Sleep: నిద్ర లేకుండా మనిషి ఎన్ని రోజులు ఉండగలడు.. అసలు విషయం తెలిస్తే షాకే..
నిద్ర అనేది మానవ శరీరానికి, మెదడుకు అత్యంత ప్రాథమిక అవసరం. ఒక రోజు సరిగా నిద్ర లేకపోయినా అనారోగ్యంగా, చిరాకుగా అనిపిస్తుంది. సరైన నిద్ర లేకపోతే మానసిక సమతుల్యత దెబ్బతింటుంది. అందుకే శరీరానికి, మనసుకు విశ్రాంతినిచ్చే నిద్ర చాలా అవసరం. అయితే ఒక వ్యక్తి నిరంతరం నిద్ర లేకుండా ఎంతకాలం మేల్కొని ఉండగలడు అనే ప్రశ్నపై చాలా అధ్యయనాలు జరిగాయి. ఒక వ్యక్తి నిద్ర లేకుండా ఎంతకాలం జీవించగలడో ఏ పరిశోధన కూడా ఖచ్చితంగా నిర్ధారించలేకపోయింది.
గిన్నిస్ బుక్ ఆఫ్ వరల్డ్ రికార్ ప్రకారం.. నిద్ర లేకుండా అత్యధిక కాలం మేల్కొని ఉన్న రికార్డు రాబర్ట్ మెక్డొనాల్డ్ పేరిట ఉండేది. అతడు 18 రోజులు, 21 గంటలు, 40 నిమిషాల పాటు నిద్ర పోలేదు. ఈ సుదీర్ఘ కాలం నిద్ర లేమి కారణంగా రాబర్ట్ మెక్డొనాల్డ్ ఆరోగ్యంపై అనేక ప్రతికూల ప్రభావాలు కనిపించాయి. దీని తీవ్రత కారణంగా గిన్నిస్ సంస్థ 1997లోనే ఈ వర్గాన్ని పూర్తిగా నిలిపివేసింది.
నిద్ర లేకపోవడం వల్ల ఏ వయస్సు వారికైనా తీవ్రమైన పరిణామాలు ఎదురుకావచ్చని ఆస్ట్రేలియన్ ప్రభుత్వ ఆరోగ్య వెబ్సైట్ వెల్లడించింది. నిద్ర లేకపోవడం వల్ల ఆలోచనా సామర్థ్యం తగ్గడం, తీవ్రమైన మానసిక స్థితి మార్పులు, చిరాకు, కోపం వంటివి వస్తాయి.తక్కువ శక్తి, బలహీనమైన రోగనిరోధక శక్తి సమస్యలు తలెత్తుతాయి.
దీర్ఘకాలిక వ్యాధులు వచ్చే ప్రమాదం కూడా లేకపోలేదు. అధిక రక్తపోటు, మధుమేహం, బరువు పెరగడం లేదా ఊబకాయం, గుండె జబ్బులు వచ్చే ప్రమాదం ఉంది. శారీరక సమతుల్యత క్షీణించడం, లైంగిక సామర్థ్యం కోల్పోవడం వంటి సమస్యలు వస్తాయి.
సాధారణంగా 24 గంటలు నిద్ర లేకపోతే ఆవలించడం, కొద్దిగా శక్తి లేకపోవడం వంటి లక్షణాలు కనిపిస్తాయి. కానీ 24 గంటల కంటే ఎక్కువసేపు మేల్కొని ఉంటే, ఈ లక్షణాలు మరింత తీవ్రమవుతాయి. మెదడు పనితీరు, ఏకాగ్రత దెబ్బతిని ప్రమాదాలు జరిగే అవకాశం పెరుగుతుంది.
నిద్రకు చిట్కాలు: ప్రతిరోజూ ఒకే సమయానికి పడుకోవడం, మేల్కోవడం అలవాటు చేసుకోండి. పడుకునే గదిని నిశ్శబ్దంగా, చీకటిగా, సౌకర్యవంతంగా, సరైన ఉష్ణోగ్రతలో ఉంచండి. టీవీ, కంప్యూటర్, ఫోన్లను పడుకునే గదికి దూరంగా ఉంచండి. పడుకునే ముందు భారీ భోజనం, కెఫిన్, ఆల్కహాల్ తీసుకోకండి. ప్రతిరోజూ క్రమం తప్పకుండా వ్యాయామం చేయండి. పడుకునే ముందు పొగాకు తినడం లేదా సిగరెట్లు కాల్చడం పూర్తిగా మానుకోండి.