Upcoming Electric Scooters: రానున్నది ఎలక్ట్రిక్ యుగమే! త్వరలో లాంచ్ కానున్న టాప్ ఎలక్ట్రిక్ స్కూటర్ల వివరాలు ఇవి..
ఎలక్ట్రిక్ వాహనాలు నెమ్మదిగా మార్కెట్లో తమ రూట్స్ ను విస్తరిస్తున్నాయి. ముఖ్యంగా ఎలక్ట్రిక్ స్కూటర్లు మన దేశంలో అధికంగా అమ్ముడవుతున్నాయి. ప్రధానంగా అర్బన్ వినియోగదారులకు ఫస్ట్ చాయిస్ ఈ ఎలక్ట్రిక్ స్కూటర్లే అవుతున్నాయి. ఎందుకంటే వీటికి మెయింటెన్స్ లేకపోవడం, సంప్రధాయ పెట్రోల్ ఇంజిన్లతో పోల్చితే రన్నింగ్ కాస్ట్ కూడా చాలా తక్కువ ఉండటంతో అందరూ వీటి కొనుగోలుకు మొగ్గుచూపుతున్నారు. దీంతో కంపెనీలు కూడా ఈ డిమాండ్ ను అందిపుచ్చుకునేందుకు కొత్త ఉత్పత్తులను లాంచ్ చేస్తున్నాయి. ఈ నేపథ్యంలో తర్వలో మార్కెట్లోకి వచ్చేందుకు సిద్ధంగా టాప్ ఎలక్ట్రిక్ స్కూటర్ల గురించి ఇప్పుడు తెలుసుకుందాం..
హోండా యాక్టివా ఎలక్ట్రిక్.. రాబోయే ఐదేళ్లకు హోండా ఇండియా ప్రత్యేక ప్రణాళికను రూపొందించింది. 10 కొత్త ఎలక్ట్రిక్ 2-వీలర్లను విడుదల చేసేందుకు సమాయత్తమవుతోంది. హోండా ఇటీవలే తన ఈవీల కోసం స్వింగ్‌ఆర్మ్-మౌంటెడ్ మోటారుకు పేటెంట్ పొందింది. ఇది ఈ మోడళ్లలో ప్రారంభమవుతుందని భావిస్తున్నారు. హోండా నుంచి వచ్చే మొదటి ఎలక్ట్రిక్ స్కూటర్ యాక్టివా అని చెబుతున్నారు. ఇది 2 వేరియంట్‌లలో అందుబాటులోకి వస్తుందని మార్కెట్ వర్గాలు అంచనా వేస్తున్నారు. బ్యాటరీ మార్చుకోదగిన బ్యాటరీతో ఒకటి, ఫిక్స్ డ్ బ్యాటరీతో మరొక వేరియంట్ నుంచ్ చేసే అవకాశం ఉందనిచెబుతున్నారు. నివేదికల ప్రకారం, పెట్రోల్ బంకుల వద్ద దేశవ్యాప్తంగా బ్యాటరీ-స్వాపింగ్ స్టేషన్లను ఏర్పాటు చేయడానికి హోండా హిందుస్థాన్ పెట్రోలియంతో భాగస్వామ్యాన్ని ఏర్పాటు చేసుకుందని తెలుస్తోంది.
బజాజ్ చేతక్.. బజాజ్ చేతక్ అప్‌గ్రేడెడ్ వెర్షన్ అందుబాటులోకి వస్తుందని భావిస్తున్నారు. కొత్త మోడల్ పరిధిని 110కిమీలకు పెంచి ఇస్తారని పలువురు అంచనా వేస్తున్నారు. ప్రస్తుత మోడల్ 2.9కేడబ్ల్యూహెచ్ బ్యాటరీని కలిగి ఉంది. ఇది 95 కిమీల సర్టిఫైడ్ పరిధిని కలిగి ఉంటుంది. రానున్న కొత్త మోడల్ 4కేడబ్ల్యూహెచ్ పెద్ద బ్యాటరీని కలిగి ఉండవచ్చు అందువల్ల 110 కిమీల పరిధిని ఇచ్చే అవకాశం ఉంది. బలమైన స్టీల్ యూనిబాడీ, బ్లూటూత్ కనెక్టివిటీ, జియో-ఫెన్సింగ్, ఓటీఏ అప్‌డేట్‌లు, కలర్ ఎల్సీడీ కన్సోల్, పార్కింగ్ కోసం రివర్స్ మోడ్‌ ఉంటుంది.
సుజుకి బర్గ్‌మాన్ ఎలక్ట్రిక్.. ఇది ఇప్పటికే జపాన్‌లో ప్రారంభమైంది. ప్రస్తుతం భారతీయ రోడ్లపై పరీక్షిస్తున్నారు. ఊహించిన దాని కంటే త్వరగానే ఇక్కడ లాంచ్ అయ్యే అవకాశం ఉంది. ప్రస్తుతం, ఇది 4కేడబ్ల్యూ మోటార్‌తో 18ఎన్ఎం గరిష్ట టార్క్ ను ఉత్పత్తి చేస్తుంది. గంటకు గరిష్టంగా 60 కిలోమీటర్ల వేగంతో ప్రయాణించగలుగుతుంది. సింగిల్ చార్జ్ పై 45కిలోమీటర్ల రేంజ్ ఇస్తుంది. బ్యాటరీ మార్చుకోదగిన యూనిట్‌గా ఉంటుందని అంచనా వేస్తున్నారు. ఇది ఛార్జింగ్ సమయాలను తగ్గిస్తుంది. ఆసక్తికరమైన విషయం ఏమిటంటే, హోండా, సుజుకి, యమహా, కవాసకి మధ్య బ్యాటరీ-షేరింగ్ ప్లాట్‌ఫారమ్ అభివృద్ధి చేస్తున్నట్లు సమాచారం.
ఏథర్ కొత్త వేరియంట్‌లు.. ఏథర్ పోర్ట్‌ఫోలియో కింద ఒకటి కాదు రెండు మోడళ్లు ఉంటాయని అంచానా. వచ్చే ఏడాది దీనికి సంబంధించిన ప్రకటన వెలువడుతుందని ఏథర్ ఎనర్జీ సీఈఓ తరుణ్ మెహతా ధ్రువీకరించారు. మెహతా ప్రకారం, వారు ప్రస్తుత ఏథర్ 450 లైనప్‌లో ఉన్న స్పోర్ట్స్ స్కూటర్ సెగ్మెంట్‌లో మెజారిటీని కలిగి ఉన్నారు. అందువల్ల స్కూటర్ల సౌకర్యాన్ని మరింత ఆచరణాత్మక వైపు అన్వేషించడానికి ఎక్కువ ఆసక్తిని కలిగి ఉన్నారు. రైడర్, పిలియన్ ఇద్దరికీ సౌకర్యవంతమైన అనుభవం కోసం కొత్త స్కూటర్ పెద్ద సీటు ఉంటుందని అంచనా. 7-అంగుళాల టచ్‌స్క్రీన్ ఇన్‌స్ట్రుమెంట్ క్లస్టర్ వంటి ఇతర ఫీచర్లు కొనసాగుతాయి.
కైనెటిక్ ఇ-లూనా.. పాత కాలంలో లూనాకు చాలా డిమాండ్ ఉండేది. ఇప్పుడు కొత్త లుక్ సరికొత్త ఎలక్ట్రిక్ లుక్ లో ఈ లూనా రానుంది. ఎలక్ట్రిక్ మోపెడ్ డిజైన్ లీక్ అయ్యింది. లైటింగ్ అంతా ఎల్ఈడీ, ఎల్సీడీ ఇన్‌స్ట్రుమెంట్ క్లస్టర్‌తో ఉంటుందని భావిస్తున్నారు. బీఫ్ ఫ్లోర్‌బోర్డ్ కింద బ్యాటరీ ఉంది. ఇ-లూనా స్ప్లిట్-సీట్ సెటప్‌తో వస్తుంది. టాప్ బాక్స్ వంటి యాక్సెసరీలను ఇన్‌స్టాల్ చేయడానికి వెనుక సీటును తీసివేయవచ్చు. ఇది సమర్థవంతమైన మల్టీ-యుటిలిటీ ఎలక్ట్రిక్ వాహనం. బ్యాటరీ, మోటారుకు సంబంధించిన వివరాలు ఇంకా అందుబాటులో లేవు. గరిష్టంగా గంటకు 50 ప్రయాణిస్తుంది. 60-70 కిలోమీటర్ల పరిధి ఉంటుందని భావిస్తున్నారు. ఈ కైనెటిక్ ఈ-లూనా ధర రూ.70,000 నుంచి రూ.80,000 ఎక్స్-షోరూమ్ మధ్య ఉండవచ్చని అంచనా వేస్తున్నారు.
యమహా ఈ-01.. తొలుత యమహా ఎలక్ట్రిక్ నియోలను ప్రారంభించాలని ప్లాన్ చేసింది, ఇది ఇప్పటికే యూరోపియన్ రోడ్లపై చక్కర్లు కొడుతోంది. నియోలు హోండాతో భాగస్వామ్యం అయితన అదే స్వాప్ చేయగల బ్యాటరీతోనే వస్తాయి. ఒక్కసారి ఛార్జింగ్‌పై 45 కిలోమీటర్ల పరిధిని అందిస్తాయి. అయితే యమహా ఇండియా భారతీయ మార్కెట్‌ను అధ్యయనం చేసిన తర్వాత తన ఆలోచన మార్చుకుంది. అలాగే ఏతర్, టీవీఎస్ ఐక్యూబ్, ఓలా వంటి ఈవీ మోడళ్లు అధిక రేంజ్ ఇస్తుండటంతో యమహా ఇండియా ఇప్పుడు పోటీని ఎదుర్కొనేందుకు ఒక స్పోర్టీ ఎలక్ట్రిక్ స్కూటర్‌ను అభివృద్ధి చేస్తోంది. ఇది ప్రీమియం ధరతో ఉంటుంది.