ఐదు సూపర్‌ఫాస్ట్ రైళ్లలో కొత్త సేవలు.. ఏఐ టెక్నాలజీతో క్లీనింగ్, ఫిర్యాదులకు 2 గంటల్లో పరిష్కారం!

NFR Introduces AI-Based Cleaning: రైలు ప్రయాణికులకు మెరుగైన సౌకర్యాలు కల్పించడంతో పాటు పరిశుభ్రతను పెంచేందుకు నార్త్ ఈస్ట్ ఫ్రాంటియర్ రైల్వే (NFR) కీలక నిర్ణయం తీసుకుంది. ఇందులో భాగంగా ఐదు సూపర్‌ఫాస్ట్ రైళ్లలో సాంకేతిక పరిజ్ఞానంతో కూడిన అధునాతన ఆన్‌బోర్డ్ సేవలను ప్రవేశపెట్టింది. ఈ కొత్త విధానంలో కృత్రిమ మేధస్సు (AI) ఆధారిత శుభ్రత అంచనాలు, డిజిటల్ పర్యవేక్షణ, ప్రయాణికుల ఫిర్యాదులకు వేగంగా పరిష్కారం వంటి సదుపాయాలు అందుబాటులోకి రానున్నాయి. రైల్వే అధికారుల సమాచారం ప్రకారం, ఈ తరహా అధునాతన ఆన్‌బోర్డ్ సేవలను ప్రవేశపెట్టిన దేశంలోని రెండో రైల్వే జోన్‌గా NFR నిలిచింది.

ఈ ఐదు రైళ్లలో కొత్త సేవలు

NFR ప్రవేశపెట్టిన ఈ కొత్త సేవలు మూడు సాధారణ రైళ్లతో పాటు రెండు వందే భారత్ ఎక్స్‌ప్రెస్ రైళ్లలో అందుబాటులోకి వచ్చాయి. ఆ రైళ్ల వివరాలు ఇవే.

• కామాఖ్య–SMVT బెంగళూరు ఎక్స్‌ప్రెస్
• గువాహటి–కోల్‌కతా గరీబ్ రథ్ ఎక్స్‌ప్రెస్
• దిబ్రూగఢ్–ముంబై LTT ఎక్స్‌ప్రెస్
• న్యూ జల్పాయిగురి–పట్నా వందే భారత్ ఎక్స్‌ప్రెస్
• న్యూ జల్పాయిగురి–గువాహటి వందే భారత్ ఎక్స్‌ప్రెస్

NFR చీఫ్ పబ్లిక్ రిలేషన్స్ ఆఫీసర్ కపింజల్ కిషోర్ శర్మ తెలిపిన వివరాల ప్రకారం, గువాహటి–కోల్‌కతా గరీబ్ రథ్ ఎక్స్‌ప్రెస్‌లో అక్టోబర్ 10 నుంచి, దిబ్రూగఢ్–ముంబై LTT ఎక్స్‌ప్రెస్‌లో అక్టోబర్ 11 నుంచి ఈ సేవలను ప్రారంభించారు. మిగిలిన మూడు రైళ్లలో అక్టోబర్ 14 నుంచి కొత్త సదుపాయాలు అమల్లోకి వచ్చాయి.

శుభ్రతకు ప్రాధాన్యం.. ప్రయాణికులకు మెరుగైన సేవలు

కొత్త విధానంలో రైలు బోగీలను క్రమం తప్పకుండా శుభ్రం చేయడం, ఏసీ కోచ్‌లలోని కిటికీలు, మరుగుదొడ్ల నిర్వహణను మెరుగుపరచడం, చెత్తను సక్రమంగా తొలగించడం వంటి పనులకు ప్రాధాన్యం ఇస్తారు. బెడ్‌షీట్లు, ఇతర బెడ్‌ లినెన్ వస్తువులను సకాలంలో ప్రయాణికులకు అందించడం, ప్రయాణం ముగిసిన తర్వాత వాటిని సేకరించడం కూడా ఈ సేవల్లో భాగంగా ఉంటుంది. అంతేకాకుండా, రైళ్లలో తలెత్తే చిన్నపాటి సాంకేతిక సమస్యలకు సహాయం అందించేందుకు ప్రత్యేక సిబ్బందిని నియమిస్తారు. కోచ్‌లలో నీటి లభ్యతను పర్యవేక్షిస్తూ, ప్రయాణికుల సమస్యలను పరిష్కరించేందుకు చర్యలు తీసుకుంటారు. ముఖ్యంగా, ప్రయాణికుల నుంచి అందే ఫిర్యాదులను రెండు గంటల్లో పరిష్కరించాలని రైల్వే లక్ష్యంగా పెట్టుకుంది. నిర్ణీత సమయంలో పరిష్కారం కాని సమస్యలను సంబంధిత ఉన్నతాధికారుల దృష్టికి తీసుకెళ్తారు.

ఏఐతో శుభ్రత పర్యవేక్షణ

ఈ సేవల్లో డిజిటల్ సాంకేతికత కీలక పాత్ర పోషించనుంది. హౌస్‌కీపింగ్ పనులు ఎక్కడ, ఎప్పుడు జరిగాయో నిర్ధారించేందుకు జియో-ట్యాగింగ్ విధానాన్ని ఉపయోగిస్తారు. సిబ్బంది పనితీరును ట్రాక్ చేయడంతో పాటు, కేంద్రస్థాయిలో డిజిటల్ పర్యవేక్షణ చేపడతారు. ప్రయాణికులు ఇచ్చే అభిప్రాయాలు, స్టార్ రేటింగ్‌ల ఆధారంగా సేవల నాణ్యతను అంచనా వేస్తారు. ఏఐ ఆధారిత వ్యవస్థ ద్వారా శుభ్రత పనితీరును పరిశీలించి, లోపాలను గుర్తించి, అవసరమైన మెరుగుదలలు చేపట్టనున్నారు.

ఈ చర్యలతో రైళ్లలో పరిశుభ్రత ప్రమాణాలను పెంచడంతో పాటు, ప్రయాణికులకు సౌకర్యవంతమైన ప్రయాణ అనుభవాన్ని అందించాలని నార్త్ ఈస్ట్ ఫ్రాంటియర్ రైల్వే లక్ష్యంగా పెట్టుకుంది.