చేపలు కొంటున్నారా.. అవి తాజాగా ఉన్నాయో లేదో గుర్తించడం ఎలా? ఈ 4 ముఖ్యమైన చిట్కాలు మర్చిపోవద్దు!
మాంసం ప్రియులు చికెన్, మటన్ తో పాటుగా చేపలు కూడా ఎక్కువగా ఇష్టంగా తింటూ ఉంటారు. కేవలం ఫిష్ లవర్ మాత్రమే కూడా ఉంటారు. సాధారణంగా అందరూ చేపలను కొనుగోలు చేసేటప్పుడు వాటి పరిమాణం లేదా ధరపై మాత్రమే దృష్టి పెడతారు. కానీ, అసలు విషయం వాటి తాజాదనంపైనే ఉండాలి. పాడైపోయిన చేపలు రుచిని పాడు చేయడమే కాకుండా మీ ఆరోగ్యానికి కూడా హాని కలిగిస్తాయి. కొనుగోలు చేసే సమయంలో చేప తాజాగా ఉందో లేదో గుర్తించడానికి మీరు ఉపయోగించగల కొన్ని సులభమైన పద్ధతులు ఉన్నాయి. ఆ ముఖ్యమైన విషయాలను తెలుసుకుందాం.
చేపలు ఆరోగ్యానికి ఎంతో మేలు చేసే ఆహారం. వీటిలో ఒమేగా-3 ఫ్యాటీ యాసిడ్స్, ప్రోటీన్లు పుష్కలంగా ఉంటాయి. అయితే, చేపలు త్వరగా పాడయ్యే స్వభావాన్ని కలిగి ఉంటాయి. కాబట్టి, మార్కెట్ నుండి చేపలు కొనేటప్పుడు అవి తాజాగా ఉన్నాయా లేదా అని నిర్ధారించుకోవడం చాలా అవసరం. పాత చేపలను తినడం వల్ల ఆరోగ్య సమస్యలు వచ్చే అవకాశం ఉంది. తాజా చేపలను గుర్తించడానికి ఈ క్రింది 4 అంశాలను తప్పనిసరిగా చెక్ చేయండి..
చేప కళ్లు: చేప తాజాదనాన్ని పరీక్షించడానికి కళ్లు మొదటి నిదర్శనం. తాజా చేప కళ్లు ప్రకాశవంతంగా, స్పష్టంగా, బయటకు పొడుచుకు వచ్చినట్లు ఉంటాయి. ఒకవేళ చేప కళ్లు లోపలికి వెళ్ళిపోయి, మసకబారి లేదా తెల్లగా కనిపిస్తుంటే, ఆ చేప పాతదని అర్థం చేసుకోవాలి.
మొప్పల రంగు (Gills): చేప మొప్పలను జాగ్రత్తగా పరిశీలించండి. తాజాగా ఉన్న చేప మొప్పలు ముదురు ఎరుపు లేదా గులాబీ రంగులో ఉంటాయి. ఒకవేళ మొప్పలు గోధుమ రంగులోకి మారినా లేదా బూడిద రంగులో ఉన్నా, ఆ చేప చాలా రోజుల క్రితం పట్టినదని గ్రహించండి. తాజా చేప మొప్పల నుండి ఎలాంటి వింతైన వాసన రాకూడదు.
చర్మం, మెరుపు: చేప చర్మాన్ని గమనించండి. తాజా చేప చర్మంపై సహజమైన మెరుపు ఉంటుంది. చర్మాన్ని మీ వేలితో మెల్లగా నొక్కి చూడండి. తాజా చేప మాంసం దృఢంగా ఉండి, వేలు తీయగానే వెంటనే పూర్వ స్థితికి వస్తుంది. చర్మం మెరుపు తగ్గి, పాలిపోయినట్లుగా ఉంటే, నొక్కినప్పుడు గుంత పడితే అది పాత చేప అని గుర్తుంచుకోండి.
వాసన: చేపల నుండి వచ్చే వాసన వాటి తాజాదనాన్ని స్పష్టంగా తెలియజేస్తుంది. తాజా చేపలు స్వచ్ఛమైన సముద్రపు లేదా నీటి వాసనను కలిగి ఉంటాయి. ఒకవేళ చేప నుండి ఘాటైన, కుళ్ళిన లేదా అమోనియా వంటి దుర్వాసన వస్తుంటే, వాటిని కొనకపోవడమే మంచిది. చేపలు కొనడం ఒక కళ. ఈ చిన్నపాటి జాగ్రత్తలు పాటించడం ద్వారా మీరు నాణ్యమైన చేపలను ఎంచుకోవచ్చు.