహమా అన్నది వివిధ రాశుల మీదా, ఈ గ్రహం స్థితిగతుల మీదా ఆధారపడి ఉంటుంది.
జ్యోతిష శాస్త్రం ప్రకారం శనీశ్వరుడు దాదాపు యమధర్మరాజుతో సమానం. ఈ గ్రహాన్ని కర్మ కారకుడని, కర్మసాక్షి అని కూడా అంటారు. క్రమశిక్షణకు మారుపేరైన శనీశ్వరుడు అహంకారానికి పూర్తిగా వ్యతిరేకి. వినయ విధేయతలున్నవారి జోలికిపోడు. ఒక టీచర్ మాదిరిగా జీవిత పాఠాలు నేర్పిస్తాడు కనుక శని గ్రహం మీద పాప గ్రహం అనే ముద్ర వేయడం జరిగింది. నిజానికి శని వల్లే చాలామంది రాజకీయంగా వెలిగిపోతుంటారు. సినీ నటులు ఐశ్వర్యవంతులవుతారు. అతి సాధారణ వ్యక్తులు సైతం వాణిజ్యవేత్తలయిపోతుంటారు. అటువంటి శనీశ్వరుడు శుభ గ్రహమా, పాపగ్రహమా అన్నది వివిధ రాశుల మీదా, ఈ గ్రహం స్థితిగతుల మీదా ఆధారపడి ఉంటుంది. ప్రస్తుతం ఈ శనీశ్వరుడు తన స్వక్షేత్రమైన కుంభ రాశిలో 2025 మార్చి వరకు సంచరించడం జరుగుతుంది.
మేషం: ఈ రాశికి 10, 11 స్థానాలకు, అంటే ఉద్యోగ, లాభ స్థానాలకు అధిపతి అయిన శనీశ్వరుడు పూర్తి స్థాయిలో శుభుడు కాడు. వృత్తి, ఉద్యోగాల పరంగా ఈ రాశివారికి ఎన్నో శుభ ఫలితాలను ఇచ్చే శనీశ్వరుడు మధ్య మధ్య ప్రతిబంధకాలు కూడా సృష్టిస్తుంటాడు. ఎక్కువగా శ్రమకు గురి చేస్తాడు. మంచి ఫలితాలను ఇస్తాడు కానీ వాటిని ఆలస్యంగా ఇవ్వడం జరుగుతుంది. పురోగతి ఇస్తాడు కానీ పరీక్షలకు గురి చేస్తుంటాడు. ప్రస్తుతం లాభ స్థానంలో ఉన్నందువల్ల ఉద్యోగ, ఆర్థిక స్థిరత్వం ఇస్తాడు.
వృషభం: ఈ రాశివారికి శనీశ్వరుడు 9, 10 స్థానాల అధిపతిగా పూర్ణ శుభుడు. పైగా రాశ్యధిపతి అయిన శుక్రుడికి ప్రాణ స్నేహితుడు. అందువల్ల ఈ రాశివారికి ఏ విధంగానూ ఇబ్బంది పెట్టడు. ప్రస్తుతం 10వ స్థానంలోనే సంచరిస్తున్నందు వల్ల ఉద్యోగపరంగా లాభాలు చేకూరుస్తాడు. విదేశీ యానా లకు అవకాశం ఉంటుంది. ఆకస్మిక ధన లాభ సూచనలున్నాయి. వృత్తి, ఉద్యోగాలపరంగా తప్పకుండా పురోగతి ఉంటుంది. తండ్రి వైపు నుంచి ఆశించిన సహాయ సహకారాలుంటాయి.
మిథునం: ఈ రాశివారికి 8, 9 స్థానాలకు అధిపతి అయిన శనీశ్వరుడు ఈ రాశికి పూర్ణ శుభుడు కాడు. అయితే, రాశ్యధిపతి అయిన బుధుడికి శనీశ్వరుడు మిత్రుడు అయినందువల్ల మరీ ఎక్కువగా ఇబ్బంది పెట్టడు. ఈ శనైశ్చరుడు ప్రస్తుతం ఈ రాశికి భాగ్య స్థానంలోనే సంచరిస్తున్నందువల్ల, ప్రతిఫలంతో కూడిన బరువు బాధ్యతలను అప్పగిస్తాడు. వృత్తి, ఉద్యోగాల్లో బాధ్యతలు బాగా పెరుగుతాయి. విశ్రాంతి కూడా దొరకని పరిస్థితి ఏర్పడుతుంది. తండ్రి వైపు నుంచి ఆస్తి కలిసి వస్తుంది.
కర్కాటకం: ఈ రాశికి సప్తమ, అష్టమాధిపతి అయిన శనీశ్వరుడు పూర్తి స్థాయిలో పాపి. తప్పకుండా సమస్యలు సృష్టిస్తాడు. ఈ రాశివారికి శని మారకుడు, అంటే మరణాన్ని కలిగించే గ్రహం కూడా. అయితే, ప్రస్తుతం ఈ రాశివారికి శని అష్టమ స్థానంలోనే సంచరిస్తున్నందువల్ల అది ఈ గ్రహానికి స్వక్షేత్రం అయినందువల్ల మరీ ఎక్కువగా ఇబ్బందులు పెట్టకపోవచ్చు. ఈ పరిస్థితి వ్యక్తిగతంగా అనుకూలం కానప్పటికీ, జీవిత భాగస్వామికి మాత్రం అనేక విధాలుగా ఉపకారం చేస్తుంది.
సింహం: ఆరు, ఏడు స్థానాలకు అధిపతిగా ఈ రాశికి శని పూర్తి పాపి. పైగా మరణాన్ని కలిగించే ‘మారక’ గ్రహం. ఈ రాశ్యధిపతి రవికి బద్ధ శత్రువు కూడా. అందువల్ల ఈ రాశివారికి శనీశ్వరుడు ఏ విధంగానూ యోగం కలిగించడు. అయితే, ప్రస్తుతం ఈ రాశికి 7వ రాశిలోనే స్వక్షేత్రంలో శని సంచరిస్తు న్నందువల్ల ఈ రాశికి మారకం కలిగించకపోగా వృత్తి, ఉద్యోగాల్లో నిదానంగా పురోగతిని తీసుకువస్తాడు. సప్తమంలో ఉన్న శనీశ్వరుడికి దిగ్బలం పట్టడం వల్ల కొద్దిగా శుభం చేయడం జరుగుతుంది.
కన్య: ఈ రాశికి అయిదు, ఆరు స్థానాలకు అధిపతి అయిన శని పూర్తి స్థాయిలో శుభుడు కాడు. అయితే, ఈ రాశ్యధిపతి బుధుడికి స్నేహితుడు కావడం వల్ల మధ్య మధ్య కొన్నిశుభ ఫలితాలను కూడా ఇస్తాడు. ఆటంకాలు, అవరోధాలు, అగ్నిపరీక్షల తర్వాత ఆశించిన శుభ ఫలితాలనిస్తాడు. పురోగతి ఉంటుంది కానీ ఆలస్యంగా అది చేతికి అందుతుంది. ప్రస్తుతం ఈ శనీశ్వరుడు ఈ రాశికి ఆరవ స్థానంలో సంచరిస్తూండడం వల్ల, వృత్తి, ఉద్యోగాలలో ఆశించిన పురోగతి లభిస్తుంది.
తుల: ఈ రాశికి నాలుగు, అయిదు స్థానాలకు అధిపతి అయినందువల్ల శనీశ్వరుడు పూర్తి శుభుడుగా ఎన్నో శుభ ఫలితాలను ఇస్తాడు. ప్రస్తుతం ఈగ్రహం అయిదవ స్థానంలోనే ఉన్నందువల్ల ఈ రాశి వారికి ఆలోచనలు, ప్రతిభా పాటవాలు పూర్తి స్థాయిలో రాణిస్తాయి. పిల్లలు ఆశించిన స్థాయిలో అభివృద్ధిలోకి వస్తారు. వృత్తి, వ్యాపారాల పరంగా ఈ రాశివారు ఐశ్వర్యవంతులవుతారు. ఉద్యోగా లలో ప్రాధాన్యం, ప్రాభవం బాగా పెరుగుతాయి. ఏ ప్రయత్నమైనా సత్ఫలితాలను ఇస్తుంది.
వృశ్చికం: ఈ రాశివారికి 3, 4 స్థానాల అధిపతిగా శనీశ్వరుడు ఈ రాశికి పూర్తి పాపి. పైగా రాశ్యధిపతికి బద్ధ శత్రువు కూడా అయినందువల్ల పురోగతిలో అనేక ఆటంకాలు సృష్టిస్తుంటాడు. ప్రస్తుతం నాలుగవ రాశిలో సంచరిస్తూ అర్ధాష్టమ శనిగా బాగా ఒత్తిడి పెంచుతాడు. శారీరక, మానసిక శ్రమకు గురి చేస్తాడు. ఈ నాలుగవ స్థానంలో శనికి స్వక్షేత్రం అయినందువల్ల ఎక్కువగా ఇబ్బందులు పెట్టే అవకాశం ఉండదు కానీ, చిన్నపాటి అనారోగ్యాలు, ఆర్థిక సమస్యలు ఇచ్చే అవకాశం ఉంది.
ధనుస్సు: ఈ రాశికి 2, 3 స్థానాల అధిపతిగా శని పూర్తి పాపి. అనారోగ్యాలు, ఆర్థిక సమస్యలను సృష్టిస్తూ, పురోగతికి అవరోధాలు కలగజేస్తుంటాడు. శ్రమ ఎక్కువ ఫలితం తక్కువ అన్నట్టుగా ఉంటుంది. అయితే, ప్రస్తుతం 3వ స్థానంలో సంచరిస్తున్నశనీశ్వరుడి వల్ల ఈ రాశివారికి శని అదృష్టాన్ని తెచ్చి పెడతాడు. పురోగతికి సంబంధించి ఎటువంటి అడ్డంకులున్నా తొలగిస్తాడు. జీవితం నల్లేరు మీది బండిలా సాగిపోతుంది. అనేక విధాలుగా అదృష్టాన్ని కలగజేస్తాడు. ఆరోగ్యం మెరుగుపడుతుంది.
మకరం: ఈ రాశికి 1, 2 స్థానాల అధిపతిగా శనీశ్వరుడు చాలావరకు శుభ ఫలితాలనే ఇస్తాడు. ఏలిన్నాటి శని సమయంలో కూడా తప్పనిసరిగా ఏదో ఒక అదృష్టాన్ని తెచ్చిపెడతాడు. ఒక్క మేష రాశిలో తప్ప మిగిలిన ఏ రాశుల్లో ఉన్నా మంచినే ఎక్కువగా చేస్తాడు. ప్రస్తుతం తన స్వక్షేత్రమైన ద్వితీయ రాశిలో సంచరిస్తున్నశనీశ్వరుడు ఆర్థిక స్థిరత్వాన్నిస్తాడు. ఆదాయాన్ని పెంచుతాడు. మాటకు, చేతకు కూడా విలువ పెరుగుతుంది. పలుకుబడి ఎక్కువవుతుంది. ఆరోగ్యం నిలకడగా ఉంటుంది.
కుంభం: ఈ రాశికి శనీశ్వరుడు 1, 12 స్థానాలకు అధిపతి అయినప్పటికీ, రాశ్యధిపతి అయినందువల్ల సాధారణంగా ఈ రాశివారికి ఉపకారం చేయడానికే ప్రయత్నిస్తాడు. వృద్ధాప్యంలో కూడా ఏదో ఒక అదృష్టాన్ని పట్టిస్తాడు. అయితే, మొదటి నుంచి వృత్తి, ఉద్యోగ, వ్యాపారాల్లో పని భారం కల్పిస్తూనే ఉంటాడు. ఇతరుల బాధ్యతలను కూడా నెత్తిన వేస్తుంటాడు. ఎక్కువగా సామాజిక సేవలను అప్పగిస్తాడు. ప్రస్తుతం ఇదే రాశిలో సంచరిస్తున్నందువల్ల కొద్దిగా ఉపశమనం లభించే అవకాశం ఉంటుంది.
మీనం: ఈ రాశివారికి శనీశ్వరుడు 11, 12 స్థానాలకు అధిపతి అయినందువల్ల పూర్ణ పాపి అవుతాడు. జీవితంలో అనేక సదవకాశాలను చేజార్చుకోవడం జరుగుతుంటుంది. వృత్తి, ఉద్యోగ, వ్యాపారాల్లో పురోగతి చెందడం బాగా కష్టమవుతుంది. ఇతర గ్రహాలు సహకరిస్తే తప్ప పురోగతి సాధ్యం కాదు. అయితే, ఈ రాశివారికి శనీశ్వరుడు ఎక్కువగా ఆధ్యాత్మిక చింతననిస్తాడు. ప్రస్తుతం వ్యయ స్థానంలో సంచరిస్తున్నందువల్ల ఆలయాల సందర్శన, తీర్థయాత్రలు బాగా ఎక్కువవుతాయి.