ఖర్జూరం vs బాదం.. ఆరోగ్యానికి ఏది మంచిది? ఈ తప్పులు అస్సలు చేయొద్దు..
Almonds vs Dates: వర్షాకాలం రాగానే వాతావరణంలో తేమ పెరిగి, పగటి ఉష్ణోగ్రతలు తగ్గుతాయి. ఈ కాలంలో ముఖ్యంగా జీర్ణక్రియ బాగా మందగిస్తుంది, ఇన్ఫెక్షన్లు, జలుబు, ఫ్లూ వంటి సీజనల్ వ్యాధులు వ్యాపించే ప్రమాదం పెరుగుతుంది. అందుకే ఈ సీజన్లో శరీరానికి తగినంత వ్యాధి నిరోధక శక్తితో పాటు జీర్ణ వ్యవస్థకు భారం కాకుండా శక్తిని ఇచ్చే ఆహారం అత్యవసరం. మన సాంప్రదాయ ఆహారంలో భాగమైన డ్రై ఫ్రూట్స్.. ముఖ్యంగా ఖర్జూరం, బాదం.. ఈ వర్షాకాలంలో శరీరానికి ఎలా సహాయపడతాయో తెలుసుకోవడం ముఖ్యం.
ఇన్ఫెక్షన్లను అడ్డుకునే ఖర్జూరం: వర్షాకాలంలో వచ్చే నీరసాన్ని తగ్గించడంలో ఖర్జూరాలు అద్భుతంగా పనిచేస్తాయి. వీటిలోని గ్లూకోజ్, ఫ్రక్టోజ్ వంటి సహజ చక్కెరలు శరీరానికి వెంటనే ఉత్సాహాన్ని ఇస్తాయి. వర్షాల వల్ల వాతావరణం చల్లబడినప్పుడు శరీరంలో వేడిని ఉత్పత్తి చేయడానికి ఇవి దోహదపడతాయి. ముఖ్యంగా ఖర్జూరాల్లో ఉండే శక్తివంతమైన యాంటీ ఆక్సిడెంట్లు వర్షాకాలంలో వ్యాపించే రకరకాల ఇన్ఫెక్షన్లు, గొంతు మంట మరియు వాపుల నుంచి రక్షణ కల్పిస్తాయి. వీటిలోని ఐరన్ శాతం వర్షాకాలంలో వచ్చే అలసటను దూరం చేస్తుంది.
జీర్ణక్రియ: వర్షాకాలంలో జీర్ణక్రియ నెమ్మదించడం వల్ల కడుపు ఉబ్బరం, మలబద్ధకం వంటి సమస్యలు ఎక్కువగా వస్తుంటాయి. ఖర్జూరంలో ఉండే అధిక ఫైబర్ జీర్ణ వ్యవస్థను చురుగ్గా ఉంచి ప్రేగుల కదలికలను సులభతరం చేస్తుంది. అయితే వర్షాల వల్ల శారీరక శ్రమ కాస్త తగ్గుతుంది కాబట్టి అధిక సహజ చక్కెరలు ఉన్న ఖర్జూరాలను పరిమితంగానే తీసుకోవాలి. ముఖ్యంగా మధుమేహం ఉన్నవారు, బరువు అదుపులో ఉంచుకోవాలనుకునే వారు రోజుకు ఒకటి లేదా రెండు కంటే ఎక్కువ తినకపోవడమే మంచిది.
రోగనిరోధక శక్తి: వర్షాకాలంలో బాదం పప్పుల ప్రాధాన్యత మరింత పెరుగుతుంది. వీటిలోని ఆరోగ్యకరమైన కొవ్వులు, ప్రొటీన్, ఫైబర్ శరీరానికి నిలకడైన శక్తిని అందిస్తాయి. బాదంలో ఉండే విటమిన్ ఈ, జింక్ వర్షాకాలంలో రోగనిరోధక శక్తిని వేగంగా పెంచడానికి సహాయపడతాయి. వర్షాకాలంలో వర్షపు నీరు, తేమ వల్ల వచ్చే చర్మ సమస్యలకు బాదంలోని విటమిన్ ఈ మంచి రక్షణ ఇస్తుంది. అంతేకాకుండా బాదం పప్పులు పేగుల్లోని మంచి బ్యాక్టీరియాను పెంచి, వర్షాకాలంలో జీర్ణవ్యవస్థ దెబ్బతినకుండా కాపాడతాయి.
నానబెట్టిన బాదం: వర్షాకాలంలో బాదం పప్పులను నేరుగా తినడం కంటే రాత్రి వేళ నీటిలో నానబెట్టి, ఉదయాన్నే పొట్టు తీసి తినడం అత్యంత మంచిది. బాదం పొట్టులో ఉండే టాన్సిన్లు జీర్ణక్రియకు కొద్దిగా అడ్డంకిగా మారవచ్చు. నానబెట్టడం వల్ల అవి తొలగిపోయి, బాదంలోని పోషకాలు శరీరానికి పూర్తి స్థాయిలో అందుతాయి. అంతేకాకుండా బాదం పప్పులు రక్తంలో చక్కెర స్థాయిలను పెంచవు కాబట్టి మధుమేహం ఉన్నవారు వర్షాకాలంలో ఎటువంటి సందేహం లేకుండా రోజువారీ స్నాక్గా వీటిని ఎంచుకోవచ్చు.
ఏది బెస్ట్?: ఈ రెండింటి కలిపి తీసుకోవడం శరీరానికి అన్ని పోషకాలు అందుతాయి. వర్షాల వల్ల వాతావరణం చల్లగా ఉండి నీరసంగా అనిపించినప్పుడు లేదా తక్షణ శక్తి కావలసి వచ్చినప్పుడు ఒక ఖర్జూరం ఎంతగానో ఉపయోగపడుతుంది. వర్షాకాలమంతా ఇమ్యూనిటీ పెంచుకుంటూ, జీర్ణ వ్యవస్థను ఆరోగ్యంగా ఉంచుకోవడానికి రోజువారీగా బాదం పప్పులు మేలు చేస్తాయి. కాబట్టి ఉదయాన్నే 2-3 నానబెట్టిన బాదం పప్పులు, అలాగే సాయంత్రం వేళ ఒక ఖర్జూరం తీసుకోవడం వల్ల వర్షాకాలంలో వచ్చే సీజనల్ జబ్బుల నుంచి కాపాడుకుంటూ పూర్తి ఆరోగ్యంగా ఉండవచ్చు.