Asia Cup 2023: ఫైనల్‌లో లంకపై హైదరాబాదీ మెరుపులు.. దెబ్బకి కపిల్, ఇర్ఫాన్ రికార్డ్‌లు బ్రేక్.. నెహ్రాతో సమంగా ఆ లిస్టు అగ్రస్థానంలోకి..
IND vs SL, Asia Cup 2023 Final: భారత్, శ్రీలంక మధ్య 9వ సారి జరిగిన ఆసియా కప్ ఫైనల్ మ్యాచ్‌లో రోహిత్ సేన ప్రపంచాన్ని అబ్బురపరిచే ప్రదర్శన చేసింది. విశేషం ఏమిటంటే.. పూర్తి క్రెడిట్ మన హైదరాబాదీ క్రికెటర్ మహ్మద్ సిరాజ్‌దే. ఒకే ఓవర్‌లో 4 వికెట్లు.. మొత్తంగా ఇన్నింగ్స్‌లో 21 పరుగులకు 6 వికెట్లు పడగొట్టాడు. ఈ క్రమంలో సిరాజ్.. నెహ్రా పేరిట ఉన్న ఓ అరుదైన రికార్డ్ను సాధించాడు. సిరాజ్ ఇందుకోసం కపిల్ దేవ్, ఇర్ఫాన్ పఠాన్ వంటి భారత మాజీ ప్లేయర్లను కూడా అధిగమించాడు.
Asia Cup 2023 Final: శ్రీలంకతో జరిగిన ఆసియా కప్ ఫైనల్‌లో భారత్ 10 వికెట్ల తేడాతో విజయం సాధించడంతో పాటు 8వ సారి టోర్నీ విజేతగా నిలిచింది. ఈ క్రమంలో లంకపై 6 వికెట్లు తీసిన సిరాజ్ భారత్ తరఫున ఆసియా కప్ ఫైనల్‌లో అత్యధిక వికెట్లు తీసిన ఆటగాడిగా ఆశిష్ నెహ్రా రికార్డ్ను సమం చేశాడు.
విశేషం ఏమిటంటే.. 6 వికెట్లతో భారత్ తరఫున ఆసియా కప్ ఫైనల్‌లో అత్యధిక వికెట్లు తీసిన ఆటగాడిగా అగ్రస్థానంలో ఉన్న ఆశిష్ నెహ్రా ఇందుకోసం 3 టైటిల్ మ్యాచ్‌లు ఆడాడు. కానీ సిరాజ్ తాను ఆడిన తొలి ఆసియా కప్ ఫైనల్‌లోనే 6 వికెట్లు పడగొట్టి అగ్రస్థానానికి ఎగబాకాడు.
ఇప్పుడు మహ్మద్ సిరాజ్, ఆశిష్ నెహ్రా 6, 6 వికెట్లతో ఆసియా కప్ ఫైనల్‌లో అత్యధిక వికెట్లు తీసిన భారత ఆటగాళ్లుగా అగ్రస్థానంలో ఉన్నారు.
కాగా, ఆసియా కప్‌లో అత్యధిక వికెట్లు తీసిన ఆటగాళ్లుగా కపిల్ రెండో స్థానంలో, ఇర్ఫాన్ పఠాన్ మూడో స్థానంలో ఉన్నారు. 2 ఫైనల్స్‌లో ఆడిన కపిల్ 5 తీయగా.. ఇర్ఫాన్ కూడా 2 ఫైనల్స్ ఆడి 4 వికెట్లు పడగొట్టాడు. ఇప్పుడు వీరిద్దరి రికార్డులను కూడా సిరాజ్ బ్రేక్ చేశాడు.
మరోవైపు లంకతో జరిగిన ఫైనల్ ద్వారా రెండో టైటిల్ మ్యాచ్‌ ఆడిన కుల్తీప్ యాదవ్ కూడా ఇర్ఫాన్ రికార్డ్ను సమం చేశాడు. ఇద్దరూ కూడా రెండేసి ఫైనల్స్ ఆడి 4 వికెట్లు పడగొట్టారు. అంటే ఇర్ఫాన్‌తో పాటు కుల్దీప్ కూడా ఆసియా కప్ ఫైనల్స్‌లో అత్యధిక వికెట్లు పడగొట్టిన ఆటగాళ్ల జాబితాలో మూడో స్థానంలో ఉన్నాడు.