వర్షాకాలం వచ్చేరోగాలను తరిమి కొట్టే అసలైన బ్రహ్మాస్త్రం.. ఈ పచ్చడి
Potlakaya Perugu Pachadi: మధ్యాహ్న భోజనంలోకి కూరలు బోర్ కొట్టినప్పుడు లేదా ఎండ తీవ్రతకు ఒంటికి చలవ చేసేలా ఏదైనా కమ్మగా తినాలనిపించినప్పుడు పెరుగు పచ్చడి అద్భుతమైన ఎంపిక. సాధారణంగా పొట్లకాయ అనగానే చాలా మంది కాస్త ముఖం చాటేస్తుంటారు. కానీ దాంతో పెరుగు పచ్చడి చేస్తే మాత్రం ప్లేట్ ఖాళీ అవ్వాల్సిందే.
బ్యాచిలర్స్ లేదా ఇప్పుడిప్పుడే వంట నేర్చుకునే వారు కూడా ఎలాంటి శ్రమ లేకుండా ఎంతో సులభంగా, అతి తక్కువ సమయంలోనే ఈ టేస్టీ అండ్ హెల్తీ పొట్లకాయ పెరుగు పచ్చడిని తయారు చేసుకోవచ్చు. ఇది అన్నంలోకి మాత్రమే కాకుండా చపాతీ, రొట్టెల్లోకి కూడా చాలా అద్భుతంగా ఉంటుంది.
ఈ పచ్చడి తయారీ కోసం మొదట ఒక బాణలిలో రెండు టేబుల్ స్పూన్ల నూనె వేడి చేయాలి. నూనె కాగాక అందులో అర టీస్పూన్ మెంతులు వేసి కాస్త రంగు మారేంత వరకు వేగనివ్వాలి. మెంతులు వేగడం వల్ల పచ్చడికి మంచి సువాసన వస్తుంది. ఆ తర్వాత అర టీస్పూన్ ఆవాలు వేసి చిటపటలాడించాలి. ఆపై ఒక టీస్పూన్ జీలకర్ర, ఒక టీస్పూన్ మినప్పప్పు, ఒక టీస్పూన్ శనగపప్పు వేసి తాలింపును ఎర్రగా వేయించుకోవాలి.
తాలింపు చక్కగా వేగాక అందులో ఒక ఎండుమిర్చి తరుగు, ఒక రెబ్బ కరివేపాకు వేసి బాగా కలుపుకోవాలి. ఇప్పుడు ఈ తాలింపులో దాదాపు 300 గ్రాముల లేత పొట్లకాయ ముక్కలను వేయాలి. అందులోనే పావు చెంచా పసుపు, రుచికి సరిపడా ఉప్పు వేసి బాగా కలిపి, ముక్కలను మగ్గనివ్వాలి. ఈ ముక్కలు మెత్తబడటానికి కనీసం 15 నుండి 18 నిమిషాల సమయం పడుతుంది. మధ్యమధ్యలో అడుగు అంటకుండా కలుపుతూ, మూత పెట్టి మీడియం ఫ్లేమ్పై ఉడికించుకోవాలి.
ఈలోగా ఒక చిన్న మిక్సీ జార్లో 4-5 పచ్చిమిర్చి, ఒక జంగు అల్లం ముక్క వేసి మెత్తని పేస్ట్లా గ్రైండ్ చేసుకోవాలి. పొట్లకాయ ముక్కలు బాగా మగ్గాక, ఈ అల్లం పచ్చిమిర్చి పేస్ట్ను అందులో వేసి ఒక నిమిషం పాటు వేయించి, స్టవ్ కట్టేసి ఆ మిశ్రమాన్ని పూర్తిగా చల్లారనివ్వాలి. మరో పక్క ఒక గిన్నెలో అర లీటర్ కమ్మని పెరుగును తీసుకుని ఎక్కడా గడ్డలు లేకుండా బాగా చిలుకుకోవాలి.
పెరుగును చక్కగా చిలికిన తర్వాత, అందులో ముందుగా ఉడికించి పూర్తిగా చల్లారబెట్టుకున్న పొట్లకాయ మిశ్రమాన్ని వేసి బాగా కలుపుకోవాలి. చివరగా ఇందులో ఒక చిన్న పచ్చి ఉల్లిపాయ ముక్కలను వేసి కలిపితే ఎంతో రుచికరమైన పొట్లకాయ పెరుగు పచ్చడి సిద్ధమవుతుంది. ఉల్లిపాయ ముక్కలను పచ్చిగా చివర్లో వేయడం వల్ల మనం తినేటప్పుడు అవి క్రించీగా తగులుతూ పచ్చడి రుచిని మరింత పెంచుతాయి.