పాన్ ప్రియుల్లారా హెచ్చరిక.. కిళ్లీ అందరికీ సెట్ కాదు.. ఈ 5 రకాల ఆరోగ్య సమస్యలు ఉన్నవారికి వేరీ డేంజర్!
మన దేశంలో శుభకార్యాలు, పండుగలు లేదా భారీ విందు భోజనాల తర్వాత తాంబూలం లేదా పాన్ వేసుకోవడం ఒక సాంప్రదాయంగా వస్తోంది. తమలపాకులో సున్నం, వక్క, యాలకులు, గుల్కండ్ వంటి రకరకాల పదార్థాలను కలిపి తయారుచేసే పాన్ నోటికి మంచి రుచిని ఇవ్వడమే కాకుండా.. లాలాజలాన్ని ఊరించి జీర్ణక్రియను మెరుగుపరుస్తుందని చాలామంది నమ్ముతారు. అయితే, నూతన పరిశోధనలు, ఆరోగ్య నిపుణుల హెచ్చరికల ప్రకారం, పాన్ తినడం అందరికీ ఆరోగ్యకరం కాదు. కొన్ని ప్రత్యేక ఆరోగ్య పరిస్థితులలో ఉన్నవారు పాన్కు ఎంత దూరంగా ఉంటే అంత మంచిది. ఆ వివరాలు ఇప్పుడు చూద్దాం.
గర్భిణీలు, పాలిచ్చే తల్లులు: గర్భవతులుగా ఉన్న మహిళలు, చిన్న పిల్లలకు పాలిచ్చే తల్లులు పాన్ తినడానికి అస్సలు సాహసించకూడదు. పాన్లో ఉపయోగించే వక్క (Betel Nut), కొన్ని రకాల సుగంధ ద్రవ్యాలు కడుపులోని పిండం ఎదుగుదలపై తీవ్ర ప్రభావం చూపుతాయి. ఇది పుట్టబోయే బిడ్డ ఆరోగ్యానికి హాని కలిగించడమే కాకుండా, పాలిచ్చే తల్లుల ద్వారా శిశువు శరీరంలోకి చేరే ప్రమాదం ఉంది.
కడుపులో అల్సర్లు, గ్యాస్ సమస్యలు ఉన్నవారు: పాన్ తయారీలో ఉపయోగించే సున్నం, కాచు (కథా), ఘాటైన మసాలాలు జీర్ణవ్యవస్థను ప్రేరేపిస్తాయి. ఇప్పటికే కడుపులో అల్సర్లు (Ulcers) లేదా తీవ్రమైన అసిడిటీ సమస్యలతో బాధపడేవారు పాన్ తింటే, ఆయా పదార్థాలు కడుపులోని పొరలను మరింత ఇరిటేట్ చేస్తాయి. దీనివల్ల కడుపులో మంట, నొప్పి తీవ్రతరమవుతాయి.
మధుమేహం (డయాబెటిస్) ఉన్నవారు: నేటి కాలంలో మీఠా పాన్ (Sweet Paan) తినడానికి చాలామంది ఇష్టపడుతుంటారు. ఇందులో రుచి కోసం గుల్కండ్, కొబ్బరి పొడి, చెర్రీస్, వివిధ రకాల తీపి సిరప్లను అధికంగా కలుపుతారు. ఇవి రక్తంలో చక్కెర స్థాయిలను (Sugar Levels) ఒక్కసారిగా పెంచేస్తాయి. కాబట్టి, డయాబెటిస్ రోగులు ఇటువంటి తీపి పాన్లకు పూర్తిగా దూరంగా ఉండాలి.
అధిక రక్తపోటు (హై బీపీ) రోగులు: పాన్ తిన్నప్పుడు శరీరంలో ఒక రకమైన ఉత్తేజం వస్తుంది. అయితే, హైపర్టెన్షన్ లేదా అధిక రక్తపోటు ఉన్నవారిలో ఇది గుండె కొట్టుకునే వేగాన్ని, బీపీ స్థాయిలను మరింత పెంచే అవకాశం ఉంది. అలాగే గుండె జబ్బుల ప్రమాదం ఉన్నవారు కూడా దీనికి దూరంగా ఉండటం శ్రేయస్కరం.
నోటి ఇన్ఫెక్షన్లు, చిగుళ్ల సమస్యలు ఉన్నవారు: నోటిలో పుండ్లు (Mouth Ulcers) ఉన్నప్పుడు లేదా చిగుళ్ల నుండి రక్తం కారే సమస్యలు ఉన్నప్పుడు పాన్ నమలడం వల్ల అందులోని సున్నం ఆ గాయాలను మరింత పెద్దవిగా చేస్తుంది. ఇది నోటి నొప్పులను పెంచడమే కాకుండా ఇన్ఫెక్షన్లకు దారితీస్తుంది. సహజంగా తమలపాకు మాత్రమే తినడం వల్ల కొన్ని ఆరోగ్య ప్రయోజనాలు ఉన్నప్పటికీ, మార్కెట్లో దొరికే రకరకాల మిశ్రమాలతో కూడిన పాన్ అందరి శరీర తత్వానికి పడదు. ముఖ్యంగా పైన పేర్కొన్న ఆరోగ్య సమస్యలు ఉన్నవారు వైద్యుల సలహా తీసుకోకుండా పాన్ జోలికి వెళ్లకపోవడమే మంచిది. లేదంటే, సమస్యలు కొనితెచ్చుకున్నట్లవుతుందని నిపుణులు హెచ్చరిస్తున్నారు.