మీరు తింటున్న కోడిగుడ్డు మంచిదేనా..? ఈ సింపుల్ టిప్స్తో ఈజీగా కనిపెట్టేయండి..! లేదంటే..
కోడిగుడ్లు ఆరోగ్యానికి ఎంతో మేలు చేస్తాయి. కానీ, పాడైపోయిన గుడ్లు తింటే ఫుడ్ పాయిజనింగ్, వాంతులు, జీర్ణ సమస్యలు తలెత్తుతాయి. గుడ్డు తాజాగా ఉందో లేదో తెలుసుకోవడానికి ఫ్లోట్ టెస్ట్ (Float Test) అత్యంత సులభమైన మార్గం. అలాగే స్మార్ట్ఫోన్ ఫ్లాష్లైట్ లేదా వాసన ద్వారా కూడా గుడ్డు నాణ్యతను క్షణాల్లో గుర్తించవచ్చు. అదేలాగో వివరంగా తెలుసుకుందాం..
కోడిగుడ్లలో ప్రోటీన్లు, విటమిన్లు, ఖనిజ లవణాలు పుష్కలంగా ఉండటం వల్ల వైద్యులు ప్రతిరోజూ వీటిని ఆహారంలో చేర్చుకోవాలని సూచిస్తారు. అయితే, మార్కెట్ నుండి తెచ్చిన గుడ్లలో కొన్నిసార్లు పాడైపోయినవి కూడా కలిసి వస్తుంటాయి. సాల్మొనెల్లా అనే బ్యాక్టీరియా చేరడం వల్ల గుడ్లు త్వరగా కుళ్ళిపోతాయి. ఇలాంటి చెడిపోయిన గుడ్లను గుర్తించకుండా తింటే వాంతులు, విరోచనాలు, కడుపునొప్పి వంటి తీవ్రమైన అనారోగ్య సమస్యలు ఎదురవుతాయి. అందుకే, గుడ్డును వండే ముందే అది తాజాగా ఉందో లేదో తెలుసుకోవడం చాలా ముఖ్యం. అందుకోసం కొన్ని సులభమైన గృహ పరీక్షలు ఇక్కడ ఉన్నాయి:
నీటి పరీక్ష (Float Test): గుడ్డు తాజాదనాన్ని పరీక్షించడానికి ఇది ప్రపంచవ్యాప్తంగా ప్రాచుర్యం పొందిన పద్ధతి. ఒక పెద్ద గిన్నెలో చల్లటి నీటిని నింపండి. అందులో గుడ్డును మెల్లగా వేయండి. గుడ్డు గిన్నె అడుగు భాగానికి చేరుకుని అడ్డంగా పడుకుంటే అది చాలా తాజాగా ఉందని అర్థం. గుడ్డు అడుగున మునిగి, ఒక వైపు పైకి నిలువుగా నిలబడితే అది కొంచెం పాతదైనా తినడానికి సురక్షితమే.
కుళ్ళిన గుడ్డు: గుడ్డు నీటిపై పూర్తిగా తేలితే, అది పూర్తిగా పాడైపోయిందని అర్థం. గుడ్డు పాతదవుతున్న కొద్దీ లోపల గాలి బుడగ (Air Pocket) పెద్దదవడం వల్ల అది నీటిపై తేలుతుంది. ఇలాంటి గుడ్డును వెంటనే పారేయాలి.
వాసన పరీక్ష (Sniff Test):గుడ్డు పాడైందో లేదో తెలుసుకోవడానికి మన ముక్కు అత్యంత నమ్మకమైన సాధనం. గుడ్డును పగలగొట్టినప్పుడు దాని నుండి ఘాటైన కుళ్ళిన గుడ్డు వాసన (సల్ఫర్ వాసన) వస్తే అది పాడైపోయినట్లే. మంచి గుడ్డుకు ఎలాంటి వాసన ఉండదు.
మొబైల్ ఫ్లాష్లైట్ పరీక్ష: ఇంట్లో మొబైల్ ఫోన్ ఫ్లాష్లైట్ ఆన్ చేసి, దానిపై గుడ్డును ఉంచాలి. వెలుతురు గుడ్డు లోపల నుండి స్పష్టంగా పసుపు రంగులో కనిపిస్తే అది మంచి గుడ్డు. అలా కాకుండా లోపల చీకటిగా లేదా నల్లటి మచ్చలుగా కనిపిస్తే అది చెడిపోయిందని అర్థం. ఈ చిన్న చిన్న ట్రిక్స్ ఉపయోగించి కుళ్ళిన గుడ్లను దూరం పెట్టి ఆరోగ్యాన్ని కాపాడుకోండి.