PM Maandhan Yojana: ఈ కేంద్ర ప్రభుత్వ పథకంలో చేరండి.. నెలకు రూ. 3000 పెన్షన్ పొందండి..
దేశంలోని అసంఘటిత కార్మికుల సంక్షేమం కోసం కేంద్ర ప్రభుత్వం ప్రధాన మంత్రి శ్రమ యోగి మంధన్ యోజన (పీఎం మంధన్ యోజన)ను తీసుకువచ్చిన విషయం తెలిసిందే.
దేశంలోని అసంఘటిత కార్మికుల సంక్షేమం కోసం కేంద్ర ప్రభుత్వం ప్రధాన మంత్రి శ్రమ యోగి మంధన్ యోజనను తీసుకువచ్చిన విషయం తెలిసిందే. ఈ పథకం కింద అసంఘటిత రంగాల్లో పనిచేస్తున్న 60 ఏళ్లు పైబడిన వారికి పెన్షన్ సౌకర్యం లభిస్తుంది. వారి ఆర్థిక స్థితిని మెరుగుపరిచేందుకు ఈ పింఛన్ ఉపకరిస్తుంది.
ఈ పథకం కింద నెలకు కనీసం 3 వేల రూపాయలు ఇస్తారు. పెన్షన్ సమయంలో వ్యక్తి మరణిస్తే లబ్ధిదారుని భార్య లేదా భర్త పెన్షన్‌లో 50 శాతం పొందుతారు.
నెలకు 15 వేల రూపాయల వరకు సంపాదించే వారికి ఈ పథకం ప్రయోజనం అందుతుంది. అలాగే, పథకంలో చేరే వ్యక్తి వయస్సు 18 నుండి 40 సంవత్సరాల మధ్య ఉండాలి.
ఈ పథకం కింద, మీరు పెన్షన్ ప్లాన్‌లో ఎంత మొత్తాన్ని డిపాజిట్ చేస్తే, ప్రభుత్వం కూడా అదే మొత్తాన్ని జమ చేస్తుంది. ఇందులో రూ. 55 నుంచి 200 రూపాయల వరకు డిపాజిట్ చేసుకోవచ్చు. ఈ పథకం ప్రయోజనాన్ని పొందడానికి.. మీరు పేరు రిజిస్టర్ చేసుకోవడం తప్పనిసరి.
ఈ పథకంలో చేరాలంటే.. తప్పనిసరిగా ఆధార్ కార్డు, బ్యాంక్ ఖాతాను కలిగి ఉండాలి. అప్పుడే సదరు వ్యక్తి ఈ పథకం ప్రయోజనాన్ని పొందగలరు. ఇందుకోసం దీని కోసం మీరు సమీప CACని సంప్రదించాలి. పథకంలో రిజిస్ట్రేషన్ కోసం.. ఆధార్ కార్డు, బ్యాంకు ఖాతాకు సంబంధించిన పూర్తి వివరాలను అందించాల్సి ఉంటుంది. ఆ తర్వాత బయోమెట్రిక్స్ డేటా రికార్డ్ చేయడం జరుగుతుంది.
రిజిస్ట్రేషన్ పూర్తయిన తరువాత ఒక కార్డు ఇస్తారు. అదే శ్రమ యోగి పెన్షన్ కార్డ్. ఇందులో మీ రిజిస్ట్రేషన్ నెంబర్ ఉంటుంది. భవిష్యత్తులో ఈ నంబర్ ద్వారా మాత్రమే మీ ఖాతాకు సంబంధించిన సమాచారాన్ని తెలుసుకునే వీలు ఉంటుంది.