ఏ వంటకు ఏ నూనె వాడాలి? ఆరోగ్యానికి ఏ వంట నూనె బెస్ట్?
మనం రోజూ తినే ఆహారంలో కుకింగ్ ఆయిల్స్ పాత్ర చాలా పెద్దది. హెల్దీ డైట్ గురించి చర్చ వచ్చిన ప్రతిసారి ఏ వంట నూనె వాడాలనే దానిపై ఎన్నో సందేహాలు రేకెత్తుతాయి. సూపర్ మార్కెట్కు వెళ్తే బడ్జెట్లో దొరికే సన్ఫ్లవర్ ఆయిల్ నుండి ఖరీదైన ఆలివ్ ఆయిల్, అవకాడో, కొబ్బరి నూనెల వరకు అల్మిరాలలో రకరకాల ప్యాకెట్లు దర్శనమిస్తాయి. అయితే, శరీరానికి అన్ని రకాల కొవ్వులు ఒకేలా పనిచేయవని, కొన్ని కొలెస్ట్రాల్ పెంచితే, మరికొన్ని తగ్గిస్తాయని శాస్త్రవేత్తలు చెబుతున్నారు.
సన్ఫ్లవర్ ఆయిల్ మరియు వెజిటబుల్ ఆయిల్స్ గురించి తరచుగా ప్రతికూల ప్రచారం జరుగుతుంటుంది. ఇవి అల్ట్రా-ప్రాసెస్డ్ అని, శరీరంలో ఇన్ఫ్లమేషన్ను కలిగిస్తాయని చాలా మంది నమ్ముతారు. కానీ, కేంబ్రిడ్జ్ యూనివర్సిటీ ప్రొఫెసర్ నీతా ఫోరూహీ ప్రకారం, వీటికి తగిన శాస్త్రీయ ఆధారాలు లేవు. ఈ నూనెలలో అనారోగ్యకరమైన సాచురేటెడ్ కొవ్వులు కేవలం 5 నుండి 10 శాతం మాత్రమే ఉంటాయి.
మెదడు, గుండె ఆరోగ్యానికి అవసరమైన పాలీఅన్సాచురేటెడ్ మరియు మోనోఅన్సాచురేటెడ్ వంటి మంచి కొవ్వులు వీటిలో ఎక్కువగా లభిస్తాయి. నెయ్యి, వెన్న వంటి వాటి కంటే ఇవి మెరుగైన ఎంపిక అని, ఇవి మార్కెట్లో చౌకగా లభిస్తాయని ఆమె వివరించారు.
ఇక వనస్పతి (డాల్డా) విషయానికి వస్తే, దీనికి చాలా ఏళ్ళుగా చెడ్డ పేరు ఉంది. గతంలో వనస్పతిలో గుండె జబ్బులకు కారణమయ్యే హానికరమైన ‘ట్రాన్స్ ఫ్యాట్స్’ అధికంగా ఉండేవి. కానీ, ఆధునిక తయారీ విధానాల వల్ల ప్రస్తుత వనస్పతిలో ట్రాన్స్ ఫ్యాట్స్ దాదాపు సున్నా శాతానికి చేరాయని నిపుణులు చెబుతున్నారు. ఇది చెడు కొలెస్ట్రాల్ను తగ్గించడంలో కూడా సహాయపడగలదని కొందరు పరిశోధకులు పేర్కొంటున్నారు.
మరి వేపుళ్లకు (Deep Fry) ఏ నూనె వాడాలి? నూనెను ఎక్కువగా వేడి చేసినప్పుడు అది విచ్ఛిన్నమై హానికరమైన పదార్థాలు విడుదలయ్యే ఉష్ణోగ్రతను ‘స్మోక్ పాయింట్’ అంటారు. ఎక్కువ స్మోక్ పాయింట్ ఉన్న సన్ఫ్లవర్ ఆయిల్ లేదా వెజిటబుల్ ఆయిల్స్ డీప్ ఫ్రై చేయడానికి ఉత్తమమైనవి. ఎందుకంటే ఇవి ఎక్కువ వేడిని తట్టుకోగలవు.
అదే సమయంలో, తక్కువ వేడితో చేసే షాలో ఫ్రైయింగ్ కోసం బేసిక్ ఆలివ్ ఆయిల్ను ఉపయోగించవచ్చు. ఇక సలాడ్స్, ఫినిషింగ్ డిషెస్ కోసం 'ఎక్స్ట్రా వర్జిన్ ఆలివ్ ఆయిల్' అద్భుతమైన రుచిని, ఆరోగ్యాన్ని ఇస్తుంది. చల్లని వంటకాలకు నువ్వుల నూనె లేదా కొబ్బరి నూనెను కూడా వాడుకోవచ్చు. ఏదో ఒక నిర్దిష్ట నూనె బాటిల్ కొనడం కంటే, మన మొత్తం డైట్ సమతుల్యంగా ఉండేలా చూసుకోవడమే అసలైన ఆరోగ్య రహస్యం.