KL Rahul in KKR: వార్నీ.. ఇదెక్కడి మార్పులు భయ్యా.. కేకేఆర్లో చేరనున్న ఢిల్లీ కెప్టెన్
KL Rahul in KKR: గత సంవత్సరం కేఎల్ రాహుల్ లక్నో నుంచి ఢిల్లీ క్యాపిటల్స్లో చేరాడు. అతను మరోసారి జట్లు మారే అవకాశం ఉందని వార్తలు వస్తున్నాయి. అతను కోల్ కతా నైట్ రైడర్స్లో చేరవచ్చు అని వార్తలు వినిపిస్తున్నాయి.
వెస్టిండీస్తో జరిగిన టెస్ట్ సిరీస్లో కేఎల్ రాహుల్ అద్భుతంగా రాణించాడు. ఇప్పుడు ఆస్ట్రేలియా పర్యటనకు బయలుదేరాడు. కానీ, అతని గురించి కొన్ని కీలక వార్తలు వెలువడుతున్నాయి. కేఎల్ రాహుల్ తన ఐపీఎల్ ఫ్రాంచైజీని మార్చబోతున్నట్లు నివేదికలు సూచిస్తున్నాయి.
కేఎల్ రాహుల్ కేకేఆర్తో చర్చలు జరుపుతున్నట్లు వార్తలు వస్తున్నాయి. అతను జట్టుకు కెప్టెన్సీ, ఓపెనింగ్ డ్యూటీలు, వికెట్ కీపింగ్ పూర్తి ప్యాకేజీని అందించగలడు.
శ్రేయాస్ అయ్యర్ నిష్క్రమణ తర్వాత, KKR అజింక్య రహానేను కెప్టెన్గా నియమించింది. కానీ జట్టు ప్లేఆఫ్స్కు చేరుకోలేకపోయింది. ఇప్పుడు, వచ్చే సీజన్లో రహానె నాయకత్వం కొనసాగడం అసంభవం.
కేఎల్ రాహుల్ ప్రస్తుతం ఢిల్లీ క్యాపిటల్స్ తో ఉన్నాడు. గత సంవత్సరం ఢిల్లీ క్యాపిటల్స్ అతన్ని రూ. 14 కోట్లకు కొనుగోలు చేసింది. గత సీజన్లో రాహుల్ దాదాపు 54 సగటుతో 539 పరుగులు చేశాడు. అందులో ఒక సెంచరీ, మూడు అర్ధ శతకాలు ఉన్నాయి.
కేఎల్ రాహుల్ ఢిల్లీ జట్టును వదిలివేస్తారా లేదా అనేది ఇంకా స్పష్టంగా తెలియలేదు. కానీ ఫ్రాంచైజీ రాజస్థాన్ కెప్టెన్ సంజు శాంసన్ను తమ జట్టులోకి తీసుకోవచ్చని నివేదికలు ఉన్నాయి.