కడుపులోని గ్యాస్, ఎసిడిటీ నిమిషాల్లో తగ్గడం పక్కా.. రోజూ ఉదయాన్నే ఇది తాగితే చాలు..
నేటి ఉరుకుల పరుగుల జీవనశైలి, శారీరక శ్రమ లేకపోవడం, వేళాపాల లేని ఆహారపు అలవాట్లు, మితిమీరిన జంక్ ఫుడ్ తినడం వల్ల చాలా మంది గ్యాస్, అసిడిటీ, అజీర్ణం లేదా తీవ్రమైన మలబద్ధకంతో బాధపడుతున్నట్లు గణాంకాలు చెబుతున్నాయి. ఉదయాన్నే కడుపు సరిగ్గా శుభ్రపడకపోతే రోజంతా బరువుగా, చిరాకుగా, తీవ్రమైన నీరసంగా అనిపిస్తుంది. ఈ సమస్యలను ప్రారంభంలోనే పట్టించుకోకపోతే భవిష్యత్తులో పైల్స్, ఫిషర్స్ వంటి తీవ్రమైన దీర్ఘకాలిక సమస్యలకు దారితీసే ప్రమాదం ఉంది.
జీర్ణ సమస్యలకు సరళమైన సహజ పరిష్కారాన్ని ప్రముఖ వైద్య నిపుణులు డాక్టర్ సలీం జైదీ సూచించారు. ఆయన తెలిపిన వివరాల ప్రకారం.. వంటింట్లో ఉండే చియా గింజలు కడుపును సహజంగా శుభ్రపరచడంలో సంజీవనిలా పనిచేస్తాయి. చియా విత్తనాలలో కరిగే, కరగని ఫైబర్ పుష్కలంగా ఉంటుంది. ఈ పీచు పదార్థం ప్రేగుల కదలికలను వేగవంతం చేసి, మలాన్ని సులభంగా బయటకు పంపడానికి తోడ్పడుతుంది. నిరంతరం మలబద్ధకంతో బాధపడేవారికి ఇది మేలైన ఉపశమనాన్ని ఇస్తుంది.
చియా గింజల ప్రత్యేకత వాటి నిర్మాణంలోనే ఉంది. వీటిని నీటిలో నానబెట్టినప్పుడు, అవి తమ బరువు కంటే పది రెట్ల నీటిని పీల్చుకుని ఒక జిగురు లాంటి జెల్ రూపంలోకి మారతాయి. ఈ జెల్ పేగుల లోపలి గోడలకు ఒక రక్షణ పొరలా ఏర్పడి, పేరుకుపోయిన వ్యర్థాలను చీపురులా శుభ్రం చేస్తుంది. అంతేకాకుండా ఈ గింజలు పేగులలోని మంచి బ్యాక్టీరియాకు ఆహారంగా పనిచేసి వాటి వృద్ధిని పెంచుతాయి. ఫలితంగా కడుపుబ్బరం, తీవ్రమైన అసిడిటీ మరియు గ్యాస్ వంటి సమస్యలు సహజంగానే తగ్గుముఖం పడతాయి.
జీర్ణవ్యవస్థను మెరుగుపరచడమే కాకుండా శరీర బరువును అదుపులో ఉంచడానికి కూడా ఇవి చక్కగా సహకరిస్తాయి. నీటిలో నానబెట్టిన చియా గింజలను తీసుకున్నప్పుడు అవి కడుపులో ఉబ్బి, ఎక్కువ సమయం పాటు ఆకలి వేయకుండా చూస్తాయి. దీనివల్ల అనవసరమైన చిరుతిళ్లు తినే అలవాటు తగ్గి, బరువు తగ్గాలనుకునే వారికి అనుకూల ఫలితాలు వస్తాయి. వీటికి తోడు వీటిలో పుష్కలంగా ఉండే ఒమేగా 3 ఫ్యాటీ యాసిడ్లు శరీరంలోని చెడు కొలెస్ట్రాల్ను తగ్గించి గుండె ఆరోగ్యాన్ని కాపాడతాయి.
ఈ గింజలను ఎలా తీసుకోవాలనే విషయంలో నిపుణులు కొన్ని స్పష్టమైన జాగ్రత్తలు సూచిస్తున్నారు. ఎండుగా ఉండే చియా గింజలను ఎప్పుడూ నేరుగా మింగకూడదు. అవి గొంతులో లేదా అన్నవాహికలో అడ్డుపడే ప్రమాదం ఉంది. రాత్రి సమయంలో ఒక గ్లాసు నీటిలో ఒక చెంచా చియా గింజలను వేసి నానబెట్టాలి. ఉదయం పరగడుపున ఆ నీటిని కొద్దిగా నిమ్మరసం లేదా కొబ్బరి నీటితో కలిపి 20 నుంచి 30 నిమిషాల పాటు ఉంచితే అది మెత్తని జెల్లీలా మారుతుంది. ఈ మిశ్రమాన్ని పరగడుపున నెమ్మదిగా నమిలి తాగడం ఉత్తమం.
చియా గింజలతో పాటు జీర్ణక్రియ సమతుల్యంగా ఉండాలంటే రోజుకు కనీసం రెండున్నర నుంచి మూడు లీటర్ల నీరు తప్పనిసరిగా తాగాలి. తగినంత నీరు తాగకపోతే అధిక పీచు పదార్థం జీర్ణమవడం కష్టమై మరోసారి కడుపుబ్బరం వచ్చే అవకాశం ఉంది. మీ రోజువారీ ఆహారంలో సమతుల్య పోషకాలు, సరిపడా నీరు, ఈ చియా డ్రింక్ను భాగం చేసుకుంటే కడుపు సంబంధిత సమస్యలకు శాశ్వతంగా స్వస్తి పలకవచ్చు. (గమనిక: ఈ వివరాలు సాధారణ సమాచారం, ఆరోగ్య అవగాహన కోసం మాత్రమే. ఏదైనా కొత్త ఆహారపు అలవాటును ప్రారంభించే ముందు లేదా దీర్ఘకాలిక కడుపు సమస్యలు, ఇతర అనారోగ్య సమస్యలతో బాధపడుతుంటే వైద్యులు లేదా న్యూట్రిషనిస్టును సంప్రదించడం మంచిది.)