
కావలసిన పదార్థాలు: లేత బెండకాయలు పావు కిలో, నూనె 2 టేబుల్ స్పూన్లు, తాలింపు గింజలు (ఆవాలు, జీలకర్ర) అర టీస్పూన్, పచ్చిమిర్చి 3, కరివేపాకు 2 రెమ్మలు, దంచిన వెల్లుల్లి రెబ్బలు 6, ఉప్పు రుచికి సరిపడా, పసుపు పావు టీస్పూన్, కూర కారం 3 టీస్పూన్లు, పుట్నాల పప్పు పొడి 2 టీస్పూన్లు.

ముందుగా పావు కిలో లేత బెండకాయలను తీసుకుని నీటితో శుభ్రంగా కడగాలి. ఆ తర్వాత ఒక పొడి బట్టతో బెండకాయలపై తడి అస్సలు లేకుండా తుడవాలి. తడి లేకుండా తుడవడం వల్ల వేయించేటప్పుడు జిగురు రాకుండా ఉంటుంది. ఇప్పుడు బెండకాయల తొడిమలు కట్ చేసి, మరీ చిన్నవి కాకుండా మీడియం సైజు ముక్కలుగా కోసుకుని పక్కన పెట్టుకోవాలి.

ఇప్పుడు స్టవ్ మీద వెడల్పాటి పాన్ పెట్టి రెండు టేబుల్ స్పూన్ల నూనె వేసి వేడి చేయాలి. నూనె కాగిన తర్వాత అర టీస్పూన్ ఆవాలు, జీలకర్ర వేసి చిటపటలాడనివ్వాలి. ఆ తర్వాత నిలువుగా చీల్చిన మూడు పచ్చిమిర్చి, రెండు రెమ్మల కరివేపాకు వేసి దోరగా వేయించుకోవాలి.

తాలింపు వేగిన తర్వాత కట్ చేసి పెట్టుకున్న బెండకాయ ముక్కలను పాన్లో వేసి, మంటను మీడియం ఫ్లేమ్లో ఉంచి వేయించాలి. మూత పెట్టకుండా మధ్యమధ్యలో కలుపుతూ వేయించడం వల్ల బెండకాయలోని తేమ ఆవిరై ముక్కలు చక్కగా వేగుతాయి. ముక్కలు పూర్తిగా వేగి కాస్త క్రిస్పీగా మారిన తర్వాత దంచిన ఆరు వెల్లుల్లి రెబ్బలు, రుచికి సరిపడా ఉప్పు, పావు టీస్పూన్ పసుపు వేసి బాగా కలపాలి.

ఆ తర్వాత మసాలాలు కలిపిన మూడు టీస్పూన్ల కూర కారం వేసి, ముక్కలన్నింటికీ కారం పట్టేలా కలుపుకోవాలి. కూర కారం వాడటం వల్ల వేపుడుకు మంచి సువాసన, అద్భుతమైన రుచి వస్తాయి. చివరగా రెండు టీస్పూన్ల పుట్నాల పప్పు పొడి వేసి బాగా కలిపి స్టవ్ ఆఫ్ చేయాలి. పుట్నాల పొడి వేయడం వల్ల మిగిలిన తేమ కూడా పోయి ఫ్రై పొడిపొడిగా మారుతుంది. వేడివేడి అన్నంలో ఈ బెండకాయ ఫ్రై కలుపుకుని తిన్నా, చపాతీలోకి నంజుకుని తిన్నా ఎంతో రుచిగా ఉంటుంది.