చియా vs సబ్జా సీడ్స్.. బరువు తగ్గడానికి ఏది బెస్ట్..? ఈ తప్పులు అస్సలు చేయొద్దు..
Chia Seeds vs Sabja Seeds: ప్రస్తుత ఉరుకుల పరుగుల జీవితంలో బరువు తగ్గడం అనేది ఒక పెద్ద సవాల్గా మారింది. సుమారు 78 శాతం మంది బరువు తగ్గే ప్రయత్నాల్లో విఫలమవుతున్నారని గణాంకాలు చెబుతున్నాయి. ఈ క్రమంలోనే సహజ సిద్ధమైన ఆహారాలపై ప్రజల్లో ఆసక్తి పెరుగుతోంది. ముఖ్యంగా చియా గింజలు, బ్జా గింజలు ఇప్పుడు వెయిట్ లాస్ డైట్లో ప్రధాన ఆకర్షణగా నిలుస్తున్నాయి. అయితే ఈ రెండిటిలో ఏది బరువు తగ్గడానికి బెస్ట్..? అనేది తెలుసుకుందాం..
చియా, సబ్జా విత్తనాలు రెండూ మొక్కల ఆధారిత హైడ్రేషన్ వనరులే అయినప్పటికీ, వాటి పోషక సాంద్రతలో స్వల్ప వ్యత్యాసాలు ఉన్నాయి. చియా గింజలలో ప్రోటీన్, పీచుపదార్థం, ఆరోగ్యకరమైన కొవ్వులు పుష్కలంగా ఉంటాయి. మరోవైపు సబ్జా గింజలు శరీరానికి అద్భుతమైన చల్లదనాన్ని ఇస్తాయి. ఇందులో కరిగే పీచుపదార్థం ఎక్కువగా ఉండటం వల్ల జీర్ణక్రియను మెరుగుపరచడంలో ఇవి కీలక పాత్ర పోషిస్తాయి.
ప్రముఖ పోషకాహార నిపుణురాలు నమామి అగర్వాల్ ప్రకారం.. ఈ రెండు విత్తనాలు కరిగే పీచుపదార్థానికి అద్భుతమైన మూలాలు. వీటిని తీసుకున్నప్పుడు కడుపులో వ్యాకోచించి, ఎక్కువసేపు ఆకలి వేయకుండా కడుపు నిండినట్లు అనిపించేలా చేస్తాయి. దీనివల్ల పగటిపూట మనం తీసుకునే ఆహారంపై నియంత్రణ ఏర్పడి, క్రమంగా బరువు తగ్గడానికి వీలవుతుంది. అయితే వీటిని ఎలా తీసుకుంటున్నాం అనే దానిపైనే ఫలితాలు ఆధారపడి ఉంటాయి.
బరువు తగ్గడంలో చియా గింజలు విశిష్టమైన పాత్రను పోషిస్తాయి. వీటిలో ఉండే అధిక ప్రోటీన్ ఆకలి కోరికలను తగ్గిస్తుంది, తద్వారా అతిగా తినకుండా నివారించవచ్చు. గ్యాస్ట్రోఎంటరాలజిస్ట్ డాక్టర్ సౌరభ్ సేథి విశ్లేషణ ప్రకారం.. చియా గింజలను ప్రోటీన్, ఆరోగ్యకరమైన కొవ్వులతో కలిపి తీసుకున్నప్పుడు అవి దీర్ఘకాలిక బరువు నిర్వహణకు ఎంతో మేలు చేస్తాయి. ఇవి జీర్ణక్రియను నెమ్మదింపజేసి, శరీరానికి నిలకడైన శక్తిని అందిస్తాయి.
సబ్జా గింజల విషయానికి వస్తే, ఇవి కేవలం బరువు తగ్గడానికే కాకుండా శరీరంలోని వేడిని తగ్గించడానికి కూడా అద్భుతంగా పనిచేస్తాయి. త్వరిత జీర్ణక్రియకు మరియు వేసవిలో వచ్చే కడుపు ఉబ్బరం నుండి ఉపశమనానికి సబ్జా గింజలు ఒక సహజ ఔషధంలా పనిచేస్తాయి. ఇవి కడుపు నిండిన భావనను కలిగించి, జీర్ణవ్యవస్థను శుభ్రపరచడంలో తోడ్పడతాయి. ముఖ్యంగా వేసవి పానీయాలలో వీటిని వాడటం వల్ల ఆరోగ్యానికి ఆరోగ్యం, రుచికి రుచి లభిస్తాయి.
అయితే ఈ విత్తనాలను తీసుకునేటప్పుడు కొన్ని జాగ్రత్తలు తప్పనిసరి. చియా గింజలను రాత్రంతా నీటిలో లేదా పాలలో నానబెట్టి తీసుకోవడం వల్ల పూర్తి ప్రయోజనాలు అందుతాయి. అలాగే సబ్జా గింజలను కనీసం 15 నుండి 20 నిమిషాల పాటు నానబెట్టాలి. వీటిని పచ్చిగా తినడం వల్ల కొన్నిసార్లు దుష్ప్రభావాలు వచ్చే అవకాశం ఉందని నిపుణులు హెచ్చరిస్తున్నారు. తక్కువ రక్తపోటు ఉన్నవారు, తీవ్రమైన జీర్ణ సంబంధిత సమస్యలు ఉన్నవారు తులసి గింజలను తీసుకునే ముందు డాక్టరును సంప్రదించడం మంచిది.
చివరిగా చియా, సబ్జా గింజలు.. ఈ రెండూ బరువు తగ్గడానికి తమదైన రీతిలో సహాయపడతాయి. మీ శరీర ధర్మం, వాతావరణ పరిస్థితులు, మీ డైట్ ప్లాన్ బట్టి వీటిలో ఒకదానిని లేదా రెండింటినీ మీ ఆహారంలో భాగం చేసుకోవచ్చు. సరైన మోతాదు, సమతుల్య ఆహారం, చురుకైన జీవనశైలి తోడైతే ఈ చిన్న విత్తనాలు మీ ఫిట్నెస్ ప్రయాణంలో గొప్ప మార్పును తీసుకువస్తాయి.