Virat Kohli: నంబర్ 3 @ 13 వేలు.. ప్రపంచ క్రికెట్‌లో కింగ్ కోహ్లీ నయా హిస్టరీ..!
Virat Kohli 13000 ODI Runs: టీమిండియా స్టార్ బ్యాటర్ విరాట్ కోహ్లీ మరో ప్రపంచ రికార్డును తన ఖాతాలో వేసుకున్నాడు. న్యూజిలాండ్‌తో తొలి వన్డేలో 13 వేల పరుగుల మైలురాయిని అందుకున్నాడు. వన్డే క్రికెట్‌లో మూడో స్థానంలో బ్యాటింగ్ చేస్తూ ఈ ఘనత సాధించిన తొలి ఆటగాడిగా చరిత్ర సృష్టించాడు. ఈ క్రమంలో రికీ పాంటింగ్ రికార్డును అధిగమించాడు.
Most Runs at Number 3 in ODI: టీమిండియా స్టార్ బ్యాటర్ విరాట్ కోహ్లీ (Virat Kohli) అంటేనే రికార్డులకు మరో పేరు. మైదానంలో అడుగుపెట్టిన ప్రతిసారీ ఏదో ఒక అరుదైన ఘనత సాధిస్తూ తన ప్రత్యేకతను చాటుకుంటున్నాడు. తాజాగా న్యూజిలాండ్‌తో జరుగుతున్న తొలి వన్డేలో మరో అద్భుత రికార్డును సృష్టించాడు. వన్డే క్రికెట్‌లో మూడో స్థానంలో బ్యాటింగ్ చేస్తూ 13 వేల పరుగులు పూర్తి చేసిన ప్రపంచంలోనే తొలి బ్యాటర్‌గా నిలిచాడు. ఈ మ్యాచ్‌కు ముందు ఈ మైలురాయిని చేరుకోవడానికి కోహ్లీకి కేవలం 12 పరుగులు మాత్రమే అవసరమయ్యాయి. రోహిత్ శర్మ డకౌట్ కావడంతో ముందుగానే బ్యాటింగ్‌కు వచ్చిన కింగ్.. ఈ ఘనతను అందుకున్నాడు. దీంతో క్రికెట్ దిగ్గజం రికీ పాంటింగ్ పేరిట ఉన్న రికార్డును అధిగమించాడు.
నంబర్ 3లో 13 వేల పరుగులు.. కోహ్లీ చరిత్ర..: వన్డేల్లో మూడో స్థానంలో బ్యాటింగ్ చేయడం అంత సులభం కాదు. ఇన్నింగ్స్ పరిస్థితులకు అనుగుణంగా ఆటను మార్చుకుంటూ జట్టును ముందుకు నడిపించాల్సి ఉంటుంది. అలాంటి కీలక స్థానంలో కోహ్లీ 13 వేల పరుగులు పూర్తి చేశాడు. ఇప్పటివరకు ప్రపంచ క్రికెట్‌లో మరే బ్యాటర్ కూడా ఈ మైలురాయిని చేరుకోలేదు. 252 ఇన్నింగ్స్‌ల్లో ఈ ఘనత సాధించడం విశేషం. ఈ స్థానంలో అతడి బ్యాటింగ్ సగటు 61.60గా ఉంది.
రికీ పాంటింగ్ రికార్డు బద్దలు: ఇప్పటివరకు నంబర్ 3 స్థానంలో అత్యధిక వన్డే పరుగులు చేసిన ఆటగాళ్ల జాబితాలో ఆస్ట్రేలియా మాజీ కెప్టెన్ రికీ పాంటింగ్ రెండో స్థానంలో ఉన్నాడు. అతడు 12,662 పరుగులు సాధించాడు. ఇప్పుడు కోహ్లీ 13 వేల పరుగులతో అతడిని అధిగమించి అగ్రస్థానాన్ని మరింత పదిలం చేసుకున్నాడు.
వన్డేల్లో నంబర్ 3లో అత్యధిక పరుగులు చేసిన ఆటగాళ్లు: విరాట్ కోహ్లీ – 13,000 పరుగులు, రికీ పాంటింగ్ – 12,662 పరుగులు, కుమార సంగక్కర – 9,747 పరుగులు, జాక్వెస్ కలిస్ – 7,774 పరుగులు.
రికార్డుల వేటలో కింగ్ కోహ్లీ: ఇప్పటికే వన్డే క్రికెట్‌లో ఎన్నో మైలురాళ్లు అందుకున్న కోహ్లీ ఖాతాలో మరో చారిత్రక ఘనత చేరింది. ముఖ్యంగా మూడో స్థానంలో 13 వేల పరుగులు సాధించడం అతడి నిలకడైన ఆటతీరుకు నిదర్శనం. రోహిత్ వికెట్ కోల్పోయిన సమయంలో బాధ్యత తీసుకుని ఈ రికార్డు అందుకోవడం అభిమానులను ఆనందంలో ముంచెత్తింది. రానున్న మ్యాచ్‌ల్లో కోహ్లీ మరిన్ని రికార్డులు సృష్టిస్తాడని అభిమానులు ఆశిస్తున్నారు.