నాణాలతో నారాయణుడు ..చూడటానికీ రెండు కళ్లు చాలవే..
తూర్పుగోదావరి జిల్లా రైతు యర్రంశెట్టి రామకృష్ణ భక్తికి నిదర్శనంగా లక్ష నాణేలతో అద్భుత శ్రీవారి విగ్రహాన్ని రూపొందించారు. 1.08 లక్షల నాణాలతో, నాలుగు అడుగుల ఎత్తులో తీర్చిదిద్దిన ఈ ప్రతిమను 60 రోజుల్లో పూర్తిచేశారు. ఈ కళాఖండాన్ని ప్రముఖ పుణ్యక్షేత్రం ద్వారకా తిరుమల దేవస్థానానికి అప్పగించనున్నారు. ఇది భక్తులందరికీ ఒక విలక్షణమైన, అపురూపమైన అనుభూతిని ఇస్తుంది.
ఏలూరు : భక్తికి పట్టుదల తోడైతే అద్భుతాలు ఆవిష్కృతమవుతాయని తూర్పుగోదావరి జిల్లాకు చెందిన ఒక సామాన్య రైతు నిరూపించారు. ఆపదమొక్కులవాడు, ఆ వేంకటేశ్వర స్వామిపై ఉన్న అనన్య సామాన్యమైన భక్తిని వినూత్న రీతిలో చాటుకుంటూ, లక్షలాది నాణేలతో స్వామివారి అపురూప విగ్రహాన్ని రూపొందించి అందరినీ అబ్బురపరుస్తున్నారు. గోపాలపురం మండలం రాజంపాలెం గ్రామానికి చెందిన రైతు యర్రంశెట్టి రామకృష్ణ చేసిన ఈ అద్భుత ప్రయత్నం ప్రస్తుతం జిల్లావ్యాప్తంగా చర్చనీయాంశమైంది.
లక్షకు పైగా నాణాలతో నాలుగు అడుగుల శ్రీవారి ప్రతిమ వృత్తిరీత్యా వ్యవసాయం చేసే రామకృష్ణకు వేంకటేశ్వర స్వామి అంటే అమితమైన ఇష్టం. ఆ భక్తే ఆయనతో ఒక అద్భుత కళాఖండాన్ని రూపొందించేలా చేసింది. కేవలం చిల్లర నాణాలతో స్వామివారి విగ్రహాన్ని మలచాలని సంకల్పించిన ఆయన, కుటుంబ సభ్యులు, మిత్రులు, ఇతర భక్తుల సహకారంతో రూపాయి, ఐదు రూపాయలు మరియు పది రూపాయల నాణాలను సేకరించారు.
సుమారు రూ. 1.50 లక్షల విలువైన దాదాపు 1.08 లక్షల నాణాలను ఉపయోగించి, సుమారు నాలుగు అడుగుల ఎత్తు ఉన్న స్వామివారి విగ్రహాన్ని అత్యంత సుందరంగా తీర్చిదిద్దారు. ఫిబ్రవరి 19న తన నివాసంలో ఈ నిర్మాణాన్ని ప్రారంభించిన రామకృష్ణ, సుమారు 60 నుండి 65 రోజుల పాటు శ్రమకోర్చి, ప్రతి నాణాన్ని ఎంతో చాకచక్యంగా పేర్చి ఈ విగ్రహాన్ని పూర్తి చేశారు. విగ్రహానికి ప్రత్యేక ఆకర్షణగా వెండితో చేసిన తిరునామం, శంఖు చక్రాలను అమర్చి స్వామివారి దివ్య మంగళ స్వరూపాన్ని భక్తుల కళ్లముందు ఉంచారు.
ద్వారకా తిరుమల దేవస్థానానికి అపురూప కానుక.. నిర్మాణం పూర్తి కావడంతో తన నివాసంలో కుటుంబ సభ్యులతో కలిసి విగ్రహానికి ప్రత్యేక పూజలు నిర్వహించారు. ఈ అద్భుత కళాఖండాన్ని వీక్షించేందుకు పరిసర ప్రాంతాల ప్రజలు భారీగా తరలివస్తున్నారు. కేవలం భక్తితో చేసిన ఈ కృషిని అందరూ కొనియాడుతున్నారు. తన సంకల్పం నెరవేరిన తరుణంలో, ఈ విగ్రహాన్ని ప్రముఖ పుణ్యక్షేత్రమైన ద్వారకా తిరుమల దేవస్థానానికి అప్పగించాలని రామకృష్ణ నిర్ణయించుకున్నారు.
ఈ నెల 29, 30 తేదీల్లో గ్రామంలో స్వామివారి విగ్రహాన్ని వేడుకగా ఊరేగించి, అనంతరం 30వ తేదీన ద్వారకా తిరుమల శ్రీవారి ఆలయ అధికారులకు అందజేయనున్నట్లు ఆయన వెల్లడించారు. భక్తుల సందర్శనార్థం ఆలయ అధికారులు ఈ విగ్రహాన్ని అక్కడ ప్రతిష్టిస్తారని ఆయన ఆశాభావం వ్యక్తం చేశారు. నాణాలతో కొలువుదీరిన ఈ నారాయణుడిని చూడటం ఒక విలక్షణమైన అనుభూతిని కలిగిస్తోందని స్థానిక భక్తులు హర్షం వ్యక్తం చేస్తున్నారు.