పుట్టగొడుగులను నీటితో కడుగుతున్నారా..? మీరు పప్పులో కాలేసినట్టే.. ఈ తప్పులు అస్సలు చేయొద్దు..
ఈ రోజుల్లో ప్రతి వంటగదిలోనూ పుట్టగొడుగుల వాడకం విపరీతంగా పెరిగిపోయింది. పిజ్జా, పాస్తా, మష్రూమ్ బిర్యానీ, గ్రేవీ కూరలు.. ఇలా ఐటమ్ ఏదైనా సరే అందులో పుట్టగొడుగులు ఉంటే ఆ రుచే వేరు. అయితే పుట్టగొడుగులను వండటానికి ముందు వాటిని శుభ్రం చేయడం చాలా మందికి ఒక పెద్ద తలనొప్పి వ్యవహారం. మార్కెట్ నుండి తెచ్చిన పుట్టగొడుగులపై నల్లటి మచ్చలు, మురికి, మట్టి పేరుకుపోయి ఉంటాయి.
చాలా మంది చేసే తప్పు ఏంటంటే.. వాటిని నేరుగా నీటి ట్యాప్ కింద పెట్టి కడిగేస్తుంటారు. కానీ నిపుణుల అభిప్రాయం ప్రకారం ఇది అస్సలు సరైన పద్ధతి కాదు. ఎందుకంటే పుట్టగొడుగులు ఒక స్పాంజ్ లాంటివి. నీటిని చాలా వేగంగా పీల్చేసుకుంటాయి. దీనివల్ల వండిన తర్వాత వాటి అసలు రుచి మారిపోయి, చప్పగా తయారవుతాయి. మరి ఎక్కువ నీరు వాడకుండా, పుట్టగొడుగులను మల్లెపూవుల్లా తెల్లగా మార్చడం ఎలాగో ఈ సింపుల్ కిచెన్ టిప్స్ ద్వారా తెలుసుకుందాం...
పొడి పిండి మ్యాజిక్: ఇది పుట్టగొడుగులను క్లీన్ చేయడానికి మోస్ట్ ఎఫెక్టివ్ పద్ధతి. పుట్టగొడుగులను ఒక గిన్నెలో తీసుకుని, వాటిపై కొద్దిగా పొడి గోధుమ పిండిని చల్లాలి. ఇప్పుడు చేతులతో వాటిని మెల్లగా రుద్దాలి. పిండికి ఉండే గుణం వల్ల అది పుట్టగొడుగులపై ఉన్న మురికిని, నల్ల మచ్చలను, తేమను ఈజీగా లాగేస్తుంది. ఆ తర్వాత వాటిని గోరువెచ్చని నీటిలో కేవలం ఒకసారి త్వరగా ముంచి తీసి, వెంటనే పొడి గుడ్డతో తుడిచేయాలి. దీనివల్ల పుట్టగొడుగులు నీటిని పీల్చుకోవు, ఆకృతి కూడా పాడవ్వదు.
తడి గుడ్డతో సురక్షితమైన క్లీనింగ్: మార్కెట్ నుండి తెచ్చిన పుట్టగొడుగులు మరీ అంత మురికిగా లేనప్పుడు ఈ పద్ధతిని వాడటం చాలా సేఫ్. ఒక శుభ్రమైన కిచెన్ టవల్ లేదా కాటన్ గుడ్డను తీసుకుని, లైట్గా తడపాలి. ఇప్పుడు, ఆ తడి గుడ్డతో ప్రతి పుట్టగొడుగును మెల్లగా తుడవాలి. ఇలా చేయడం వల్ల వాటిని అస్సలు నీటిలో ముంచకుండానే పైనున్న దుమ్ము, ధూళి మొత్తం క్లీన్ అయిపోతాయి. పుట్టగొడుగుల సహజమైన రుచి మిస్ అవ్వకూడదనుకుంటే ఇదే బెస్ట్ వే.
గోరువెచ్చని ఉప్పు నీటి ఫార్ములా: కొన్నిసార్లు పుట్టగొడుగులపై మట్టి చాలా ఎక్కువగా, గట్టిగా అంటుకుని ఉంటుంది. అలాంటప్పుడు ఈ చిట్కా పర్ఫెక్ట్గా పనిచేస్తుంది. ఒక గిన్నెలో గోరువెచ్చని నీటిని తీసుకుని, అందులో చిటికెడు ఉప్పు కలపాలి. పుట్టగొడుగులను ఆ నీటిలో వేసి కేవలం 20 నుండి 30 సెకన్లు మాత్రమే ఉంచాలి. అంతకంటే ఎక్కువ సేపు ఉంచితే అవి నీటిని పీల్చేసి పాడవుతాయి. వెంటనే వాటిని బయటకు తీసి, నార్మల్ నీటితో ఒకసారి కడిగి, పొడి గుడ్డపై ఆరబెట్టాలి.
ఇవి గుర్తుంచుకోండి: పుట్టగొడుగులను ఎట్టి పరిస్థితుల్లోనూ ఎక్కువ సేపు నీటిలో నానబెట్టకూడదు. కడిగిన లేదా తుడిచిన వెంటనే వాటిని పొడి గుడ్డతో పూర్తిగా ఆరబెట్టడం చాలా ముఖ్యం. పుట్టగొడుగులను ముక్కలుగా కోసిన తర్వాత అస్సలు కడగకూడదు. కోయడానికి ముందే పైన చెప్పిన పద్ధతుల్లో శుభ్రం చేసుకోవాలి. ఒకవేళ మీరు వాటిని ఫ్రిజ్లో నిల్వ చేయాలనుకుంటే, శుభ్రం చేసిన వెంటనే స్టోర్ చేసుకోవడం మంచిది.