గణపతి పూజ.. నానమ్మల స్టైల్లో పూర్ణం బూరెలు.. పర్ఫెక్ట్గా రావాలంటే ఇదే సీక్రెట్!
పండుగలైనా, ప్రత్యేక సందర్భాలైనా తెలుగువారికి ఇష్టమైన సాంప్రదాయ పిండివంటలలో పూర్ణం బూరెలు ముందుంటాయి. కరకరలాడే పై పొర, నోటిలో కరిగిపోయే తీయని పూర్ణంతో వీటి రుచి అద్భుతం. చాలామందికి పూర్ణం బూరెలు తయారుచేయడం ఒక సవాలుగా అనిపించినా, కొన్ని ప్రత్యేక చిట్కాలు, సరైన పద్ధతులను పాటిస్తే ప్రతిసారీ సంపూర్ణంగా బూరెలు సిద్ధమవుతాయి. ఈ పూర్ణం బూరెలు తయారుచేసే విధానాన్ని ఇక్కడ చూద్దాం.
పూర్ణం బూరెల పై పొర పర్ఫెక్ట్గా రావడానికి పిండి తయారీ చాలా కీలకం. ముందుగా, ఒక కప్పు బియ్యం (రేషన్ బియ్యం లేదా సాధారణ బియ్యం) ముప్పావు కప్పు మినపగుళ్ళు తీసుకోవాలి. వీటిని రెండు మూడు సార్లు శుభ్రంగా కడిగి, కనీసం నాలుగైదు గంటలు నానబెట్టాలి. రాత్రి నానబెట్టి ఉదయం చేసుకోవచ్చు.
నానిన పప్పు, బియ్యాన్ని విడివిడిగా రుబ్బుకోవడం వల్ల ఉత్తమ ఫలితాలు వస్తాయి. మినపపప్పును నీళ్లు వంపేసి, కొద్దికొద్దిగా నీరు చేరుస్తూ మెత్తగా, కాటుకలా గ్రైండ్ చేసుకోవాలి. పప్పు ఎంత మెత్తగా ఉంటే అంత ఉదుగ్గా వస్తుంది. బియ్యాన్ని మాత్రం మరీ మెత్తగా కాకుండా, కాస్త రవ్వ రవ్వలా (బరకగా) రుబ్బాలి. ఇది బయటి పొర కరకరలాడటానికి సహాయపడుతుంది. రుబ్బిన బియ్యప్పిండి, మినప్పప్పు పిండిని ఒక గిన్నెలో కలిపి, రెండు టీస్పూన్ల చక్కెర, చిటికెడు ఉప్పు వేసి బాగా కలపాలి.
ఈ చక్కెర బూరెలకు మంచి రంగును ఇస్తుంది. ఈ పిండిని పూర్ణం తయారుచేసే వరకు పక్కన పెట్టాలి. పిండి కాస్త గట్టిగా అనిపిస్తే వేయించే ముందు కొద్దిగా నీళ్లు చేర్చవచ్చు. వంట సోడా వేయడం (వెంటనే చేసేట్లయితే) బూరెలు కరకరలాడేలా చేస్తుంది. పూర్ణం బూరెలకు రుచిని ఇచ్చేది లోపలి పూర్ణమే. ఒక కప్పు పచ్చిశనగపప్పును శుభ్రంగా కడిగి, ఒకటి రెండు గంటలు నానబెట్టాలి. నానిన పప్పులోని నీరు వంపేసి, కుక్కర్లో తీసుకోవాలి. ఏ కప్పుతో పప్పు తీసుకున్నామో అదే కప్పుతో ఒకటిన్నర కప్పు నీళ్లు, ఒక టీస్పూన్ నెయ్యి కలిపి మూడు నాలుగు విజిల్స్ వచ్చే వరకు ఉడికించాలి. నెయ్యి వేయడం వల్ల పప్పు పొంగిపోకుండా ఉంటుంది.
పప్పు మెత్తగా ఉడికిన తర్వాత, అందులో అదనపు నీరు లేకుండా చూసి, మిక్సీలో మెత్తగా గ్రైండ్ చేసుకోవాలి. ఇప్పుడు ఒక కడాయిలో ఒక కప్పు బెల్లం, ఒకటి రెండు టీస్పూన్ల నీళ్లు లేదా నెయ్యి వేసి, తక్కువ మంటపై బెల్లం కరిగే వరకు ఉడికించాలి. బెల్లం పూర్తిగా కరిగిన తర్వాత, గ్రైండ్ చేసుకున్న పచ్చిశనగపప్పు పేస్ట్ను చేర్చి, బాగా కలిపి, మీడియం మంటపై మూడు నాలుగు నిమిషాలు ఉడికించాలి. పూర్ణం పాన్కు అంటుకోకుండా విడివడుతుందంటే అది సరైన పాకానికి వచ్చినట్లు.
ఈ దశలో, అర టీస్పూన్ యాలకుల పొడి, ఒక టీస్పూన్ సోంపు ఒక టేబుల్ స్పూన్ నెయ్యి వేసి బాగా కలిపి, మరో రెండు నిమిషాలు ఉడికించి స్టవ్ ఆఫ్ చేయాలి. పూర్ణం చల్లారిన తర్వాత చేతికి నెయ్యి రాసుకొని చిన్న చిన్న ఉండలుగా చేసుకోవాలి. పూర్ణం పలుచబడినట్లయితే, రెండు టేబుల్ స్పూన్ల బొంబాయి రవ్వను దోరగా వేయించి పూర్ణంలో కలిపితే ఐదు నిమిషాల్లో గట్టిపడుతుంది. మిగిలిన పూర్ణాన్ని ఫ్రిజ్లో ఐదు ఆరు రోజుల వరకు నిల్వ చేసుకోవచ్చు.