మార్కెట్ వద్దు.. ఇంటి పెరట్లోనే తియ్యటి ఆర్గానిక్ బీట్రూట్.. కుండీల్లో సులభంగా పెంచే అద్భుతమైన చిట్కాలు!
ఆరోగ్యకరమైన జీవనశైలి కోసం నేటి కాలంలో చాలామంది ఆర్గానిక్ కూరగాయల వైపు మొగ్గు చూపుతున్నారు. అందుకోసం కిచెన్ గార్డెనింగ్ ఉత్తమమైన మార్గం. ముఖ్యంగా ఐరన్, విటమిన్లు పుష్కలంగా ఉండే బీట్రూట్ను (Beetroot) మన ఇంట్లోనే చాలా సులభంగా పండించవచ్చు. మార్కెట్లో కొనే వాటి కంటే ఇంట్లో ఎటువంటి కల్తీ, రసాయనాలు లేకుండా పండించిన బీట్రూట్ రుచిలో మరింత తియ్యగా ఉంటుంది. బీట్రూట్ ఒక రూట్ క్రాప్ కాబట్టి, కొన్ని చిన్న జాగ్రత్తలు తీసుకుంటే కుండీల్లోనే అద్భుతమైన దిగుబడి సాధించవచ్చు.
బీట్రూట్ ఆరోగ్యానికి ఎంతో మేలు చేస్తుంది. రక్తాన్ని పెంచడంలో అద్భుతమైన మేలు చేస్తుంది. జ్యూస్లు, సలాడ్లలో దీనిని విరివిగా వాడుతుంటారు. అయితే, మార్కెట్లో కెమికల్స్ వేసి పండించే వాటికంటే, ఇంట్లోనే పూర్తిగా సేంద్రియ (Organic) పద్ధతిలో బీట్రూట్ను సులభంగా పెంచవచ్చు. దీనికోసం పెద్ద పొలాలు అవసరం లేదు, కేవలం 10-12 ఇంచుల లోతున్న చిన్న కుండీ లేదా గ్రో బ్యాగ్ కూడా సరిపోతుంది. సరైన మట్టి మిశ్రమం, విత్తనాలు నాటే పద్ధతి, నీటి యాజమాన్యాన్ని పాటిస్తే చాలు, ఇంట్లోనే తియ్యని, రసాయనాలు లేని తాజా బీట్రూట్ను కోసుకోవచ్చు. కిచెన్ గార్డెన్లో బీట్రూట్ పెంపకానికి సంబంధించిన పూర్తి గైడ్ ఇక్కడ చూద్దాం..
సరైన కుండీ పరిమాణం ఎంచుకోవడం: బీట్రూట్ దుంపలు మట్టి లోపల ఎదుగుతాయి. కాబట్టి, వాటికి తగినంత స్థలం అవసరం. దీనికోసం కనీసం 10 నుండి 12 ఇంచుల లోతు, వెడల్పు ఉన్న కుండీలు లేదా గ్రో బ్యాగులను ఎంచుకోవాలి. ముఖ్యంగా, కుండీ అడుగు భాగంలో అదనపు నీరు బయటకు పోవడానికి డ్రైనేజీ రంధ్రం (Drainage hole) ఖచ్చితంగా ఉండాలి. నీరు నిలిచిపోతే దుంపలు కుళ్ళిపోతాయి.
మట్టి మిశ్రమం (Potting Mix) తయారీ: బీట్రూట్ పెంపకానికి మట్టి చాలా గుల్లగా, మెత్తగా ఉండాలి. గట్టి మట్టి ఉంటే దుంపలు సరిగ్గా ఊరవు. 40శాతం సాధారణ తోట మట్టి, 40 వర్మీ కంపోస్ట్ లేదా బాగా మాగిన పశువుల ఎరువు, 20శాతం కోకోపీట్ కలిపి కుండీలను నింపాలి. ఈ మిశ్రమం మొక్క వేర్లకు గాలి ఆడేలా చేసి, తేమను సమంగా ఉంచుతుంది.
విత్తనాలు నాటే పద్ధతి: బీట్రూట్ విత్తనాలను నేరుగా కుండీల్లోనే నాటుకోవచ్చు. విత్తనాన్ని మట్టిలో కేవలం అర ఇంచ్ లోతులో నాటాలి. ఒకటి కంటే ఎక్కువ విత్తనాలు నాటుతున్నప్పుడు, మొక్కల మధ్య కనీసం 3 నుండి 4 ఇంచుల దూరం ఉండేలా చూసుకోవాలి. విత్తనాలు నాటిన తర్వాత తక్కువ మోతాదులో నీరు చల్లాలి. సాధారణంగా 5 నుండి 10 రోజుల్లో మొలకలు వస్తాయి.
ఎండ, నీటి యాజమాన్యం: బీట్రూట్ మొక్క ఆరోగ్యంగా పెరగడానికి రోజుకు కనీసం 5 నుండి 6 గంటల ప్రత్యక్ష సూర్యరశ్మి (Sunlight) అవసరం. మట్టిలో ఎల్లప్పుడూ తేమ ఉండేలా చూసుకోవాలి, కానీ ఎక్కువ నీరు పోయకూడదు. విత్తనాలు నాటిన 60 నుండి 70 రోజుల్లో తాజా బీట్రూట్ కోతకు సిద్ధమవుతుంది. దుంపలు భూమి పైకి కొద్దిగా కనిపిస్తున్నప్పుడు వాటిని సున్నితంగా వేరుతో సహా లాగి హార్వెస్ట్ చేసుకోవచ్చు. ఈ రోజే మీ కిచెన్ గార్డెన్లో దీనిని ప్రయత్నించండి!