హస్తానికి హ్యాండ్ ఇవ్వనున్న మరో సీనియర్ నేత !

హస్తం పార్టీలో మొదలైన వలసలు ఇప్పుడప్పుడే ఆగేలా కనిపించటం లేదు. ఇంకా పార్టీలో పలువురు కీలక నేతలు హస్తాన్ని వీడనున్నట్లు వార్తలు చక్కర్లు కొడుతున్నాయి. ఇటీవలే జ్యోతిరాదిత్య సింధియా కాంగ్రెస్ ను వీడిన నేప‌థ్యంలో ఇంకా అనేక మంది ప్ర‌ముఖులు కూడా కాంగ్రెస్ ను వీడ‌వ‌చ్చ‌నే ఊహాగానాలు మొద‌ల‌య్యాయి. ఈ క్రమంలోనే కాంగ్రెస్ సీనియర్ నేత, ఎంపీ శశిథరూర్ కూడా త్వరలోనే హస్తాన్ని వీడుతారనే ప్రచారం జోరుగా సాగుతోంది.

కాంగ్రెస్ పార్టీకి దేశ వ్యాప్తంగా వ్య‌తిరేక గాలులు వీచిన సమయంలో కూడా శ‌శిథరూర్ వ‌రుసగా ఎంపీగా నెగ్గుతూ వ‌చ్చారు. అంతటి ఉద్దండ నేత కూడా ఇప్పుడు కాంగ్రెస్ పార్టీని వీడి కమలం గూటికి చేరుతారన్న వార్తలు.. పార్టీ శ్రేణుల్లో ప్రకంపనలు రేపుతోంది.

ఇదిలా ఉంటే.. కేరళలో బీజేపీ బలం పెంచుకునేందుకు గట్టిప్రయత్నాలే చేస్తోంది. పినరయ్ సర్కార్‌కు చెక్ పెట్టాలంటే.. బలమైన నేతలు కావాల్సిందే. ఈ క్రమంలో ఇతర పార్టీల నేతలకు బీజేపీ గాలం వేస్తోందన్న ప్రచారం జరుగుతుంది. ఈ క్రమంలోనే బీజేపీ శశిథరూర్ ను తమవైపుకు లాక్కోవాలని ప్రయత్నిస్తున్నట్లుగా రాజకీయ విశ్లేషకులు చెబుతున్నారు.

మరోవైపు ప్రస్తుతం కాంగ్రెస్ పార్టీ కోలుకుంటుందన్న ఆశ సీనియర్ నాయకుల్లో లేకపోవడం.. ఇక శశిపై ఉన్న కేసుల నేపథ్యంలో బీజేపీలో చేరతున్నారేమోనన్న వార్తలు వస్తున్నాయి. ఇదిలా ఉంటే.. పార్టీ మారే ఆలోచన తనకు లేదని, బీజేపీలో అయితే చేరే ప్రసక్తే లేదని శశిథరూర్ స్పష్టం చేశారు.