సుకన్య సమృద్ధి యోజనతో రూ.71 లక్షలు పొందొచ్చా? ఈ విధంగా చేస్తే చాలు..
కుమార్తెల చదువు, పెళ్లి వంటి భవిష్యత్ అవసరాల కోసం కేంద్ర ప్రభుత్వం అందిస్తున్న సుకన్య సమృద్ధి యోజన పథకం తల్లిదండ్రులకు ఉత్తమ పొదుపు మార్గంగా మారుతోంది. అధిక వడ్డీ, పన్ను మినహాయింపులతో దీర్ఘకాలంలో భారీ మొత్తాన్ని కూడబెట్టుకునే అవకాశం ఇందులో ఉంది.
ఏ తల్లిదండ్రులైనా తమ పిల్లల భవిష్యత్తు భద్రంగా ఉండాలని కోరుకుంటారు. ముఖ్యంగా కుమార్తెల చదువు, ఉన్నత విద్య, పెళ్లి వంటి అవసరాలకు ఆర్థిక ఇబ్బందులు రాకూడదని ముందుగానే ప్రణాళికలు సిద్ధం చేసుకుంటారు. అలాంటి కుటుంబాల కోసం కేంద్ర ప్రభుత్వం ప్రవేశపెట్టిన అత్యంత ప్రజాదరణ పొందిన పొదుపు పథకాలలో సుకన్య సమృద్ధి యోజన ఒకటి.
2015లో ప్రారంభమైన ఈ పథకం బాలికల భవిష్యత్తును ఆర్థికంగా బలోపేతం చేయడమే లక్ష్యంగా రూపొందించబడింది. బాలిక పుట్టినప్పటి నుంచి 10 ఏళ్ల వయస్సు వచ్చేలోపు తల్లిదండ్రులు లేదా చట్టపరమైన సంరక్షకులు ఈ ఖాతాను ప్రారంభించవచ్చు. చిన్న మొత్తాలతోనే ప్రారంభించి, దీర్ఘకాలంలో పెద్ద మొత్తాన్ని కూడబెట్టుకునే అవకాశం ఇందులో ఉంటుంది.
ప్రస్తుతం ఈ పథకంపై ప్రభుత్వం సంవత్సరానికి 8.2 శాతం వడ్డీ అందిస్తోంది. మార్కెట్లో అందుబాటులో ఉన్న చాలా ఫిక్స్డ్ డిపాజిట్ పథకాల కంటే ఇది అధిక వడ్డీ రేటుగా భావిస్తున్నారు. అదనంగా ఈ పథకంలో పెట్టుబడి, వడ్డీ, మెచ్యూరిటీ మొత్తం కూడా పన్ను మినహాయింపుకు అర్హత పొందుతాయి.
ఈ పథకం కింద కనీసంగా రూ.250తో ఖాతా ప్రారంభించవచ్చు. గరిష్టంగా సంవత్సరానికి రూ.1.5 లక్షల వరకు జమ చేయొచ్చు. ఖాతా ప్రారంభించిన తేదీ నుంచి 15 సంవత్సరాల పాటు మాత్రమే డిపాజిట్లు చేయాలి. అయితే ఖాతా 21 సంవత్సరాల తర్వాత మెచ్యూర్ అవుతుంది. ఈ మధ్యకాలంలో కూడా డబ్బుపై వడ్డీ కొనసాగుతుండటం ఈ పథకానికి ప్రత్యేక ఆకర్షణగా నిలుస్తోంది.
ఉదాహరణకు తమ కుమార్తె పుట్టినప్పటి నుంచే ప్రతి ఏడాది రూ.1.5 లక్షలు చొప్పున 15 సంవత్సరాలు పెట్టుబడి పెడితే, మొత్తం పెట్టుబడి రూ.22.5 లక్షలు అవుతుంది. 21 సంవత్సరాల మెచ్యూరిటీ సమయానికి వడ్డీతో కలిపి దాదాపు రూ.71.82 లక్షలు అందుకునే అవకాశం ఉంటుంది. కుమార్తెల ఉన్నత విద్య, వివాహ ఖర్చులకు దీర్ఘకాలిక ఆర్థిక భద్రత కల్పించే ఈ పథకం, తల్లిదండ్రులకు భరోసానిచ్చే సేవింగ్స్ ఆప్షన్గా మారుతోంది.