Credit Card: క్రెడిట్ కార్డ్ రూల్స్ మారుతున్నాయ్.. ఇవి తెలుసుకోకపోతే నష్టపోతారు..
నేటి కాలంలో షాపింగ్ నుండి ప్రయాణాల వరకు ప్రతిదానికీ క్రెడిట్ కార్డులే ప్రధాన ఆధారంగా మారాయి. అయితే వీటి వాడకంపై మరింత పారదర్శకతను పెంచేందుకు కేంద్ర ప్రభుత్వం, ఆర్థిక సంస్థలు కీలక మార్పులు చేపట్టాయి. ఈ కొత్త నియమాలు ఏప్రిల్ 1 నుండి అమల్లోకి రానున్నాయి. వీటిపై అవగాహన లేకపోతే వినియోగదారులు ఆర్థిక ఇబ్బందుల్లో పడే అవకాశం ఉంది.
పాన్ కార్డు ఇప్పుడు తప్పనిసరి: ఇకపై కొత్తగా క్రెడిట్ కార్డు కోసం దరఖాస్తు చేసుకునే వారికి పాన్ కార్డు ఉండటం అనివార్యం. పాన్ నంబర్ లేని ఏ దరఖాస్తును కూడా బ్యాంకులు లేదా ఆర్థిక సంస్థలు ప్రాసెస్ చేయవు. నకిలీ ఖాతాలను అరికట్టడానికి, క్రెడిట్ కార్డు ఖర్చులను నేరుగా పన్ను వ్యవస్థతో అనుసంధానించడానికి ప్రభుత్వం ఈ నిర్ణయం తీసుకుంది.
ఐటీ శాఖ నిఘా: మీ క్రెడిట్ కార్డ్ ఖర్చులపై ఆదాయపు పన్ను శాఖ కన్నేసి ఉంచబోతోంది. ఒక ఆర్థిక సంవత్సరంలో ఒకటి లేదా అంతకంటే ఎక్కువ క్రెడిట్ కార్డుల ద్వారా రూ.10 లక్షలు లేదా అంతకంటే ఎక్కువ లావాదేవీలు నిర్వహిస్తే, సదరు బ్యాంకులు ఆ వివరాలను ఆదాయపు పన్ను శాఖకు నివేదిస్తాయి. క్రెడిట్ కార్డ్ బిల్లును రూ.1 లక్ష లేదా అంతకంటే ఎక్కువ మొత్తంలో నగదు రూపంలో చెల్లించినా ఆ సమాచారం కూడా ఐటీ శాఖకు చేరుతుంది.
క్రెడిట్ కార్డుతోనే ఆదాయపు పన్ను చెల్లింపు: పన్ను చెల్లింపుదారులకు ఒక సౌకర్యవంతమైన మార్పు రాబోతోంది. ఇకపై మీ ఆదాయపు పన్నును కూడా క్రెడిట్ కార్డు ఉపయోగించి చెల్లించవచ్చు. అయితే ఇలా చేసేటప్పుడు బ్యాంకులు వసూలు చేసే వడ్డీ రేట్లు మరియు ప్రాసెసింగ్ ఫీజుల గురించి ముందే తెలుసుకోవడం మంచిది.
పన్ను మినహాయింపు: కంపెనీలు జారీ చేసే క్రెడిట్ కార్డులను ఉపయోగించే ఉద్యోగులకు ఒక మంచి వార్త. యజమాని అనుమతితో చేసే అధికారిక ఖర్చులపై ఉద్యోగులు పన్ను మినహాయింపు పొందవచ్చు. కానీ దీనికి సంబంధించి సరైన డాక్యుమెంటేషన్, ధృవీకరణ పత్రాలు సమర్పించడం తప్పనిసరి.
క్రెడిట్ కార్డుల వాడకం పెరగడంతో పాటు దుర్వినియోగం కూడా పెరుగుతోంది. అందుకే ఈ కొత్త నిబంధనలను ప్రభుత్వం తీసుకువచ్చింది. ఏప్రిల్ 1 నుండి అమల్లోకి రానున్న ఈ మార్పులను దృష్టిలో ఉంచుకుని మీ ఆర్థిక లావాదేవీలను ప్లాన్ చేసుకోవడం ఉత్తమం.